Read Bawm Chin LÂIRÊL 16 Bible Online

LÂIRÊL 16 - Bawm Chin bible

LÂIRÊL 16

¹Ni khat chu Samson chu Philistia khuapi Gaza ah a va kal le, chunah chun nunau â zuar mi hen anna tawng le, a ihpi.

²Gaza mi tla nih Samson chu chunah a um ti an theih le, chu mun chu an kulh le, khua dei ver hen khuapi kulh kawtkâ ah an ngâk. Khuadei ver hen dâisiptê hen an um le, “Khuadei tiang kan ngâk lai le, kan thah nget lai,” ti an ruat.

³Sikhawmsele Samson chu thanṭim tiang cho a it. Churawhchun a thawk le, khuapi kulh kawtkâ chu a tleih le, inkhâr tla, a tung tla leh a renhnâk a ektê hen a dawh rel. A liang ah a put le, Hebron tlûnlei mi tlâng ah a kalpi.

⁴Chu nûnah chun, Samson nih Delilah, Sorek kuam ah a um mi chu thungâi a duh.

⁵Philistia lal panga chu mi nunau sinah an kal le, a sinah, “Samson rangah perpet le, hi hâwi tluk hen a chaknâk hi, zeitin kan phuar hen zeikhawm ti kholo hen kan siam kho ding dân a nan simh ding hen. Tangka sâng leh zâ khat seng kan pêk lai,” an ti.

⁶Churawhchun Delilah nih Samson sinah, “Zângfahtê hen zei nih me an chaktir hawng ka simh rawh. Mi nih zeikhawm ti kholo hen an phuar pang duh sele, zeitin an ti kho zia lai?” a ti.

⁷Samson nih a sâng le, “Sâirî a ring mi pasarih hen hawng ka phuar na sele, midang hâwi hen bang cho hen ka um lai,” a ti.

⁸Churawhchun Philistia lalchem tla nih Delilah rangah sâirî a thar siak mi pasarih an hawng pêk le, chu hen Samson chu a phuar pang rawh.

⁹A dang mi kardang ah midang tla chu a ngâktir na, churawhchun a âu le, “Samson! Philistia tla an hawng khi!” a ti. Sikhawmsele chu sâirî tla chu mei nih lazâi a khangh mi hâwi hen a sah phin. Churawhchun a chaknâk tak chu an theih lo nget rih.

¹⁰Delilah nih Samson sinah, “Mi â ah na hawng ka ruat, thudik na hawng ka simh duh lo. Mi nih an phuar khonâk zângfahtê hen hawng ka simh,” a ti.

¹¹Anih nih a sâng le, “Rirual thar siak mang lo rih mi hen hawng ka phuar na sele, midang hâwi hen kei khawm ka chak lai lo,” a ti.

¹²Churawhchun Delilah nih rirual thar siar mi a lâk le, a phuar pang. “Samson Philistia mi an hawng,” ti hen a âu. Mi tla nih kar dang dangah an ngâk ko. Sikhawmsele a bân ah rî tla chu lazâi hâwi hen a sah phin.

¹³Delilah nih Samson sinah, “Mi â hâwi nget na ka ruat, thudik na hawng ka simh duh lo. Mi nih an phuar kho ding dân hawng ka simh,” a ti. A sâng le, “Ka sam têl pasarih hi puan tahnâk ah tah sih le, a kilhnâk hen kilh pang, midang hâwi tluk cho ka si lai,” a ti.

¹⁴Delilah nih it ding hen a thlim le, a sam têl sarih chu thiam lakah a tah sih. A kilh pang le, “Samson! Philistia mi an hawng” ti hen a âu. A hawng a ṭhang le, thiam lakah a sam a tah sih mi chu a nûk zek.

¹⁵Churawhchun a sinah, “Zeitin kan zângfah na ka ti kho zia, na ti tak mi asi lo khateh? Veithum na hawng ka perpet rawh, a nan chaktirtu chu na ka simh lo nget rih,” a ti.

¹⁶Nisiar hen a deih lemamg ko rawh. Samson chu a deih mi ruangah a nengtawr tuk le, a zâw rê le,

¹⁷a dawnghnâk ah chun a tak tak hen a simh rawh. “Ka sam hi mêt dah lo mi asi,” a ti. “Nazirit mi hâwi hen ka suak kâ thawk hen Pathian sinah pêk hen ka um. Tuhin ka sam chu mêt sele chu, ka chaknâk a vei hep lai le, midang hâwi cho ka si lai,” a ti.

¹⁸Delilah nih a tak tak hawng ka simh ti a theih rawh chun Philistia lal tla sinah mi a fial le, an sinah, “Tu tak hin veikhat hawng kîr nawlh u. Thudik hawng ka simh rawh,” a ti. Churawhchun tangka an put le, an va kal rawh.

¹⁹Delilah nih Samson chu a êl lakah a thlim le, Samson samtêl pasarih tantu ding hen minung a kawh. Churawhchun a chaknâk chu a vei rawh le, a rêp taktê rawh.

²⁰“Samson, Philistia mi tla an hawng,” ti hen a âu. A hawng thawk le, a lân hâwi hen sah hen suak kho ding a ruat. LALPA nih a kaltâk rawh ti a theih lo.

²¹Philistia tla nih an tleih le, a mit an chawih zek. Gaza ah an kalpi le, dâr chikchîn hen an khih le, rêngin ah rialnâk khâwl ah rian an ṭuantir.

²²Sikhawmsele a sam chu a hawng chawrh nawlh.

²³Philistia lalchem tla chu an pathian Dagon sinah bâwlnâk rokual tak pêk ding hen anna pûm. “Kan mêlma Samson nehtu ah kan pathian nih hawng kan siam rawh,” ti hen la an sak.

²⁴Anna lâwm tuktarâi le, “Samson hawng put u, zauhnuam ah kan siam lai,” an ti. Rêngin ah mi Samson chu an hawng suah le, anmah zauhnuam rangah an siam le, in tung panih karah an dîrtir. Mi zapi nih Samson an muh rawh chun, “Kan pathian nih kan mêlma kan ram râwktu leh tamtak hawng kan thahtupa nehtu ah hawng kan siam rawh,” ti hen an pathian sinah la an sak.

²⁶Samson nih, a kut ah ruaitu mipa ngâksiatê sinah, “Hi tleih dîrtu intung hawng ka thamtir rih. Chu lakah ngauh ka duh,” a ti.

²⁷Chu in chu mipa leh nunau hen an khat zat. Philistia lalchem panga tla khawm chunah chun an um, nunau mipa sâng thum ding Samson zauhnuam an siam mi zauh hen in tlûnah an um.

²⁸Churawhchun Samson nih thla a cham le, “LALPA zahkâi, zângfahtê hen hawng ka theihkumza rawh; Pathian, zângfahtê hen chaknâk veikhat tal hawng ka pêk nawlh, ka mit khiang khinih an ka chawih piak mi ruangrûl ah Philistia mi tla hi tutan veikhat ka vuak kho na bâk ding hen,” a ti.

²⁹Churawhchun, in tleih dîrtu intung panih a lâi mi chu Samson nih a tleih. Chu tung lakah chun a kut a tleih vevê le,

³⁰a hawng tûl nawh na le, “Hi Philistia mi tla hen munkhat hen hawng ka thihtir,” ti hen a âu. A tha um leh umlo hen a tûl le, chu in chu lalchem panga leh midang tla a chim nawh na rawh. Samson nih a dam liauah a thah mi ngâk hen a thih liauah a thah mi a tam dauh.

³¹A unau tla leh a dâwngsung tla an hawng le, a ruak an lâk rawh. An tlungpi le, a pa Manoah thlân ah Zorah leh Estaol karah an vûi. Kum kul kar chu Israel ruitu ah a um.