Read Bawm Chin LÂIRÊL 17 Bible Online

LÂIRÊL 17 - Bawm Chin bible

LÂIRÊL 17

¹Veikhat chu mi pakhat Mikah an ti mi chu Efraim tlâng ram ah a um.

²A nu sinah, “Âu nih mawh na tangka sâng leh zâ a lâk liau khan mifîr rangah hawlh siat na barh. Chu na ti mi chu ka theih rawh. Zauhnik, chu tangka chu ka nei ko. A lâktu kha keimah ka si,” a ti. A nu nih, “Ka fapa! LALPA nih mal a nan sâwm seh,” a ti.

³A nu sinah tangka chu a khirh le, churawhchun a nu nih, “Ka fapa tlûnah siat chu tlung lo ding hen keimah tak nih LALPA sinah bir tak hen tangka chu ka ap asi. Thing hen milem tuah mi tangka hen tuamnâk dingah mang asi lai. Churuangah tuah tangka chu kan khirh nawlh ko lai,” a ti.

⁴Churawhchun tangka chu a nu sinah a khirh nawlh lîlâ rawh. A nu nih tangka zanih chu a lâk le, tangka dêngtu sinah milem siamnâk ding hen a pêk na le, thing chu ker hen tangkasa hen an tuam. Mikah in ah an siah rawh.

⁵Chu Mikah nih chun pathian sawnhnâk mun amah ta ê a nei. Ephod leh milem tla a siam le, a fapa tla lakah pakhat chu bâwlpu ah a siam.

⁶Chu liauah chun Israel ram ah lalchem âukhawm a um lo; mikip anmah duh dân hâwi chiau hen thil an ti.

⁷Chu liau chir chun Juda ram ah Bethlehem khua ah Levi mi tlangvâl pakhat a um.

⁸Bethlehem khua kaltâk hen umnâk mun dang a hâwl. Chu hâwi hen khual a tlâwngnâk ah Efraim tlâng ram Mikah in ah a va tleng rawh.

⁹Mikah nih, “Zei thawk hen hawng mi me na si?” a ti. Anih nih a sâng le, “Juda ram ah Bethlehem khua mi Levi chi ka si. Umnâk ding mun ka hâwl mi asi,” a ti.

¹⁰Mikah nih, “Ka sinah um ko. Keimah simhtu leh bâwlpu rangah um le, kum khat ah tangka râ, nipuan tla na ei ding buh ka nan pêk lai,” a ti.

¹¹Levi tlangvâl pa nih chun Mikah sinah um ding rem a ti le, a sinah fapa hâwi hen a um rawh.

¹²Mikah nih a bâwlpu ah a siam le, a in ah a um rawh.

¹³Mikah nih, “Tu chun Levi mi bâwlpu ka nei rawh le, LALPA nih ka rangah sul-le-lam a tluangtir lai rawh,” a ti.