Read Bawm Chin LÂIRÊL 18 Bible Online

LÂIRÊL 18 - Bawm Chin bible

LÂIRÊL 18

¹Chu liau chun Israel ram ah lalchem rêng a um lo. Chu liauah Dan phun tla nih Israel phun lakah anmah rang ê hen ram anna ting lo rih ruangah luah ding hen ram ngiar an tum.

²Churawhchun Dan mi tla nih mi thiam panga anmah dâwngsung lakah mi an thîm le, Zorah khuapi leh Estaol khuapi thawk hen an simh zet na le, ram zauhfiang ding hen an fial na. Efraim tlâng ram an tleng rawh chun Mikah in ah an châm.

³Mikah in ah an va um liau chun Levi tlangvâl hâu an theih le, churawhchun a sinah a va kal le, thu an deih, “Hinah zei na ti?” Âu nih hinah an hawngpi?” an ti.

⁴Anih nih a sâng le, “Mikah nih a bâwlpu si ding hen tangka hawng ka pêk le, zeizawng kan ruat mi rawh,” a ti.

⁵Annih nih a sinah, “Kan khualtlâwngnâk ah dingchangnâk kan tawng lai ma Pathian sinah hawng kan deih piak nik,” an ti.

⁶Bâwlpu nih a sâng le, “Zeikhawm zenh lah u. Nan khualtlâwngnâk ah hin LALPA nih an vêng na asi,” ati.

⁷Churawhchun mi panga chu, chu mun ah mi chu Laish khua ah an va kal. Chunah minung um mi tla chu Sidon ah mi tla hâwi hen him tak hen an um mi an muh na. Âu hen khawm tawh leh fâi lo hen rem tak leh dâi ziar hen an um; thil duh zeizawng khawm an nei tling hep. Sidon mi tla hen khawm an umnâk a lât thlo, midang âu hen khawm kawpkaihnâk; an nei lo.

⁸Chu minung panga chu Zorah leh Estaol ah an va kîr rawh chun an ram mi tla nih zei zei an muh ti an deih na.

⁹“Hawng ko u, Laish kan do lai. A ram ṭhat dân tla kan muh rawh. Zeikhawm tilo hen hinah um ko lah u; a nam u! Kal ule, lâk ko u!

¹⁰Chunah nan va tleng chun mi tla nih zeikhawm zumhmaihnâk an nei lo ti nan theih lai. Ram kâupî asi; minung nih duhphung zeizawng a um hep, chu chu Pathian nih an pêk na rawh,” an ti.

¹¹Churawhchun Dan mi mi zaruk nih Zorah leh Estaol chu an kaltâk le, râltuk ding hen anna tîm rawh.

¹²An va kâi phêt le, Juda ram ah mi Kiriath Jearim thlanglei ah riakmun an khuar. Churuangah asi chu mun chu Dan thlâk tla riakmun an ti nget tâwn mi chu.

¹³Chu thawk hen an kal le, Efraim tlâng ram ah mi Mikah in ah an va tlung.

¹⁴Minung panga Laish ram kiangkam zauhtu nih chun an hâwi le tla sinah, “Hi ram ah in tla pakhat lakah hin thing milem tangka hen tuam mi a um ti nan theih rawh ma? Chun, milem dang leh Ephod khawm a um. Va ti bâk ding hen zei hâwi nan ngaih?” an ti.

¹⁵Churawhchun Levi tlangvâl umnâk Mikah in ah an va lût le, Levi chu zei hâwi hen a um ti an va deih.

¹⁶Chu kar chun kawrsen zaruk Dan phun ah mi chu kulh kawtkâ ah râltuk sek ding hen tîm chia hen an um ko rawh.

¹⁷Chu zauh thlingthlâktu panga chu in ah an va kal phêt le, tangka hen tuam mi thing milem leh milem dang tla leh ephod chu bâwlpu kulh kawtkâ kiangah kawrsen zaruk sinah a um karah chun an lâk rawh.

¹⁸Mikah in ah a va kal rawh chun, thil thenhlimh chu an lâk le, bâwlpu nih, “Zei me nan ti?” a ti na.

¹⁹Annih nih, “Dâisip. Zei thu khawm sim lah. Kan sinah hawng le, kan bâwlpu ah leh hawng kan simhtu ah um rawh. Minung dâwng khat rang cho bâwlpu si ngâk hen Israel phun pumpi rangah bâwlpu si chu a ṭha dauh awt lo ma?” an ti.

²⁰Chu thu nih chun bâwlpu chu thungâi a lawmhtir le, churawhchun thil thenhlimh chu a lâk le, an sinah a kal bâk rawh.

²¹Chun, anna her le, an fa tla, an ranrual tla leh an neih zawzawng hen mâilei ah an kal rawh.

²²Mikah nih a zâwlbâwm tla tuknâk ah kal ding hen a pumh na liau chun Mikah in thawk hen lât ual an kal rawh. Dan ah mi minung tla hen anna tawng.

²³Churawhchun an auh na. Dan ah mi chu an hawng a her le, Mikah rangah an deih, “Zei thupawi me? Zei zia hi mi zapi tla hi?” an ti.

²⁴Mikah nih a sâng na le, “Zei me pawi, zeitin nan ti zia? Ka bâwlpu leh ka pathian ka siam mi nan lâk le, nan kal ving! Kei nih zei ka nei rawh?” a ti.

²⁵Dan mi tla nih, “Nang rangah chun hawlh lo a ṭha dauh, hi bang minung tla hi thinthawktir na hen nangmah an dotu ah na duh na lêm lo chun. Chu hâwi asi chun nan dâwngsungkhur hen nan thi hep lai,” an ti.

²⁶Churawhchun an kal vima rawh. Mikah nih amah ngâk hen an chak awt ti a theih le, a in leiah a kîr rawh.

²⁷Mikah nih a siam mi thil leh bâwlpu chu Dan mi tla nih an lâk rawh chun an va kal le, Laish thlangam tak leh dâisip hen Bethrehob tivakuam ah an um bâk mi chu an do rawh. An khua sung mi minung tla an thah le, khua chu an duah. Anmah ruangsuahtu ding âukhawm an um lo. Laish chu Sidon thawk hen a lât thlo ruangah leh midang tla hen tlâinâk an neilo ruangah. Dan mi tla nih chu khua chu an sak thar nawlh le, chu khua ah chun an um rawh.

²⁹A min Laish an ti mi chu Dan hen an thleng. Jakob fapa Dan anmah thlâktu min put hen an sak.

³⁰Dan mi tla nih sawnh ding hen milem chu an siah le, Jonathan Gersom fapa leh Mosi tupa nih Dan phun tla rangah bâwlpu rian a ṭuan le, sal ah put an si tiang hen a thlâk tla nih bâwlpu rian an ṭuan.

³¹Mikah milem chu Siloh khua ah Pathian sawnhnâk Puanin umnâk ah chun zeiliau zawng a um kumza rawh.