Read Bawm Chin LÂIRÊL 19 Bible Online

LÂIRÊL 19 - Bawm Chin bible

LÂIRÊL 19

¹Chu liauah chun Israel tla nih lalchem an nei lânah chun Levi mi pakhat Efraim tlâng ram lât tak ah a um. Nungâk pakhat Juda ram Bethlehem khua mi a nupisûn rangah a lâk le,

²sikhawmsele a nupi chu a thinrun le, Bethlehem ah a pa sinah a kîr ving le, chunah chun thla li a va um.

³Churawhchun a pasal nih kîrpi nawlh ding hen a dunglei ah ṭhâwl a tum. A to-aw leh a sanatung panih a put na. A nupisûn nih Levi chu insung a zauhtir le, a pu nih a muh rawh chun a lawmh thlo.

⁴A pu nih um ding hen a thloh le, ni thum a châm. An nupa hen buh an ei le, chu zân ah chun munkhat an riak.

⁵A ni linâk zîngtê hen an thawk le, kal ding anna tîm rawh. Sikhawmsele, a pu nih Levi sinah, “Zeimawh ei tâ rih u. An ṭhatvaktir na lai. Tlâi dauh hen khawm nan kal kho,” a ti.

⁶Churawhchun an panih hen an ei le, an din rawh. Chun a pu nih an sinah, “Zângfahtê hen tuzân chu riak nawlh ule, nuam tak hen um nawlh u rih ma a,” a ti na.

⁷Levi chu kal ding a thawk le, a pu nih um ding hen a thloh. Churawhchun an riak nawlh fâwn.

⁸A ni ngânâk zîng ah chun thawh a tum le, a pu nih, “Zângfahtê hen zei zeimawh ei u rih. Ni tâwm hen ngâk u rih,” a ti na. Churawhchun an panih hen munkhat hen an ei.

⁹An nupa hen thawh ding anna tum nawlh le, a pu nih, “Zânlei vung rawh ta a! Riak nawlh dâidua ko u. A mûi sawm ding ko rawh; um nawlh dâidua ule, nan rangah a ṭha lai. Thâizîng zîngtê ah nanna thawh lai le, nan tlung ko lai ma kha a,” a ti na.

¹⁰Sikhawmsele, a samakpa nih riak nawlh ding a duh lo le, churawhchun an nupa hen an to-aw leh an sanatung panih a tlûnah chuanhnâk hen an kal rawh. Jebus (Jerusalem an ti mi kiangah an tlung rawh chun a zânlei tlâi ual rawh, a to-aw nih a pupa sinah, “Zeirangah Jebus khuapi ah hin a dîn hen kan riak ko lo le?” a ti.

¹²Sikhawmsele a pupa nih, “Israel minung silo mi khuapi ah kanna dîn ding asi lo. Tâwm kan kal lai le, Gibeah mawh Ramah ah mawh kan riak lai,” a ti.

¹⁴Churawhchun Jebus chu an lanh le, an kal vima. Benjamin phun ram ah mi Gibeah an tleng rawh chun nî a tlâ rawh.

¹⁵An va pial le, chunah chun an va riak rawh. Khuapi ah chun an va lût le, khua lâi ah an to, sikhawmsele âukhawm nih riak ding hen in leiah an kalpi na lo.

¹⁶Chunah an um liauah chun tarpa pakhat, nî a tlâ le, phâisen a rianṭuan thawk hen a tlung mi a hawng. Amah chu a tîrah Efraim tlâng ram ah um mi asi, sikhawmsele chu liau chun Gibeah ah a um. (Benjamin phun ah mi midang tla khawm chunah chun an um.)

¹⁷Chu tarpa nih khua lâi ah mi khual chu a muh le, thu a deih, “Zei thawk hen hawng mi me na si? Zeiah na kal awt mi me?” a ti.

¹⁸Levi nih a sâng le, “Juda ram ah Bethlehem ah um mi kan si le, tuah kan khua leiah kan tlung mi, Efraim tlâng ram sung ving ah um mi kan si.

¹⁹Kan sanatung tla rangah fapawn khawm kan nei rih, ei ding khawm kei leh ka nupi leh kan to-aw rang khawm kan nei; a herh mi zawng kan nei. Sikhawmsele, âukhawm nih riak ding hen hawng kan tlungtir duh lo,” a ti.

²⁰Tarpa nih, “Ka in ah hawng u! Keimah nih kan zauhkhenh na lai; khua lâi ah chun riak lah u,” a ti.

²¹Churawhchun in leiah a kalpi na le, an sanatung tla râwl a pêk. A khual tla chu an kê an ṭâwl le, buh an ei rawh.

²²Chu hâwi hen lâwm tak hen an um liauah chun khua sungah mi mi hur pungmang tla nih in sung an hawng kulh le, inkhâr chu an hawng dêng rawh. Tarpa rangah chun, “Na in ah khua leiah tlung ding mi mipa kha hawng suah. Amah pung ding kan duh!” an ti.

²³Sikhawmsele, tarpa chu lênglei ah a va suak le, an sinah, “Silo, ka hâwi le tla! Zângfahtê hen chu hâwi hurnâk thilsual chu ti lah u! Hi minung hi ka khual asi.

²⁴Zauhnik u! A nupisûn leh âukhawm nih tawngh lo mi ka fanu khawm an um. Tuah ka hawngpi na lai le, nanna ting ko lai. Nan duh zia zawng hen ti na u. Sikhawmsele, hi minung tlûnah thil ṭha lo chu hâwi chu ti lah u!” a ti na.

²⁵Sikhawmsele, chu minung tla nih chun an ngâi duh lo. Churawhchun Levi nih a nupisûn chu lênglei ah a suah. An tleihrêm le, khuadei ver hen dîn lo hen an pung.

²⁶Khua a hawng dei rawh chun nunau chu a pasal umnâk tarpa inkhâr kiangah a rîl thlo. Chunah chun nî suak tiang a um ko.

²⁷A pasal chu zînglei ah a hawng thawk le, tlung ding hen inkhâr a awng le, a nupisûn chu in kawtkâ inkhâr tleih hen a rîl thlo mi a muh.

²⁸“Thawk, kan kal lai rawh,” a ti. Sikhawmsele, a sâng lo thlo. Churawhchun a tan pakhang hen a sanatung tlûnah a chuanh le, a in leiah a tlung rawh.

²⁹In a tlung rawh chun in sungah a lût le, nâmtê a lâk. A nupisûn taksa chu a lâk le, vo leinih hen a chan, vo khat chiau Israel phun leinih sinah vo khat seng a kuat na.

³⁰A muhtu zawng nih, “Hi bang hâwi thil chu kan theih dah lo mi thil mahi! Aigupta ram kan suaktâknâk thawk hen hi hâwi thil hi a um dah lo! Hi ruang hin thil rang khat ti ding a suak awt! Zei dek asi lai?” an ti.