Read Bawm Chin LÂIRÊL 2 Bible Online

LÂIRÊL 2 - Bawm Chin bible

LÂIRÊL 2

¹LALPA vânmifial chu Gilgal thawk hen Bokim ah a va kal le, Israel tla sinah, “Aigupta ram ah mi chu ka nan lâk na le, an thlâk natu sinah ka tiamh na mi ram ah ka nan kalpi na. ‘Nan sinah ka thudântuk ka râwk rêng lai lo.

²Hi ram mi minung tla hen zeikhawm thudântuk nan siam ding asi lo. An mâichâm tla nan râwk ding asi,’ kan ti na. Sikhawmsele ka nan simh na mi hâwi hen nan ti lo. An ti dân lam nan châwng!

³Churuangah tuah nan kalnâk ah mi tla chu ka nar awt lo ti ka nan simh na asi. Nan rangah mêlma an si lai le, an pathian sawnhnâk ah nan tâng lai,” a ti.

⁴Hi hawi hen vânmifial nih a sim rawh chun an ektê hen an ṭap le,

⁵churuangah asi chu mun chu Bokim an ti mi chu. Chunah chun LALPA sinah bâwlnâk an ap.

⁶Josua nih Israel tla chu anmah ram leiah a tlungtir na le, anmah tingvo chiau ram chu va luah ding hen.

⁷Josua dam kar vial chu Israel mi tla nih LALPA rian an ṭuan le, a thih nûn khawmah chun ruitu tla LALPA nih Israel tla rangah thil rokual a ti mi tla muhtu vial dam kar zawzawng chu an ti vima rih.

⁸LALPA to-aw Josua Nun fapa chu kum zâ leh kum râ asi hen a thi rawh.

⁹Gaash tlâng marlei Efraim tlâng ram Timath Serah ah amah tingvo ram ah vûi asi.

¹⁰Chu thlâk zawzawng tla chu an thi ver le, thlâk hawng um nawlh mi tla nih chun LALPA leh Israel tla rangah thil a ti mi chu an philh rawh.

¹¹Churawhchun Israel tla nih LALPA lakah thilsual ti hen Baal an sawnh rawh.

¹²LALPA an thlâktu tla Pathian, Aigupta ram ah mi suakpi natu an sawnh mi chu an bângtâk le, pathian dang tla an kiangkam mi pathian chu an sawnh rawh. An mâimûk na le, LALPA thin an runhtir rawh.

¹³LALPA sawnh chu an bâng le, Baal leh Astartes rian an ṭuan rawh.

¹⁴Churawhchun LALPA chu Israel tlûnah a thinthawk le, rûntu tla chu a dotir na hen a râwktir na. An kiangkam ah mi an mêlma zawzawng chu anmah ngâk hen thiltikho hen a siam na le, Israel tla chu anmah anna hum kho lo rawh.

¹⁵Râl an donâk kipah a sim rawh hawi hen LALPA chu anmah dotu asi. Hamhnâk fâk takah an um rawh.

¹⁶Churawhchun LALPA nih anmah rûntu lakah mi humtu ding hen Israel tla chu ruitu tla a pêk na.

¹⁷Sikhawmsele, Israel tla nih anmah ruitu tla thu chu an ngâi duh lo. LALPA lakah Israel tla chu zumh an kâi lo le, pathian dang tla an sawnh rawh. An pa tla nih chun LALPA thupêk an zûl le, sikhawmsele thlâk thar tla nih chun chu hâwi ti ding mi chu an bângtâk sawm.

¹⁸Zeiliau zawngah Israel tla rangah LALPA nih ruitu a pêk na mi chu ruitu dam kar vial chu LALPA nih a ṭangpi hen mêlma lakah mi a hum awt. LALPA nih chun nehsawh leh tuar hen an rûm mi ruangah an tlûnah khua a ruat awt.

¹⁹Sikhawmsele chu ruitu chu a thi rawh chun an umdân li leiah kîr hen a lânah mi thlâktu ngâk hen an sual dauh. Pathian dang tla sawnh hen a rian an ṭuan le, sualnâk an ti mi chu lawnh ding an duh lo.

²⁰LALPA chu Israel tlûnah a rothawk le, “Hi phun nih hin an thlâktu tla sinah zûl ding hen thu ka pêk mi ka thudântuk chu an buar. Ka thu an ngâi lo ruangah chun,

²¹Josua thih liauah ram lakah um rawh mi zei phun tal ka nar na awt lo rawh.

²²Anmah thlâktu tla nih an ti mi hâwi hen hi Israel tla nih hin ka lampi an zawh ma zawh lo rerêng theihnâk ah ka mang na awt,” a ti.

²³Churuangah LALPA nih chu phun tla chu ram sungah um kumza ding hen a siang na le, Josua nih anmah neh na ding hen a pêk lo. Josua thih nûn khawmah a nar sawm na lo.