Read Bawm Chin LÂIRÊL 20 Bible Online

LÂIRÊL 20 - Bawm Chin bible

LÂIRÊL 20

¹Israel mi zawzawng tla chu marlei mi Dan thawk hen simlei mi Bersheba tiang, saklei kângah Gilead ram thawk hen khawm chu kawhnâk chu an sâng. LALPA mâika ah Mizpah ah thurual hen anna pûm.

²Israel phun ruitu zawzawng chu hi Pathian mi tla pumhnâk ah hin anna tel hep, kê hen kal mi kawrsen nuai li an tling.

³Chu liau chun Benjamin mi khawm nih Mizpah ah Israel tla anna pûm ti an theih. Israel tla nih, “Hi thupawi umdân hi hawng kan simh,” an ti.

⁴Levi a nupisûn an thah piak mi nih chun, “Kei leh ka nupisûn chu Benjamin ram ah Gibeah ah zân ah riak ding hen kan va kal.

⁵Gibeah mi tla nih keimah do ding hen zân ah in an kulh. Thah ding an ka awt; keimah ruangrûl ah ka nupisûn an tleihrêm le, a thih phah rê.

⁶A ruak chu ka lâk le, ka chan dip le, Israel phun leinih chu vo khat chiau ka kuat na. Chubang minung tla nih chun thilsual ti hen kan lakah hurnâk thil an ti asi.

⁷Hinah um mi tla hi Israel hep nan si. Hi thu lakah zei kan ti awt,” a ti na.

⁸Zapi minung chu a rual hen an dîr hep le, “Âukhawm puanin ah um mi mawh in ah um mi mawh in leiah tlung ding asi lo.

⁹Kan ti ding mi chu hi hi asi: Chamchawhnâk kan siam lai le, mi zeimaw mi nih Gibeah do ding an thîm lai mawh.

¹⁰Israel ram ah parâ lû ah pakhat nih kawrsen rangah buh pêk ding, a dang chu Gibeah ah kal hen va rêp na ding asi; hi hâwi hen Israel tlûnah thilsual an ti ruangah,” an ti.

¹¹Churawhchun Israel mi tla chu khuapi do ding hen anna pûm rawh.

¹²Israel phun tla nih chun Benjamin phun ram zawzawng ah, “Hi thilsual nan ti mi hi zei?” ti sim ding hen mi an fial.

¹³“Tuah Gibeah khua mi misual tla chu kan kut ah hawng kan pêk u; chu tikah kan thah na lai le, Israel lakah mi thilsual chu kan veih lai,” an ti. Sikhawmsele, Benjamin mi tla nih Israel dang tla thusim chu an ngâi piak duh na lo.

¹⁴Benjamin ram ah khuapi thawk hen Israel mi zapi minung dang tla do ding hen Gibeah ah an hawng.

¹⁵Chu ni ah chun an khuapi thawk hen kawrsen sîng nih leh sâng ruk an kawh na. Chubang lo khawmah Gibeah mi minung a bîk hen thîm mi minung zasarih, munchekeh hep anna pûm. An ektê hen lungseh samzâi tlâ khawm ṭhelh dah lo mi tla an si.

¹⁶

¹⁷A dang vial chu sîn mi kawrsen karo sing li anna pûm.

¹⁸Israel tla chu Pathian sawnhnâk mun Bethel ah an kal le, chunah chun Pathian rangah an deih, “Benjamin phun tla do masachemtu ding chu zei phun asi lai?” an ti. LALPA nih a sâng le, “Juda phun nih,” a ti.

¹⁹A thâizîng ah chun Israel tla chu anna thawh le, Gibeah khuapi kiangah riakmun an khuar.

²⁰Benjamin phun kawrsen tla chu do ding hen an kal rawh, khuapi leikâng hawi hen kawrsen tla chu anmah mun chiauah an siah na.

²¹Benjamin phun kawrsen tla chu khuapi mi an hawng suak le, nî tlâk lânah Israel kawrsen tla sîng nih leh sâng nih an thah na.

²²Churawhchun Israel tla chu Pathian sawnhnâk mun ah an kal le, LALPA mâika ah zânlei tiang an ulh. “Kan unau Benjamin mi tla chu kan va do nawlh lai ma,” ti hen Pathian an deih. LALPA nih a sâng le, “Do u,” a ti. Churawhchun Israel kawrsen tla chu an râl anna ṭhattir nawlh le, a lânah mi hâwi hen anmah mun chiauah anna siah nawlh.

²³

²⁴A veinihnâk ah Benjamin kawrsen tla do ding hen an va kal nawlh.

²⁵Chun, a veinihnâk ah Benjamin tla chu Gibeah mi an hawng suak le, chu liau khawm Israel kawrsen sîn mi karo sîng khat leh sâng riat an thah na.

²⁶Churawhchun Israel mi zawzawng tla chu Bethel ah an kal le, an ulh. Chunah chun LALPA mâika ah buh eilo hen zânlei tiang an to. An ektê hen LALPA mâika ah chun kawmhnâk ding hen bâwlnâk an ap le, bâwlnâk zawzawng tla LALPA mâika ah an duah.

²⁷Chu liau chun Thudântuk Bâwm chu Bethel ah a um, Eleazar fapa, Aron tupa Phinehas chu thuneitu asi. Zapi tla nih LALPA an deih le, “Kan unau Benjamin mi tla chu kan do nawlh lai ma? Asi lo leh kan bângtâk ko lai ma?” an ti. LALPA nih a sâng le, “Do u. Thâi chu kan nehtir na lai,” a ti.

²⁸

²⁹Israel tla nih Gibeah kiangkam ah kawrsen tla chu an thuh na.

³⁰Churawhchun a veithumnâk dingchang ni ah Benjamin kawrsen tla chu an do na le, a lânah an ti mi hâwi hen tuknâk mun ah an siah na.

³¹Benjamin tla chu do ding hen an hawng suak le, khuapi thawk hen lât ual ah an kal. A lânah mi hâwi hen Israel kawrsen a zeimaw mi tla chu Bethel kalnâk lampi ah an thah le, a zeimaw mi chu Gibeah kalnâk lampi ah an thah na. Israel tla chu sâwmthum ding an thah na.

³²Benjamin tla nih, “A lân hâwitê hen kan thah na taktê fâwn!” an ti. Sikhawmsele, Israel tla nih perpet na hen khuapi ah mi chu lamlian ah khum ving kalpi na an tum.

³³Churawhchun Israel kawrsen rualpî tla chu an hawng a nâwp le, Baaltamar ah anna pûm le, Gibeah kulhtu tla chu mawhsareh hen khuapi kiang mâng ah anna thupnâk lung nâwngah mi chu an hawng suak rawh.

³⁴Israel lakah mi thîm mi hep sâng râ nih Gibeah chu an do le, tuknâk chu a fâk thlo rawh. Benjamin mi tla nih chun siat leh râwk hen an um ding mi chu an theih loh.

³⁵LALPA nih Israel tla chu Benjamin kawrsen tla nehtu ah a siam na rawh. Israel tla nih chu ni ah chun an mêlma tla sîng nih leh sângnga leh zâ an thah na le,

³⁶Benjamin tla nih neh an si rawh ti anna theih. Israel kawrsen murui tam chem tla nih Benjamin murui rangah dunglei ah anna nâwptâk le, Gibeah kiangkam ah minung an thuh mi an rinh na ruangah.

³⁷Chu minung tla chu Gibeah ah rang tak hen an tek le, khuapi ah an hawng a rek le, mikip an thah na.

³⁸Israel kawrsen murui tam chem tla leh â thup mi tla chu khatlei khatlei simh tawnhnâk an siam. Khuapi thawk hen meikhû vân leiah a kâi mi an muh rawh chun,

³⁹Israel tla chu râltuknâk mun ah mi chu an hawng a her rawh. Chu liau chun Benjamin mi tla nih Israel tla chu sâwmthum an thah ving na rawh. Anna sâwn le, “Mah rawh tu chun a lân mi hâwi hen kan neh na fâwn rawh,” an ti.

⁴⁰Churawhchun sâwn tawnhnâk a hawng lang le, khua thawk hen meikhû vân leiah a kâi taktê rawh. Benjamin mi tla chu dunglei anna her le, khuapi pumpi ah meikhû an muh rawh chun thungâi chê an ti.

⁴¹Churawhchun Israel tla chu an hawng a her le, Benjamin mi tla nih an ṭih rawh, zei ti khawm hen kan vei chiammâm rawh ti an theih ruangah.

⁴²Israel lakah mi anna nâwp le, mâng ah an tek le, sikhawmsele an âwl loh. Kawrsen a tam chem mi murui leh khuapi thawk hen an hawng suak mi kar lakah anna rêng pang le, an vei rawh.

⁴³Israel tla nih an mêlma tla chu an neh na le, dîn lo thlo hen an ṭhâwl vima le, Gibeah saklei an tleng khet, an kalnâk mun kipah an thah na.

⁴⁴Benjamin kawrsen ṭha chem mi murui sîng khat leh sâng riat an thah na.

⁴⁵A dang tla chu mâng leiah Rimon Lungpi ah an tek. Lampi ah sângnga ding an thah na. A dang tla chu Gidom leiah Israel tla nih an ṭhâwl vima le, sâng nih an thah na.

⁴⁶Chu ni ah chun Benjamin mi tla chu an ektê hen sîng nih leh sângnga an thah na. An ektê hen kawrsen râlṭha ver an ti.

⁴⁷Sikhawmsele, minung zaruk chu Rimon Lungpi leiah an tek le, an suak kho, chunah chun thla li an um.

⁴⁸Israel tla chu an kîr nawlh le, Benjamin murui dang tla zawzawng, mipa, nunau, ngâksia leh an ran tla an thah hep na. Khuapi leh a kiangkam zawzawng an duah hep.