Read Bawm Chin LÂIRÊL 21 Bible Online

LÂIRÊL 21 - Bawm Chin bible

LÂIRÊL 21

¹Israel tla chu Mizpah ah anna pûm liauah LALPA sinah thutiam bir tak an siam: “Âukhawm nih Benjamin phun tla nih umpi ding hen kan fanu siang lo ding,” an ti.

²Churawhchun Israel mi tla chu Bethel ah an va kal le, LALPA mâika ah nî tlâk tiang hen an va to. Hâu fâk tak ṭap bû hen leh thinlung ah fâk tak hen an ulh.

³“LALPA Israel Pathian, zeirangah hi hâwi thil a hawng um zia? Israel lakah mi Benjamin phun hi zeirangah a vei awt zia?” an ti.

⁴A thâituan zîng ah zapi tla nih chunah chun mâichâm an siam. Kawmhnâk bâwlnâk ah an ap le, bâwlnâk tla an duah.

⁵“Israel mi tla lakah Mizpah ah LALPA mâika ah pûm ding hen kal lo mi murui an um ma?” an ti. (Mizpah ah kal mi zawng chu thah ding asi ti thutiamnâk bir tak an nei.)

⁶Israel tla chu an unau Benjamin phun ruangah thungâi an lung a fâk, “Tusûn ni ah hin Israel nih phun pakhat chu a thlâu rawh.

⁷Benjamin phun thibang tla rangah hin nupi pêk na ding hen zeitin kan ti lai? LALPA sinah kan fanu tla pêk na lo ding hen thutiamnâk bir tak kan nei fâwn rawh,” an ti.

⁸Chu Israel phun lakah chun Mizpah ah kal lo mi an um mawh ti anna deih le, Gibeah ram ah Jabes ah um mi tla chu pakhat khawm anna tel lo ti an theih;

⁹Kawrsen min lamnâk ah Jabes mi pakhat khawm sângtu ding an um lo.

¹⁰Churuangah pumhnâk ah kal mi zapi tla nih an mi râlṭha sîng khat leh sâng nih thupêk hen an fial na, “Kal ule, Jabes mi nunau ngâksia mikip thah ver na u.

¹¹Nungâk thenhlimh cho lo chu mipa khawm nunau khawm thah hep na u,” an ti.

¹²Jabes khua ah nungâk thenhlimh zali ding an tawng, churawhchun Siloh khua riakmun ah an hawng put na, chu chu Kanaan ram ah mi asi.

¹³Churawhchun Rimon Lungpi ah um mi Benjamin tla rangah zapi tla nih thu an chah na le, tuknâk a bâng rawh ti an simh na.

¹⁴Benjamin mi tla chu an hawng kîr le, Israel dang tla nih Jabes khua mi nungâk tla an thah na lo mi chu an pêk na. Sikhawmsele anna tinh lo rih.

¹⁵LALPA nih Israel phun tla hen anna tlâinâk a sah piak na ruangah Benjamin mi tla thu ah mi tla thungâi an lung a fâk.

¹⁶Churuangah ruitu anna pûm mi tla nih chun, “Benjamin phun tla lakah chun nunau rerêng chu an um lo rawh. Adang um rih mi tla rangah zeitin nupi tla kan pêk na kho lai ne?

¹⁷Israel nih a phun leinih lakah pakhat khawm a thlâu ding asi lo. Benjamin phun a thibang tla rangah lampi kan hâwl ding asi.

¹⁸Sikhawmsele, kan fanu umpitir ding lam chu kan siang piak kho na lo, kan lakah âukhawm nih kan fanu Benjamin mi tla umpitir lo ding hen siatsirhnâk kan nei ruangah,” an ti.

¹⁹Churawhchun an hawng ruat chiam le, “Kum siar hen Siloh ah LALPA kût um tâwn mi chu a nâi thlo rawh,” an ti. (Siloh chu Bethel marlei ah um mi asi, Lebonah simlei kângah Bethel leh Sekem karah mi saklei lampi ah.)

²⁰Benjamin mi tla sinah, “Va kal ule, grep dûm ah va a thup ule,

²¹chunah chun ngâk ko u. Siloh khua mi nungâk tla kût tikah lâm ding hen an hawng suak chun grep nâwngah mi chu hawng suak u. Pakhat chiau hen nupi rangah zângran hen deih na ule, Benjamin ram ah nan sinah kalpi na u.

²²An pa mawh an unaupa mawh nan sinah an hawng hen thangsiat an phurh na chun “Zângfahtê hen hawng kan umpitir râu u, râltuknâk ah lâk mi hâwi hen kan nupi rangah kan lâk na mi asi lo. Nanmah nih hawng kan pêk mi asi lo ruangah nan thutiam nannih nih nan buar mi asi lêm lo,” nan ti kho na lai.

²³Benjamin mi tla nih chu hâwi hen an ti le, Siloh khua ah lâm mi nungâk tla chu pakhat chiau nupi rangah anna thîm le, an kalpi ving na. Churawhchun an ram leiah an kîr nawlh le, an khuapi tla an sak thar nawlh le, chunah chun an um rawh.

²⁴Chu liau chun Israel dang tla chu mikip mah phun leh mah dâwngsung leh mun chiauah an kîr rawh.

²⁵Chu liauah chun Israel tla lakah lalchem an um lo. Mikip nih mah duhzia zawng hen thil an ti.