Read Bawm Chin LÂIRÊL 3 Bible Online

LÂIRÊL 3 - Bawm Chin bible

LÂIRÊL 3

¹Churawhchun LALPA nih Israel mi tla Kanaan ram ah râltuknâk ah tel lo mi tla niknâk ding hen phun zeimaw mi chu ram lakah a siah na.

²Hi hi Israel tla thlâk kip a lânah râltuknâk ah tel dah lo mi tla rangah sîntirnâk ding hen a ti mi asi.

³Chubang ram lakah um mi tla chu Philistia khuapi panga, Kanaan mi zawzawng, Sidon mi tla leh Hiv mi tla Lebanon tlâng ah um mi Baal Hermon tlâng thawk hen Hamath Liamnâk tiang hen um mi tla zawzawng an si.

⁴Chubang tla chu Israel rangah LALPA nih Mosi mang hen an thlâktu tla sinah thu a pêk mi chu Israel tla nih an zûl ma zûl lo ti niknâk dingah an um mi asi.

⁵Churawhchun Israel mi tla chu Kanaan mi tla, Hit mi tla, Amor, mi tla, Periz mi tla, Hiv mi tla leh Jebus mi tla sinah chun an um bâk rawh.

⁶Anmah tla hen nupi pasal anna umh le, an pathian tla chu an sawnh bâk rawh.

⁷Israel mi tla nih an Pathian chu an philh le, a lakah thilsual an ti le, Baal leh Aserah lem chu an sawnh.

⁸Churawhchun LALPA chu Israel lakah a thin a thawk le, Mesopotamia ram ah mi lalchem Kusan Risathaim chu a nehtir na le, an tlûnah kum riat lâi a rêl.

⁹Churawhchun Israel tla nih LALPA chu an auh le, anmah suah na ding hen mi a fial. Chu minung chu Kaleb naupa Kenaz fapa Othniel asi.

¹⁰LALPA thlarau chu a tlûnah a hawng tlung le, Israel ruitu ah a hawng um. Othniel chu râltuk ding hen a kal le, LALPA nih Mesopotamia ram lalchem nehtu ah a siam.

¹¹A ram chu thlangam tak hen kum sâwmli ding a um le, churawhchun Othniel chu a thi rawh.

¹²Israel mi tla nih LALPA lakah thilsual an ti nawlh rawh. Churuangah LALPA nih Moab lalchem Eklon chu Israel ngâk hen chak dauh hen a siam.

¹³Eklon nih Amos mi leh Amalek mi chu a bawppi na le, Israel tla chu a neh na le, Jeriko khua tûm khuapi chu a lâk rawh.

¹⁴Israel tla chu Eklon tangah kum leiriat ding an um.

¹⁵Churawhchun Israel tla nih LALPA chu an auh le, anmah sanhtu ding hen mi a fial. Chu chu Ehud, munchekehpa, Benjamin phun a mi Gera fapa asi. Israel mi tla nih Ehud chu Moab lalchem Eklon sinah lâwmman pêk ding hen an fial.

¹⁶Ehud nih nâmsâu hâr nih nei dâwngkhat dêng sâu mi a nei. A dêm vawrhlei kângah a puan tangah a thlaih.

¹⁷Churawhchun Eklon sinah lâwmman chu a kalpi le, Eklon chu mi bit tak asi.

¹⁸Ehud nih lâwmman a pêk thluh rawh chun, lâwmman puttu tla chu in leiah a lâwitir na.

¹⁹Sikhawmsele, Ehud chu Gilgal mun kiangah mi lung ker thawk hen Eklon sinah a va kîr le, a sinah, “Bâwipa, thuthup a nan ruah ding ka nei,” a ti. Churawhchun lal nih a to-aw sinah, “Mun dangah hawng kan kaltâk u rih,” a ti. Churawhchun an suak rang.

²⁰Lalchem chu amah lâwng hen in tlûnah a pindan a dâi riangnâk ah a to le, Ehud chu nâi tek hen a sinah a va kal le, “Pathian thawk hen thuchah na sinah sim ding ka nei,” a ti. Churawhchun lalchem chu a dîr rawh.

²¹Ehud nih a vawrhlei dêm ah mi nâmsâu a lâk le, lalchem pâw chu a sunh khut rawh.

²²Nâmsâu chu a hâ hen a pil hep le, a thâu nih chun a khuh pang. Ehud nih lalchem pâw ah mi nâmsâu chu a phâwi lo, a dunglei a kê karah a tleng.

²³Ehud chu lênglei ah a suak le, in a khâr le, a renh tap le,

²⁴a kaltâk rawh. To-aw tla chu an hawng le, inkhâr renh thlir hen an muh le, sikhawmsele lalchem chu a sungah thâwdâi a dawng rih asi lai ti an ruat.

²⁵An ngâk kho rî sâwt ual an ngâk le, sikhawmsele inkhâr chu â awng lo nget rih, inkhâr renh an lâk le, an awng rawh. Churawhchun an bâwipa chu thi hen ṭuang lakah a rîl thlo rawh.

²⁶Ehud chu an ngâk karah a kal ving rawh. Lung kernâk mun a lanh le, Seirah leiah a tek ving.

²⁷Efraim tlâng ram a tleng rawh chun Israel mi tla chu tuknâk ah kal ding hen tâwtawrâwt tum hen a kawh na le, tlâng thawk hen a ṭumpi na rawh.

²⁸“Hawng ka zûl u: LALPA nih nan mêlma Moab murui neh ding hen an pêk na rawh,” a ti. Churawhchun Ehud chu an zûl le, Jordan Va kanh ding hen Moab umnâk mun chu an lâk rawh; pakhat khawm Jordan Va kanh ding hen an siang piak na lo.

²⁹Chu ni ah chun Moab kawrsen ṭha chem mi sîng râ an thah na le, pakhat khawm an suak lo.

³⁰Chu ni ah chun Israel tla nih Moab chu an neh rawh, ram lakah kum sâwmriat sung chu thlangamnâk a um.

³¹Ruitu nawlh a hawng um mi chu Shamgar, Anath fapa asi. Anih nih chun chaw sunhnâk hen Philistia mi zaruk a thah na le, Israel tla ruang a suah na bâk.