Read Bawm Chin LÂIRÊL 7 Bible Online

LÂIRÊL 7 - Bawm Chin bible

LÂIRÊL 7

¹Ni khat chu Gideon leh a mi zawzawng tla chu zîng ah an thawk le, Harod tinung va kiang ah mun an khuar. Midian tla chu an umnâk marlei kâng Moreh Tlâng kiangah tivakuam ah mun an khuar.

²LALPA nih Gideon sinah, “Midian tla neh na ding hen ka rangah na minung put a tam tuk. Anmah nih neh hen anna ruat lai le, ka thang an ṭhattir lai loh.

³Zapi tla sinah, ‘Âuzawng ṭihnâk thinlung neitu chu in leiah kîr seh, kannih chu hi Gilead tlâng ah kan um lai,’” ti hen phuang. Churawhchun sîng nih leh sâng nih an kîr le, sîng khat an um rih.

⁴Churawhchun LALPA nih Gideon sinah, “Na minung neih a tam tuk nget rih. Tiva ah kalpi na le, keimah nih ka nan thliar piak lai. Keimah nih a nan zûl ding hen ka ruat mi vial nih a nan zûl lai. Keimah nih a nan zûl lo ding hen ka ruat mi nih chun a nan zûl lai loh,” a ti.

⁵Gideon nih tiva leiah a kalpi na le, LALPA nih a sinah, “Ui hâwi hen a lei hen tî liaktu vial chu, a khûp deh hen tî dintu lakah mi chu a dang hen thlei na,” a ti.

⁶An kutza hen tî sâwk hen dintu vial minung zathum an ti; a dang vial nih khûp deh hen tî an din.

⁷LALPA nih Gideon sinah, “Midian tla nehtu ding hen nang leh minung zathum tî a liak hen liaktu tla hi kan hum na hen kan mang na awt. A dang tla chu in leiah tlung ding hen sîmh na,” a ti.

⁸Churawhchun Gideon nih thil-le-rî kiltu leh tâwtawrâwt tumtu zathum cho lo chu a kîrtir ver na. Midian tla chu anmah tangah tivakuam ah mun an khuar.

⁹Chu zân ah chun LALPA nih Gideon chu thu a pêk le, “Thawk le, va do rawh; nehtu sinâk ka nan pêk rawh asi.

¹⁰Sikhawmsele, do ding na ṭih chun na to-aw Purah hen riakmun ah va ṭum.

¹¹An thusim na theih lai le, chu tikah do ding hen râlṭhatnâk na nei lai,” a ti. Churawhchun Gideon leh a to-aw Purah chu an mêlma riakmun kiangah an va ṭum rawh.

¹²Midian tla, Amalek tla, ramkaro ah phun um mi tla chu tivakuam ah chun khâubawk rualpi hâwi hen anna dâp zat le, an sangâwngsâu tam zia chu tipi kap ah sep hâwi hen an tam.

¹³Gideon chu a va tleng rawh chun minung pakhat nih a hâwipa rangah a mang a simh mi a theih. “Ka mang leiah barley sang tlang kan riaknâk ah a hawng ril le, puanin a denh. Puanin chu a thlûk le, tual ah â phah dep,” a ti.

¹⁴A hâwipa nih a sâng le, “Israel tla nâmsâu Joash fapa Gideon ma chu! Chu lo chu zei dang khawm asi lai lo! Pathian nih Midian mi leh kan kawrsen zawzawng nehnâk a pêk mi ma chu!” a ti.

¹⁵Gideon nih chu minungpa mang a theih hen zei hâwi asi awt ti a theih rawh chun a kûn le, Pathian a sawnh rawh. Israel riakmun ah a kîr le, an sinah, “Thawk u! LALPA nih Midian kawrsen tla nehnâk an pêk na rawh,” a ti.

¹⁶A minung zathum tla chu murui thum ah a suah na le, tâwtawrâwt pakhat seng leh bêl pakhat a sungah meichêu um mi a pêk chiau na.

¹⁷Anih nih an sinah, “Riaknâk mun ka tlung rawh chun hawng ka zauh ko ule, ka ti zia zia hen ti u.

¹⁸Kei leh ka murui nih tâwtawrâwt kan tum rawh chun riakmun kiangah mi tla nih tum ule, LALPA leh Gideon rangah’ ti hen âu u!” ti hen a simh na.

¹⁹Gideon leh a minung zâ tla chu thanṭim dêngah vêngtu tla anna thleng nûntê ah riaknâk mun ah an va tleng. Tâwtawrâwt chu an hawng tum le, an bêl put tla chu an khuai le,

²⁰murui nih dang khawm nih chu hâwi hen an hawng ti bâk. An kehlei kut hen meifâr an put le, an vawrhlei kut hen tâwtawrâwt an put, “LALPA leh Gideon rangah nâmsâu!” ti hen an âu.

²¹Chun riakmun kiangah mah mun chiauah an dîr, an mêlma kawrsen tla chu râk bû hen an tek phin.

²²Gideon mi tla nih tâwtawrâwt an tum liau chun LALPA nih an mêlma kawrsen tla chu anmah leh anmah nâmsâu hen a dotir na. Zarethan leiah Bath Sittah tiang hen, Tabath kiang mi Abel Meholah khuapi tleng khet hen an tek.

²³Chun, Naphtali, Aser, Manaseh phun khingkhuai tla chu a kawh na le, Midian tla chu an ṭhâwl na.

²⁴Gideon nih Efraim tlâng zawzawng ah minung a fial le, “Hawng ṭum ule, Midian tla do na u. Jordan Va leh Bethbarah tiang hen tiva tla chu Midian tla nih kanh lo ding hen vêng u,” a ti. Efraim mi tla chu munkhat hen a kawh ver na le, Jordan Va leh Bethbarah tiang hen tiva tla chu an vêng.

²⁵Midian lal panih Oreb leh Zeeb an tleih le, Oreb chu Oreb Lungpi ah an thah, chun Zeeb chu Grep Sûrnâk Zeeb ah an thah. Midian mi tla chu an ṭhâwl vima na le, Oreb leh Zeeb lû chu Jordan saklei ah um mi Gideon sinah an put.