Read Bawm Chin LÂIRÊL 8 Bible Online

LÂIRÊL 8 - Bawm Chin bible

LÂIRÊL 8

¹Efraim mi tla nih Gideon sinah, “Midian nan do liauah zeirangah nan kan kawh bâk lo? Zeirangah hi hâwi hawng kan ti zia?” an ti. Chu lakah chun thungâi an vûirâm.

²Sikhawmsele, anih nih, “Ka ti kho mi leh nannih ti mi chu tahkhiat kho asi lo. Nannih Efraim lakah mi tâwmtê nih nan ti mi chu keimah chi zawzawng nih ti mi ngâk hen a tlâk dauh.

³Zeizawng nûnah Midian lal panih Oreb leh Zeeb chu Pathian thiltikhonâk hen an thah. Chu hen tahkhiat ding hen zei thil ka ti?” a ti. Chu thu chu a sim rawh chun an thinrun lo rawh.

⁴Chu liau lîlâ ah chun Gideon leh a minung zathum tla chu Jordan Va ah an kal le, an tan rawh. An dî thlo khawmsele an mêlma tla chu an ṭhâwl nget rih.

⁵Sukot an tleng rawh chun khuapi mi minung tla sinah, “Ka minung tla hi zângfahtê hen sang tlang hawng pêk na râu u. An dî tuktarâi rawh le, Midian lalchem tla Zebah leh Zalmuna ka ṭhâwl na mi asi,” a ti.

⁶Sikhawmsele, Sukot khua ruitu tla nih a sinah, “Zeirangah na kawrsen tla chu buh kan pêk na êu lai? Zebah leh Zalmuna nan tleih na lêm lo rih,” an ti.

⁷Churawhchun Gideon nih, “Asi ma chu! Zebah leh Zalmuna chu LALPA nih ka kut ah hawng ka pêk tikah chun ramkaro ah mi ling leh zûn lingnei tla hen kan vuak na awt!” a ti na.

⁸Gideon chu Penuel leiah a kal vima le, chunah mi tla rang khawm chu hâwitê hen a ngiar na. Sikhawmsele, Penuel ah um mi tla khawm nih Sukot mi tla hâwitê hen an sâng.

⁹Churawhchun an sinah, “Him tak leh lâwm tak hen ka hawng kîr lai le, chu tikah chun nan insâng tla ka siat dep awt!” a ti.

¹⁰Zebah leh Zalmuna chu an kawrsen tla hen Karkor ah an um. Ramkaro ah mi phun zawzawng lakah sîng khat leh sângnga cho an dam; nuaikhat leh sîng nih thah hen an um.

¹¹Gideon chu ramkaro sîr Nobah leh lokbehah saklei lampi ah a kal vima le, chê ual hen kawrsen tla chu a va do na rawh.

¹²Midian lalchem Zebah leh Zalmuna chu an tek le, khawmsele a ṭhâwl na le, a tleih na, an kawrsen tla chu a lâu tir na.

¹³Gideon chu Heres Liamnâk lampi lei hen râltuk a kal mi a hawng kîr rawh chun,

¹⁴Sukot mi tlangvâl pakhat a tleih le, thu a deih. Chu tlangvâl nih chun Sukot mi ruitu min sâwmsarih leh pasarih Gideon rangah a rîn piak.

¹⁵Churawhchun Sukot mi tla sinah a va kal le, “Nan ka ṭangpi duh lo mi kha ngâiset u! Zebah leh Zalmuna na tleih lân lo chu na kawrsen dî mi tla rangah buh kan pêk kho awt lo nan ti mi kha. Asi ma chu! Hi tla hi an si hi!” a ti na.

¹⁶Churawhchun ramkaro ah mi ling leh zûn lingnei tla chu a lâk le, Sukot khua mi ruitu tla rêpnâk ah a mang.

¹⁷Penuel khua mi insâng tla khawm a siat le, chu khuapi mi minung tla khawm a thah na.

¹⁸Churawhchun Gideon nih Zebah leh Zalmuna chu thu a deih na le, “Tabor khua ah nan thah na mi thu kha zei hâwi mesi?” a ti na. Annih nih an sâng le, “Nangmah hâwi hen lalchem fapa an bangh hep,” an ti.

¹⁹Gideon nih, “Ka unau tla, ka nu fapa tla an si. Thah na lah ule chu, an thah na lo ding hen siat ka tleih mi,” a ti.

²⁰Churawhchun a fapa upachem mi Jether sinah, “Mâilei ah va kal le, va thah na,” a ti. Sikhawmsele, chu mipa ngâksia nih chun a nâmsâu a phâwi duh lo. Ngâksia asi rih ruangah a zenh.

²¹Churawhchun Zebah leh Zalmuna nih Gideon sinah, “Nangmah tak hawng le, hawng kan thah ko me, mipa nih mah ti ding mi chu ti ding asi,” an ti. Churawhchun Gideon nih a thah na le, an sangâwngsâu tla ngâwng ah mi thuam tla chu a lâk.

²²Chu nûnah chun Israel tla nih Gideon sinah, “Kan tlûnah lâirêltu si le, na thih nûn khawmah na thlâk tla chu si vima seh. Midian lakah mi ruang na hawng kan suah dangâiah,” an ti.

²³Gideon nih a sâng le, “Nan lâirêltu ah ka um lai lo, ka fapa khawm asi lai lo. LALPA chu nan lâirêltu asi lai,” a ti.

²⁴A sim vima le, “Thil pakhat ka nan deih na lai. Mikip nih nabeh nan lâk mi kha hawng ka pêk chiau u,” a ti. (Midian mi tla chu ramkaro dangah um mi tla hâwi hen ngûn nabeh anna beh.)

²⁵Mi zapi nih an sâng le, “A nan pêk ding kan duh,” an ti. Mikip nih puan an phah le, nabeh an lâk mi chu chunah chun an siah.

²⁶An ngûn nabeh Gideon nih a tawng mi a rih chu kilogramme kul tluk dêng asi. Chu lak chun thawmhnâk, ṭhi awih mi, puan dumpâwl Midian lalchem tla nih anna aih mi rêlsih lo hen, an sangâwngsâu ngâwng ah an awihtir mi khawm rêlsih lo hen.

²⁷Gideon nih chu ngûn thawk hen milem a siam le, Ophrah khuapi ah mi a in ah a siah. Israel zawzawng nih Pathian kaltâk hen milem sawnh ding hen an kal. Gideon leh a dâwngsung rangah chun thang asi ko rawh.

²⁸Midian tla chu Israel tla nih an neh rawh le, ningṭihnâk a um lo rawh. Gideon thih lân lo chu kum sâwmli chu ram lakah thlangam tak hen an um.

²⁹Gideon chu a kîr le, amah in ah a va um rawh.

³⁰Fapa sâwmsarih a nei, nupi tamtak nei mi asi ruangah.

³¹Sekem khua khawmah nupisûn a nei le, fapa a ring piak le, a min ah Abimelek a sak.

³²Joash fapa Gideon chu tar khên hen a thi le, Abiezer chi khua Ophrah ah a pa Joash thlân ah an vûi.

³³Gideon thih nûnah chun Israel tla chu Pathian lakah zumhkâilo tak hen an um nawlh le, Baal tla an sawnh. An pathian Baal thudântuk tla an siam le,

³⁴LALPA, an Pathian, an kiangkam ah mêlma lakah ruangsuahtu rian chu an ṭuan lo rawh.

³⁵Gideon, Israel tla rangah thil ṭha zawzawng titu dâwngsungkhur sin khawmah lâwmnâk an nei lo rawh.