Read Bawm Chin LÂIRÊL 9 Bible Online

LÂIRÊL 9 - Bawm Chin bible

LÂIRÊL 9

¹Gideon fapa Abimelek chu a nu unau zawzawng umnâk Sekem khua ah a va kal le,

²Sekem khua mi tla chu “Gideon fapa sâwmsarih lakah lâirêltu ding hen an ektê hen ma an duh, asi lo leh pakhat cho nih ma? ti deih ding hen a simh na. Abimelek chu nanmah thisen leh taksa asi ti theih u,” a ti.

³A nu unau tla nih chu thâwngthâng chu Sekem khua mi tla sinah an sim piak le, Sekem khua mi tla nih chun anmah unau asi ruangah chun Abimelek chu zûl ding hen an thlûk.

⁴Baal thudântuk biakin ah mi tangka sâwmsarih an pêk le, chu tangka hen chun mi ṭhalo murui amah lei ṭângtawm ding hen a lâk na.

⁵Ophrah khua mi a pa in ah a va kal le, lung pakhat tlûnah a unau Gideon fapa tla sâwmsarih a thah na. Sikhawmsele, Gideon fapa Jotham a ngâksia chem mi chu â thup ruangah thah asi lo.

⁶Churawhchun Sekem ah mi leh Bethmillo mi zawzawng chu a rual hen Sekem ah mi oak thing thenhlimh leiah chun an va kal le, Abimelek chu lalchem ah an siam.

⁷Chu thu chu Jotham nih a theih le, Gerizim tlâng tlûnah a kal le, a va dîr le, a auh na, “Nannih Sekem mi tla, ka thu ngâi ule, Pathian nih nannih thu khawm ngâi seh!

⁸Tuan liau chun thing tla nih anmah rang dingah lalchem thîm ding hen anna pûm. Oliv thing sinah, ‘Nang kan lalchem si rawh,’ an ti.

⁹Oliv thing nih a sâng le, ‘Nannih lâirêl ding hen chun minung tla leh pathian tla rangah zahnâk rangah mang mi ka sariak suah hi ka bâng ding asi lai,’ a ti.

¹⁰Churawhchun thing tla nih theipi kûng sinah, ‘Nang hawng le, kan lalchem si rawh,’ an ti.

¹¹Sikhawmsele, theipi kûng nih a sâng le, ‘Nannih lâirêl ding hen chun thlum tak hen rah ka suah mi hi bâng ding asi lai,’ a ti.

¹²Churawhchun thing tla nih grep zûn sinah, ‘Nang hawng le, kan lalchem si rawh,’ an ti.

¹³Sikhawmsele, grep zûn nih a sâng le, ‘Nannih lâirêl ding hen chun ka uain hâng suah, pathian tla leh minung tla lawmhtirtu hi bâng a suak lai,’ a ti.

¹⁴Churawhchun thing zawzawng tla nih bualingnei sinah, ‘Nang hawng le, kan lalchem hawng si rawh,’ an ti.

¹⁵Chu bualingnei nih a sâng le, ‘Nan lalchem si ding nan ka duhtak mi asi chun hawng ule, ka thlaliah tangah a dawr u. Chu hâwi nan tilo chun ka ling ṭeng tla lakah mei a hawng alh lai le, Lebanon Tlâng ah sidar thing tla chu a kâng lai,’ a ti.

¹⁶Chu nûnah chun Jotham nih a sim vima le, “Abimelek chu lalchem ah nan siam mi kha thungâi tak leh zumhkâi tak hen nan siam mi masi? Gideon chu a thilti ruangah theihkumza leh zah hen a dâwngsung tla ṭhadektê hen nan zauhkhenh na lai ma?

¹⁷Ka pa nih nan rangah râl an do piak na mi kha theihkumza u. A pumpêk hen Midian lakah mi ruang an suah na mi kha.

¹⁸Sikhawmsele, tusûn ni ah ka pa dâwngsungkhur tla dotu nan si. A fapa tla lung pakhat tlûnah nan thah le, tu chun Abimelek a to-awnu fa chu nan unau asi ruangah Sekem khua lalchem ah nan siam.

¹⁹Asi chun ne, tusûn ni ah hin Gideon leh a dâwngsung tla sinah zumhkâi tak hen thil nan ti mi asi chun Abimelek lakah a lâwm ule, anih khawm nan lakah a lâwm bâk seh.

²⁰Sikhawmsele, chu hâwi asi lo chun Abimelek thawk hen mei hawng suak sele, Sekem leh Bethmillo ah um mi tla chu an khangh hep na seh. Chun Sekem leh Bethmillo thawk hen mei hàwng suak sele, Abimelek chu kâng hep seh,” a ti.

²¹Churawhchun Jotham chu a unaupa Abimelek a ṭih ruangah Beer ah um ding hen a tek.

²²Abimelek nih Israel tla tlûnah kum thum lâi a rêl.

²³Abimelek leh Sekem mi karah Pathian nih remlonâk a siam le, a lakah an hel.

²⁴Chu hâwi thil a hawng um mi chu Abimelek leh Sekem mi tla Gideon fapa sâwmsarih thah ding hen fawrhtu tlûnah an sual man a hawng tlung mi chu asi.

²⁵Sekem mi tla nih Abimelek chu tlâng tlûnah an bawhtir na le, chu lampi ah hawng mi tla zawng chu an rawk vima na. Chu thu chu Abimelek an simh.

²⁶Chun, Ebed fapa Gaal chu a unau tla hen Sekem ah an va kal le, Sekem mi tla nih amah chu thungâi an zumh.

²⁷An ektê hen anmah grep dûm chiauah an va kal le, grep tla chu an kawih, uain hâng an siam le, kût an mang. An pathian sawnhnâk in ah an va kal le, chunah chun Abimelek rangah tluktlak leh dehchawh bû hen an din hen an ei.

²⁸Gaal nih, “Sekem mi minung tla hi zei hâwi mi dek kan si a! Zeirangah Abimelek nâwl ko kan zulh? Zeitin mi leikâng dek asi a! Gideon fapa! Zebul nih a sin thawk hen thuneihnâk a lâk, sikhawmsele zeirangah a nâwl kan zulh? A nan thlâk natu bul Hamor lakah zumhkâi hen um u!

²⁹Hi minung tla hi rui na ding chu ka duh thlo! Abimelek lakah mi hi ka suak ving lai! A sinah hi hâwi hen ka sim awt, ‘Na kawrsen tla thupêk le, do ding hen hawng suak!’ ka ti lai,” a ti.

³⁰Zebul, chu khua lâirêltu nih Gaal thusim a theih le, a thinthawk rawh.

³¹“Ebad fapa Gaal leh a unaupa Sekem ah an hawng le, khuapi ah a nan lûttir awt lo ti” ti hen Arumah ah um mi Abimelek va simh ding hen mi tla a fial na.

³²Churawhchun tuah nang leh na mi tla chu zân ah a ṭhial ule, phâisen ah a thup u.

³³Thâizîng nî suak liauah thawk ule, khuapi chu lâkkhatko ah do sut ko u. Churawhchun Gaal leh a mi tla nanmah do ding ah an hawng suak chun a fâk kho rî hen vuak na u,” a ti.

³⁴Churawhchun Abimelek leh a mi tla chu zân ah anna ṭhial le, Sekem khua lênglei ah murui li ah anna suah le, anna thup.

³⁵Abimelek leh a mi tla nih Gaal a hawng suak mi an muh rawh chun anna thupnâk ah mi an hawng suak le, kulh kawtkâ ah a va dîr.

³⁶Gaal nih a muh na le, Zebul sinah, “Zauhnik! Tlâng tlûn thawk hen minung tla an hawng ṭum!” a ti. Chun, Zebul nih, “Minung an silo, tlâng thlaliah ma khi a,” ti hen a sang.

³⁷Chun, Gaal nih, “Zauhnik! Tlâng tlûn thawk hen minung an hawng ṭum, murui khat chu vânṭhatnâk simtu oak thing thawk hen lampi an hawng kal liau chir asi,” a ti nawlh.

³⁸Churawhchun Zebul nih a sinah, “Na hawlh tla kha tuah zeiah? Zeirangah Abimelek nâwl kan zulh lai titu pakhat chu nangmah na si. Hi bang tla hi na zauhnawmh na mi an si. Tuah suak le, va do na,” a ti.

³⁹Gaal nih Sekem mi tla chu Abimelek do ding hen a kalpi na rawh.

⁴⁰Gaal chu a tek le, Abimelek nih a ṭhâwl. Cherkhet anna liam, khuapi kulh kawtkâ lak khawmah anna liam.

⁴¹Abimelek chu Arumah ah a um le, Zebul nih Gaal leh a unau tla Sekem ah an um mi tla chu a suah na le, a nar ving na; chunah chun an um kho lo rawh.

⁴²A thâituan ah chun Abimelek nih Sekem mi tla chu phâisen leiah kal ding an tum mi a muh na le,

⁴³a mi tla a put na le, murui thum hen a suah na le, phâisen ah a thuptir na le, an ngâk na ko. Khuapi ah mi minung an hawng suak mi a muh na rawh chun anmah thah ding hen anna thupnâk ah mi chu an hawng suak rawh.

⁴⁴Abimelek leh a murui tla, kulh kawtkâ vêng ding hen an va tek liauah a dang murui nih tla nih zapi tla chu phâisen ah an do na le, an thah hep na.

⁴⁵Donâk chu nî tlâk hen anna tâwk. Abimelek nih khuapi chu a lâk le, minung tla a thah na; a râwk ver le, tual chu chitê a vawrh dep.

⁴⁶Sekem ah ruitu tla nih chu thu chu an theih rawh chun, Baal thudântuk umnâk biakin kulh sungah himnâk an hâwl rawh.

⁴⁷Chunah anna pûm mi chu Abimelek an simh rawh.

⁴⁸A minung tla hen Abimelek chu Zalmon tlâng ah a kâi. Chunah chun reitlung a lâk le, thing ṭeng tla chu a thlangh le, a liang hen a put. A mi tla chu mawhsareh hen chu hâwi hen bang ver ti ding hen a simh na.

⁴⁹Churawhchun mikip nih thing ṭeng chu an thlangh le, Abimelek chu an zûl le, kulh kawtkâ lakah an pawng. A sungah mi minung tla an duah khumh na le, kulh sungah mi minung nunau leh mipa sâng ding an thi.

⁵⁰Churawhchun Abimelek chu Thebez khua ah a kal le, chu khuapi chu an kulh le, an lâk.

⁵¹Chunah insâng bir tak a um le, mikip nunau leh mipa ruitu tla hen chunah chun an tek rawh. Anna renh sih pang le, in tlûn leiah an kâi hep.

⁵²Abimelek chu in sung lakah mi do ding hen a hawng le, duah ding hen kawtkâ leiah a va kâi.

⁵³Sikhawmsele, nunau pakhat nih fâng rialnâk lung a thlâk nawh le, a luruh a kuai phet.

⁵⁴Mawhsareh hen a râlthuam puttu tlangvâl chu a auh le, “Na nâmsâu kha phâwi le, hawng ka thah. Nunau nih thah mi si ding ka duh lo,” a ti. Churawhchun tlangvâl nih a sunh le, a thi rawh.

⁵⁵Chun, Israel tla nih Abimelek a thi mi an muh rawh chun an tlung hep.

⁵⁶Hi hâwi hen Abimelek chu a pa duh lo zia thilti hen a unau sâwm sarih a thah na mi lehrûl chu Pathian nih a sam rawh.

⁵⁷Gideon fapa Jotham nih hawlh siat a barh na hâwi hen Sekem khua minung tla khawm chu Pathian nih lehrûl sam hen an sualnâk ruangah an tuar rawh.