Read Bawm Chin 2 JOHAN 1 Bible Online

2 JOHAN 1 - Bawm Chin bible

2 JOHAN 1

¹Upa nih chun Nunau Pathian thîm mi, ka dâwt ngâi mi leh a fa tla sinah, kei cho silo hen,

²thudik theihtu zawzawng, thudik ruangah kan sinah an um mi leh zungzâl tiang hen kan sinah an um ding mi tla khawm nih a nan dâwt na asi.

³Pa Pathian chu Fapa Jisu Krist sin thawk hen, zângfahnâk tla, khuaruatnâk tla, remnâk tla, thudik leh dâwtnâk tla nan sinah um seh.

⁴Pa thawk hen thupêk kanna ting hâwi hen, na fa tla thudik ah an um mi ka muh ruangah thungâi ka lâwm asi.

⁵Nunau: na sinah thupêk thar hâwi a rîn silo hen, a tîr thawk hen kan nei mi hâwi a rîn dauh hen, kanna zângfah tawnh ding hen ka rîn asi.

⁶Pathian thupêk hâwitê kan um ding mi chu asi, zângfahnâk ka ti mi chu. Thupêk a tîr thawk hen nan theih rawh mi chu hi hi asi, zângfahnâk ah nan um ding mi chu asi.

⁷Perpettu tamtak, Jisu Krist chu laikulh ah hin taksa hen a hawng kal ti lotu tla kha an hawng suak rawh dangâiah, chun, chu tla chu Krist Mêlma leh mi bumtu lian tak an si.

⁸Kan ṭuan san kha nan thlâu lonâk ding hen, a man kim tak hen nan tawng khonâk ding hen a vêng u.

⁹Âuzawng Krist sîntirnâk thu ah um lo hen a lei a kaih chun Pathian a nei lo. Âuzawng chu sîntirnâk ah a um asi chun Pa leh Fapa a nei vevê asi.

¹⁰Âuzawng chu hâwi sîntirnâk thu chu hawng put lo hen nan sinah hawng sele, nan in ah tlungtir lah u, hawlhkâ ṭha hen khawm thlah lah u,

¹¹hawlhkâ ṭha hen thlahtu chu a thilsual ti lakah chun â tel bâk asi.

¹²Nan sinah thu tamtak sim ding ka nei ruangah lasui leh lasui hâng hen rîn ka duh lo le, kanna lâwmnâk a rangtling khonâk ding hen nan sinah hawng kal hen mâitawnh hen an sawnh na ding ka lungum dauh.

¹³Nan Unaunu thîm mi fa tla nih chibai an bûk na.