Read Bawm Chin JUD 1 Bible Online

JUD 1 - Bawm Chin bible

JUD 1

¹Jud, Jisu Krist to-aw leh a unaupa Jem nih chun-Pa Pathian zângfahnâk leh Jisu Krist kilkâwinâk ah um mi, kawhmi tla sinah chun:

²Khuaruatnâk tla, remnâk tla, dâwtnâk tla nan tlûnah pungtir hen um seh.

³Duhtak le tla, kanna ting chiau mi ruangsuahnâk thu nan sinah rîn ka tum liauah, mi thenhlimh tla sinah lungnâk veikhat pêk rawh mi thu ah lungnâk ruangah raltuk ding hen an fawrh na ding hen nan sinah lasuikuat rîn ding hen a herh ti ka theih.

⁴Pathian thu lunglo tla a thup hen kan sinah an hawng lai le, Pathian zângfahnâk thu chu râwk hen anmah duhzia a um tum hen Jisu Krist kan Lal leh Hotu an duh lo, hi mawh hen an um ding mi tla hi a lân thawk hen Pathian lasui thu nih a sim ving rawh asi.

⁵Hi bang tla hi a ektê hen theih ver khawm ule, Lalpa nih chun Aigupta ram thawk hen Israel tla chu ruang a suah na le, chu nehnûn ah lunglotu tla chu a veihtir na zia an theihtir nawlh na ding ka duh.

⁶Vânmifial anmah thuneihnâk tâwk ri duhlo hen, an mun kaltâktu tla chu, mawhtir hen an umnâk ding Ni rokual tak rangah zungzâl chikchîn hen Pathian nih phuar hen mûi ah a siah na mi chu theihkumza u.

⁷Sodom leh Gomorah leh a kiangkam mi khua ah an um mi tla nih, vânmifial tla hâwi hen hurnâk leikâng thil ti hen kalsualtu tla chu fiang tak hen simh an si hâwi hen zungzâl mei lakah rêp an si mi kha theihkumza u.

⁸Chu hâwi ber hen, hi bang minung tla nih hin langhtirnâk tla an nei le, chu nih chun an taksa lakah sualnâk a tlungtir le, tlûnlei mi rokualnâk chu an siarlo le, Pathian thuneihnâk khawm an zauhnawmh asi.

⁹Mikael vânmifial chungnungchem men kha, Mosi ruak thu ah anna êl liau khan, Diabol tlûnah thu rêl piak hen mawh a phurhtir ngam lo le, “Lalpa nih a nan fâi dauh seh a ti.

¹⁰Chu tla nih chun thu an theih lo mi tla chu an simsiat le, dawnruatnâk nei lo, ram sa tla hâwi hen, theihnâk anna suakpi mi nih chun anmah tla a râwk na.

¹¹An tlûn a pit! Kain lampi chu an zûl le, lawh uh hen Balaam sual lampi chu an zûl le, Kora a hel mi hâwi hen an hel le, amah hâwi hen veih hen an um rawh.

¹²Buh nan einâk ah annih tla chu nâwmtâm â buaih mi hâwi an si le, an zû rîtnâk ningzak theihlonâk hen, mah kawngkâ cho ruattu an si; vândâwm ruahtî a um lo mi thli nih a ranh mi hâwi an si, thing, tharvâng liau khawmah a rah lo mi hâwi leh thing a ram hen â phâwi zek le, a thi thlo mi hâwi an si.

¹³Tipi tlingtlawk hâwl hen an um le, an thilti ningzakkâi tak chu a phul mi hâwi an si, ârfi a vâi lemang mi hâwi an si le, Pathian nih an rangah mûi thûk tak a siah piak na mi tla an si.

¹⁴Adam thawk hen san sarihnâk Enok nih chun chubang tla thu chu hun sâwt tak thawk hen a simkan rawh asi, “Ngâinik u, Pathian lunglotu tla nih an thilti leh an thusim ṭihnungkâi tak leh Pathian an simsiat ruangah, lâirêl ding hen Lalpa chu a vânmifial thenhlimh sâng tamtak hen a hawng awt,” ti hen.

¹⁶Chubang tla chu chipchiartu leh mi simsâwitu tla an si le, anmah duhnâk hâwi vima hen an um le, an kâ hen khâwngnâk thu dawh lo tak an sim le, anmah siremnâk cho tawng ding hen mi an sunhsak na tâwn.

¹⁷Sikhawmsele, duhtak le tla, nannih lam nih chun kan Lalpa Jisu Krist mifial tla nih thu an sim mi tla kha theihkumza u,

¹⁸“Tik madung ah chun, Pathian sunhsaklo leikângah, mah duhnâk hâwi vima a um hen, zauhnawmhtu tla an hawng um lai,” ti hen nan sinah ka sim rawh kha.

¹⁹Chu tla chu, taksa mi, Thlarau ah um lo mi, murui dang siamtu tla an si.

²⁰Sikhawmsele, ka unau duhtak le tla, nan lungnâk thenhlimh ah chun mah leh mah a dirh hen um ule, Thlarau Thenhlimh thiltikhonâk hen um u.

²¹Kan Lalpa Jisu Krist nih a khuaruatnâk ruangah zungzâl nungnâk a nan pêk na mi chu ngâk hen Pathian zângfahnâk ah chun a kil u.

²²Mi, zumhmaihnâk neitu tla chu lungkham na u.

²³Mei lakah an um mi tla chu ruangsuah na ule, an nipuan an duhnâk sual nih a nawmh rawh mi tla chu fih hen, an tlûnah ṭih bû hen zângfahnâk langhtir u.

²⁴Chun, nan tlû lonâk ding hen an vêng na khotu leh rokualnâk ah lâwptlo tak hen leh nâwmtâm kawp lo hen an siah na khotu,

²⁵kan Lalpa Jisu Krist zârah ruang hawng kan suahtu Pathian sinah cho chun, tik a lan rawh mi leh tuah leh zungzâl tiang hen, chawnglawmhnâk tla, rokualnâk tla, thuneihnâk tla a sinah um seh! Amen.