Read Bawm Chin RUTH 2 Bible Online

RUTH 2 - Bawm Chin bible

RUTH 2

¹Naomi nih taksa tlâi Boaz minei leh mi thiltikho tak a pasal Elimelek unau a nei.

²Ni khat chu Ruth nih Naomi sinah, “Fângât ding hen phâisen ah hawng ka kaltir, an sinah rianṭuannâk tawng kho ding ka lungum,” a ti. Naomi nih a sâng le, “Ka fanu, hâwi lânah va kal rawh,” a ti.

³Churawhchun Ruth chu phâisen ah a va kal le, rianṭuantu tla dunglei ah a va kal le, fâng an mâk mi chu a sar vima le, chu phâisen a umnâk chu Boaz tâ asi.

⁴A nehnûnah chun Boaz khawm chu Bethlehem thawk hen a hawng le, rianṭuantu tla chu chibai a bûk na, “LALPA nan sinah um seh,” a ti na. Annih nih an sâng le, “LALPA nih mal an sâwm seh,” an ti.

⁵Boaz nih rianṭuan hotu chu a deih le, “Nungâk nu khi âu me si?” a ti.

⁶Anih nih, “Ramdang mi nungâk, Naomi a hawng kîr mi sinah a hawng bâk mi ma khi a!

⁷Rianṭuantu tla dunglei ah kal hen fâng sar ding hawng ka deih le, zîngtê thawk hen rian a ṭuan le, tuah dinh kartê ah dawrnâk tangah â dîn mi asi,” a ti.

⁸Churawhchun Boaz nih Ruth sinah, “Thu tâwm kan simh lai, hi phâisen ah cho lo chun mun dangah fâng sar lah. Hinah mi minung tla sinah ṭuan bâk ko.

⁹Zauh ko na le, an ât chun an ât nâk mun ah um vima bâk ko, ka minung tla khawm zeitin khawm an ti lo ding hen ka simh na rawh. Na tî a hâl chun bêl ah an than chia din bâk ko,” a ti.

¹⁰Ruth chu a buk le, a mêl tual tawngh khet hen a kûn le, Boaz sinah, “Zei zia me titi na hawng ka lungkham? Ramdang mi minung tlûnah hi tluk ṭhat na suah?” a ti.

¹¹Boaz nih a sâng le, “Na pasal a thihnâk thawk hen na ninu tlûnah thil na ti dân ka theih. Na pa leh na nu, na ram mâk hen na theih dah lo mi minung tla sinah na hawng mi khawm ka theih.

¹²Na thilti ruangah LALPA nih lâwmman a nan pêk seh, a nan humtu si ding hen Israel LALPA Pathian na hawng fûk mi nih lâwmman tling tak a nan pêk seh,” a ti.

¹³Ruth nih a sâng le, “Pu, ka tlûnah thungâi vêl na nei. Na aw nêm tak hen na hawng ka sawnh mi nih ka thinlung a damtir thlo, kei chu na to-aw pakhat khawm ka tluk mi a um lo,” a ti.

¹⁴Buh ei hun rawh chun Boaz nih Ruth sinah, “Hawng le, sang hawng ei bâk, uain thar ah nîm bâk,” ati. Churawhchun rianṭuantu tla sinah a to bâk le, Boaz nih sang em mi a pêk bâk; khim tak hen a ei le, a eibang a lei ngengê.

¹⁵Fâng sar ding hen a kal awt rawh chun Boaz nih rianṭuantu tla chu thu a pêk na le, “Fângtêl khawm kha sartir ule, chu lo khawmah a têl lakah mi nûk ule, a sar ding hen mâk piak u,” a ti.

¹⁷Ruth nih phâisen mi fâng chu zânlei tiang hen a khawk le, a khawk dih rawh chun kilogramme râ ding a tawng.

¹⁸In ah a tlungpi le, a ninu sinah a tawng zat a zauhtir. A ninu sinah sûn ah a eibang buh khawm a pêk bâk.

¹⁹Naomi nih a sinah, “Hi bang zawzawng hi zeiah na sar mi? Âu phâisen ah me na va ṭuan? Nangmah a nan sunhsaktu chu Pathian nih malsâwm seh,” a ti. Churawhchun Ruth nih Boaz phâisen ah a ṭuan mi chu a simh rawh.

²⁰“LALPA nih Boaz chu malsâwm seh,” a ti. “A thi mi leh a dam mi sinah LALPA nih a thutiam chu theihkumza seh,” a ti. Thu a sim vima, “Kanmah hawng kan kilkâwitu lakah mi unau asi ma chu a!” a ti.

²¹Ruth nih, “Thu ṭha tak hen fângât dih tiang hen sar bâk,” a hawng ka ti.

²²Naomi nih Ruth sinah, “Asi, ka fanu, Boaz phâisen ah mi nunau tla sinah rian na ṭuan mi chu a ṭha khun asi, midang phâisen ah va kal le chu nehsawh lebang na tawng lai,” a ti.

²³Churawhchun Ruth nih chun barley leh fângât dih tiang a ṭuan bâk, a ninu in ah chun a um vima.