Read Bawm Chin RUTH 4 Bible Online

RUTH 4 - Bawm Chin bible

RUTH 4

¹Boaz chu kulh kawtkâ topumhnâk ah a va kal le, chunah chun a va to bâk. Churawhchun Elimelek taksa tlâi naih chemtu Boaz nih a sim mi khawm chu a va kal bâk le, Boaz nih a sinah a kawh, “Kâwipa, hawng le, to bâk,” a ti. Churawhchun a va kal le, a to bâk.

²Boaz nih chu khua mi ruitu parâ a kawh le, to bâk ding hen a sâwm na.

³An to ver rawh chun a unaupa sinah, “Tuah Naomi chu Moab ram thawk hen a hawng kîr le, kan unaupa Elimelek phâisen zuar ding a duh le,

⁴chu thu chu nangmah lakah â ngauh hen ka ruat, tuah na duh mi asi chun hinah to mi tla mâika ah châwk rawh, na duh lo khawmsele ka duh lo ti hen sim le, sikhawmsele ting sanghtu chu a masa hen nang na si, na duh lo asi chun kei ka si lai,” a ti. Chu pa nih chun, “Ka châwk lai ta a!” a ti.

⁵Boaz nih, “A ṭha ma chu, Naomi sinah mi phâisen na châwk asi chun, Moab numeinu Ruth khawm na châwk sih ding asi. Chu tikah phâisen chu a thi mi pa dâwngsung tâ asi vima ko lai,” a ti.

⁶Chu pa nih chun a sâng le, “Chu hâwi asi chun phâisen chu ka châwk kho awt lo, ka fa tak nih anna ting kho awt lêm lo. Kei ngâk hen nangmah lehlam châwk ko,” a ti.

⁷Chu liau san ah chun thil zuar leh thil thleng thu thlûk dân chu a zuartupa nih a châwk piaktupa sinah a pheikawk lît hen a pêk ding asi. Hi hâwi hen Israel tla nih thu an thlûknâk dân chu asi.

⁸Churawhchun chu minungpa nih Boaz sinah, “Châwk ko,” a ti le, a pheikawk a lît le, Boaz sinah a pêk.

⁹Boaz nih chun ruitu leh midang sinah, “Tusûn ni ah Naomi thawk hen Elimelek tâ leh a fa tla Chilion leh Mahlon thil-le-rî ka châwk mi thu ah hin theihpitu nan si.

¹⁰Chu lâwng khawm silo hen, Ruth, Moab nunau, Mahlon nupi khawm chu ka nupi asi rawh. Hi nih a thi mi pa dâwngsung thil-le-rî chu a kilkâwi lai le, a dâwngsung thlâk tla chu a khua lakah a mi le tla sinah a um vima lai; chubang lakah chun tusûn ah theihpitu nan si.

¹¹Chubang ruitu tla leh midang tla nih chun, “Theihpitu kan si, na nupi chu Rakel leh Leah nih Jakob rangah fa tamtak an ring piak mi hâwi hen LALPA nih siam seh, nang khawm Ephrath chi lakah Bethlehem khua ah chun minei si hen na min thang seh.

¹²Hi nungâk lakah hin LALPA nih a fa tla a nan pêk ding mi chu Tamar nih Juda rangah a ring piak mi Perez dâwngsung hâwi si seh,” an ti.

¹³Boaz nih Ruth chu a nupi rangah a lâwipi rawh. LALPA nih Ruth chu mal a sâwm le, a râi le, fapa a ring.

¹⁴Nunau tla nih Naomi sinah, “Nangmah zauhkhenhtu dingah tupa a nan pêktu LALPA chu sawr hen um seh! Israel lakah ngâksia chu a min thang seh!

¹⁵Na monu nih a nan dâwt le, fapa pasarih thilti ngâk a fâk hen thil a nan ti piak rawh. Tuah tupa a nan pêk le, anih nih nungnâk thar a nan pêk lai le, na tar leikângah thlangamnâk a nan pêk lai,” an ti.

¹⁶Naomi nih chun chu ngâksia chu a pawm le, a zauhkhenh rawh.

¹⁷Nunau a zâwlbâwm mi tla nih Obed ti hen a min an sak piak. “Naomi rangah fapa a hawng suak,” ti hen mikip an simh na. Obed chu David ringtu Jese pa asi.

¹⁸Hi Perez thawk hen David tiang dâwngsung thlâk dân asi: Perez, Hezron, Ram, Aminadab, Nason, Salmon, Boaz, Obed, Jese, David.