Read Bawm Chin 1 SAMUEL 13 Bible Online

1 SAMUEL 13 - Bawm Chin bible

1 SAMUEL 13

¹Saul nih minung sâng thum a thîm na le, sâng nih chu Mikmas leh Bethel tlâng ram ah amah sinah a siah na. Chun sâng khat chu Benjamin ram Gibeah ah Jonathan sinah a fial na. Chun a dang vial chu Saul nih in leiah a tlungtir na.

³Jonathan nih Philistia ruitu Geba ah a thah le, chu chu Philistia tla nih an theih rawh. Churawhchun Saul nih Hebrai tla chu tâwtawrâwt tum hen râltuknâk ah kawh na ding hen mi a fial na.

⁴Saul nih Philistia hotu a thah ruangah Philistia tla nih an hua na rawh ti Israel zawzawng tla nih an theih rawh. Churuangah zapi tla nih Saul rangah bawp ding hen Gilgal ah anna pûm.

⁵Philistia tla chu Israel tla do ding hen anna pûm le; râltuknâk kari sâng sâwmthum an nei, rang tlûn to mi sâng ruk an nei, kawrsen dang tla khawm chu tipi kapah sep zat hen an tam. Mikmas ah an va kal le, Bethavan saklei asi, chunah chun mun an khuar.

⁶Churawhchun, Israel tla hen donâk fâk tak an nei le, lungdawng kâi tak hen an siah na. Israel tla chu khur leh pûk ah anna thup, a zeimaw mi chu lungpi leh khursaduap leh tikhurchawh lakah anna thup,

⁷a dang tla chu Jordan Va Gad leh Gilead an kanh. Saul chu Gilgal ah a um ko rih le, a sinah um mi tla chu ningṭih ruangah an thir ko rawh.

⁸Samuel nih a simh mi hâwi hen Samuel rangah ni sarih a ngâk le, sikhawmsele Samuel chu Gilgal ah a hawng lo nget rih. Zapi tla nih an tektâk lemang rawh le,

⁹churuang chun an sinah, “Duah mi leh kawmhnâk bâwlnâk hawng ka put u,” a ti na. Churawhchun bâwlnâk duah mi chu a ap le,

¹⁰a lîm lântê ah Samuel chu a hawng tlung. Saul chu va a tawng ding hen a suak le, a va lawmh.

¹¹Sikhawmsele, Samuel nih, “Zei thil me na ti?” a ti. Saul nih a sâng le, “Mi nih an ka kaltâk awt ver le, nang tâ nih ka hawng lai na ti mi hâwi hen na hawng fâwn lo, chu lo khawmah Philistia mi tla chu Mikmas ah anna pûm rawh.

¹²Churuangah Philistia mi tla nih Gilgal ah an hawng ka do awt rawh ti ka ruat le, churuangah LALPA sunhsaknâk chu ka ngâk kho lo rawh, churuang chun keimah nih bâwlnâk chu ap ding asi ko lai rawh ma hi,” ti hen ka ruat.

¹³Samuel nih a sâng le, “Chu hâwi thilti chu ât a kâi tuk,” a ti. LALPA nih thu a nan pêk mi hi na zûl lo ma hi. Zûl le chu Israel tla tlûnah na damsung zawng lâirêltu ah a nan umtir ding mi.

¹⁴Sikhawmsele lâi na rêlnâk hi a um kumza ding asi lo, thu na ngâi lo ruangah LALPA nih a minung tla lâirêltu ding mi a hâwl awt,” a ti.

¹⁵Samuel nih Gilgal chu a kaltâk le, a kalnâk ding leikângah a kal rawh. Midang zawzawng tla nih a kawrsen bawp ding hen an zûl Gilgal thawk hen Benjamin ram ah mi Gibeah ah an kal. Saul nih a kawrsen tla a rêl na le, zaruk ding an si.

¹⁶Saul, a fapa Jonathan leh an minung tla chu Benjamin ram ah Geba ah mun an khuar, Philistia mi tla chu Mikmas ah mun an khuar

¹⁷Philistia tla chu an riakmun thawk hen murui thum anna suah le, tuk ding hen an kal, murui khat chu Shual ram ah mi Ophrah ah an kal,

¹⁸a dang chu Beth Horon ah an kal, a dang tla chu Zeboim leh ramkaro kuam ramri tlûn leiah an kal.

¹⁹Israel ram ah nâm dêngtu rêng a um lo, Philistia tla fei leh nâmsâu tla an dêng sual lai ti an vêng thlir ruangah.

²⁰(Israel tla chu an phâisen nâwnnâk tla, kudal, reitlung, thîrṭhulh tla tâttir ding hen Philistia mi tla sinah an kal tâwn.

²¹Reitlung tât man tangka khat, phâisen nâwnnâk chawpe liangbat remhnâk ding tangka khat, phâisen nâwnnâk zum tâtnâk tangka nih.)

²²Chu tuknâk ni ah chun Saul leh a fapa Jonathan cho lo chu âukhawm fei leh nâmsâu an nei lo.

²³Philistia tla nih chun Mikmas Liamnâk vêngnâk ding hen kawrsen an fial.