Read Bawm Chin 1 SAMUEL 15 Bible Online

1 SAMUEL 15 - Bawm Chin bible

1 SAMUEL 15

¹Samuel nih Saul sinah, “Keimah hi Israel tla lalchem si ding hen sariak a nan thuh ding hen LALPA fial mi ka si. Tuah LALPA zeizawng tikho thusim chu ngâinik,

²Israel mi thlâktu tla Aigupta ram thawk hen an hawng liauah an do na ruangah Amalek mi tla chu LALPA nih a rêp na awt.

³Kal le, Amalek mi tla chu do na le, an neih zawzawng râwk piak phin na. Zei thil khawm zuah lah le, mipa tla, nunau tla, ngâksia tla, fasêm tla, ranrual tla, sangâwngsâu tla, sanatung tla an ektê hen thah hep na,” a ti.

⁴Saul nih a murui tla a pumh na le, Talem ah a zauhdik na. Israel lakah mi kawrsen nuai nih leh Juda lakah mi sîng khat an si.

⁵A mi tla hen Amalek khuapi leiah chun an kal le, tî kang va ah an bawh na,

⁶Saul nih Kenit mi tla chu thlâktu tla, Aigupta ram thawk hen an hawng liauah zângfahtu an si ruangah thu a simhkan na: “Amalek sinah mi a dang hen a thlei u, ka nan thah sih na lonâk ding hen,” a ti, Churawhchun Kenit tla chu anna thlei rawh,

⁷Saul nih Amalek mi tla chu a neh na le, Aigupta saklei ah Havilah thawk hen Sur tiang anna do,

⁸Agag Amalek lalchem chu a nung hen an tleih le, midang zawzawng tla chu an thah hep na,

⁹Sikhawmsele, Saul leh a mi tla nih Agag nungnâk chu an zuah le, dawrâ rual lakah a ṭha chem mi tla leh ranrual lakah a ṭha chem mi tla, chawlâ leh dawrâ fa tla, a ṭha ṭha mi tla, thil dang a ṭha ṭha mi tla an zuah, mang tlâklo leh dodar lo mi cho an râwk.

¹⁰LALPA nih Samuel sinah,

¹¹“Saul lalchem ah ka siam mi chu thungâi ka sîr, kâng dang leiah âwn hen ka thupêk a ngâi lo,” a ti. Samuel chu a thinthawk le, zân khuadei hen LALPA sinah a ngiar.

¹²A thâizîng zîngtê ah Saul hâwl ding hen a kal rawh. Saul chu Karmel khuapi ah a kal le, chunah chun amah theihkumzanâk ding hen lung a phun le, Gilgal leiah a kal rawh.

¹³Samuel chu Saul dawng ding hen a va kal le, Saul nih Samuel rangah mâi a mûk le, “LALPA nih mal an sâwm seh! LALPA nih thu hawng ka pêk mi hâwitê hen ka ti,” a ti.

¹⁴Samuel nih, “Asi chun, ranrual bût hâu leh dawrâ a bê mi hâu zeitin ka theih zia ne?” a ti.

¹⁵Saul nih a sâng le, Ka minung tla nih Amalek mi tâ an lâk mi asi, LALPA na Pathian sinah bâwlnâk rangah ap ding hen a ṭha mi vial chu an zuah le, a dang chu an veih hep a ti.

¹⁶“Ngâi rih,” ti hen Samuel nih thu a pêk le, “Mazân zânah LALPA nih ka sinah thu a sim mi kan simh lai,” a ti. Saul nih hawng ka simh ko me,” a ti.

¹⁷Samuel nih, “Nangmah chu zeikhawm silo ah a ruat khawm le, Israel phun ruitu na si, Israel lalchem si ding hen LALPA nih sariak a nan thuh le,

¹⁸Amalek misual tla chu veih hep ding hen thupêk hen an fial mi na si. Thah hep tiang do na ding hen simh na si.

¹⁹Chu hâwi mi lakah zeirangah LALPA thu na ngâi lo zia? Zeirangah thil-le-rî tla chu na lâk hen LALPA chu a lung na sitir lo zia? “a ti.

²⁰Saul nih chun, “LALPA thu ka ngâi asi. A hawng ka simh ziatê hen ka kal le, Agag lalchem khawm ka tlungpi le, a dang Amalek mi tla chu ka thah na.

²¹Ka mi tla nih dawrâ a ṭha ṭha mi leh ranrual a ṭha mi tla chu thah lo hen an lâk le, LALPA, na Pathian sinah bâwlnâk ap dingah Gilgal ah an hawng put,” a ti.

²²Samuel nih, “LALPA nih ê-aw ngâi ma a duh dauh, bâwlnâk ma? Amah sinah dawrâ ṭha leh ranrual ṭha hen bâwlnâk ngâk hen a lakah ê-aw ngâi a ṭha dauh asi.

²³A lakah helnâk hi dâwithiam hen a bang le, lungkhungnâk hi milem sawnh tluk hen a sual. LALPA thu na ngâi lo ruangah lalchem si ding an duh lo rawh,” a ti.

²⁴Saul nih chun, “Asi ngâk, ka sual asi, LALPA thupêk leh na thusim ka ngâi lo ngâk. Ka mi tla nih an duh duh hen thil an ti mi thungâi hen a pawi.

²⁵Sikhawmsele tuah ka nan ngiar asi, ka sual a ngaihzia hawng ka thiam piak le, ka sinah Gilgal ah hawng kîr nawlh râu rawh, LALPA chu ka sawnh khonâk ding hen,” ti hen a sâng.

²⁶Samuel nih, “Na sinah ka hawng kîr ding asi lo, LALPA thupêk chu na duh lo le, anih khawm nih Israel lalchem rangah a nan duh bâk lo,” a ti.

²⁷Churawhchun Samuel chu kal ding â tim le, sikhawmsele Saul nih a kawrdawh fual lakah a tleih le, a tlêk hung.

²⁸“LALPA nih Israel ram chu na sinah mi chu a thlêk le, nangmah ngâk hen a ṭha a dauh mi sinah a pêk rawh.

²⁹Israel lakah thuneitu Pathian chu a âwkrâwl awt lo le, a thu khawm a lêt lai lo. Minung asi lo ruangah a thinlung a lêt ding asi lo,” a ti.

³⁰Saul nih a sâng le, “Ka sual ngâk asi, sikhawmsele, Israel mi le ruitu zawzawng mâika ah na khuaruatnâk tâwmtal hawng ka muhtir. Ka sinah hawng kîr nawlh le, LALPA na Pathian chu ka sawnh nawlh khonâk ding hen,” a ti.

³¹Churawhchun Samuel chu a sinah Gilgal leiah a kîr le, Saul nih LALPA chu a sawnh rawh.

³²Samuel nih, “Agag lalchem kha ka sinah hawngpi u,” ti hen thu a pêk. Agag chu ṭih ruangah thir bû hen, fâk tak hen a thi awt mi theih bû hen a va kal!

³³Na nâmsâu nih nu tamtak fa lo hen a siam na mi hâwi hen tuah na nu khawm fa nei lo hen a um lai,” a ti le, Agag chu Gilgal ah mi mâichâm kiangah a tuk dip.

³⁴Churawhchun Samuel chu Ramah leiah a kal le, Saul chu Gilgal mi a in leiah a tlung rawh.

³⁵Samuel damsung vial chu lalchem hen anna muh lo rawh. Samuel chu Saul ruangah thungâi a lawksawng. LALPA khawm nih Israel lakah lalchem a ruat mi thungâi pawi a ti.