Read Bawm Chin 1 SAMUEL 18 Bible Online

1 SAMUEL 18 - Bawm Chin bible

1 SAMUEL 18

¹Saul leh David nih thu an ruat mi chu an lîm rawh. Saul fapa Jonathan leh David chu thungâi an thinlung â tawng le, Jonathan nih David chu amah taksa a dâwt mi hâwi hen a dâwt.

²Saul nih David chu chu ni thawk hen a in ah a umtir le, a in leiah a tlungtir siang lo.

³Jonathan nih David chu a thinlung a tawng tuktarâi ruangah hâwikawmh bir tak si ding hen thu a tiamh.

⁴Jonathan nih a kawrdawh fual chu a lît le, David rangah a pêk, a râlthuam leh a nâmsâu tla, a lîthal leh a tâisâwm tla a pêk.

⁵David chu Saul nih a fialnâk zawngah dingchangnâk a tawng vima. Churuangah Saul nih a kawrsen hotu ah a siam. Chu hâwi a ti ruangah Saul nih hotu ah a siam na mi leh midang khawm thungâi anna lâwm.

⁶David nih Goliath a thah mi a hawng kîr nûnah kawrsen tla zawzawng khawm in leiah an tlung le, Israel ram khua kip mi nunau chu lalchem Saul dawng ding hen an kal. Chu tla chu lâwm tak hen la sak bû leh lâm bû hen an khuang leh ṭingṭang tum bû hen an dawng.

⁷Chawnglawmhnâk ni ah chun nunau tla nih la an sak le, “Saul nih sâng tamtak a thah le, David nih sîng tamtak a thah,” ti hen an sak.

⁸Saul nih chu chu a sâithiam lo, thungâi a ro a thawk, “David rangah chun sîng tamtak thah hen an sim, kei chu sâng tamtak thah hen an sim. Lalchem ah siam ding an tum asi lai,” a ti.

⁹Chu ni thawk hen David rangah a nahsuah le, a zumhmaih vima rawh.

¹⁰A thâituan ah chun Pathian fial hen thlarau nâwmtâm nih Saul chu a luah rawh, mi â hâwi hen in sungah â chaih but. David nih ni dangah a ti hâwi hen ṭingṭang a tum le, Saul nih fei a put ko.

¹¹A thinlung hen Saul nih, “Vam ah bêk tap hen ka khawh sih nik lai,” a ti; veinih a khawh le, a khawh kip hen David chu â phêt ving, â phêt ving.

¹²Saul nih David sinah LALPA a um ruangah thungâi a ṭih, sikhawmsele amah rangah a hua fâwn, sikhawmsele LALPA nih anih lam chu a kaltâk rawh.

¹³Churuangah Saul nih mun dang ah a fial le, kawrsen sâng khat hotu ah a siam. David nih a mi tla chu râl a tukpi na le,

¹⁴LALPA chu a sinah a um ruangah a ti mi zawng chu a dingchang vima.

¹⁵Saul nih David dingchangnâk a theih hen a ṭih dadauh.

¹⁶Israel leh Juda ram ah mikip nih David chu ruitu dingchangnâk nei mi asi ruangah an duh ver.

¹⁷Saul nih David sinah, “Ka fanu upa dauh mi Merab hi, râlṭha tak leh zumhkâi hen keimah nâwl zulh hen LALPA râldonâk ah dotu na si ruangah na nupi rangah ka nan pêk lai,” a ti. (Saul nih a thinlung hen David chu hi hâwi ka ti chun Philistia mi nih an thah lai le, zeikhawm a ti kho lai lo rawh ti a ruat ruangah.)

¹⁸David nih a sâng le, “Kei rîlmâl hi ka dâwngsungkhur zauh hen lalchem samâkpa si ding mazei ka si?” a ti.

¹⁹Sikhawmsele David rangah Merab pêk ding ni a tlung rawh chun Meholah mi a min Adriel minung pakhat rangah a pêk ving.

²⁰Saul fanu Mikal David hen an thinlung a tawng mi tak an si ti Saul nih a theih rawh chun thungâi â lâwm.

²¹“A thinlung hen Mikal chu David rangah ka pêk lai le, amah perpettu ah ka mang lai le, Philistia mi tla nih an thah khonâk ding hen,” a ti. Churawhchun a veinihnâk ah Saul nih David sinah, “Ka samâkpa na si lai rawh,” a ti.

²²Saul nih a to-aw tla chu a thuptê hen David sinah, “Lalchem hi na tlûnah thungâi â lâwm le, a rianṭuantu tla khawm nih an lungna a tlâ, nang rangah a fanu umpi ding â rem chir asi,” ti hen simh ding hen thu a pêk na.

²³Chu chu David an simh le, anih nih, “Kei hâwi mipâm rangah chun lalchem samâk si chu a rokual tuk,” a ti.

²⁴David thusim chu lalchem rianṭuantu tla nih Saul rangah an simh.

²⁵Saul nih a rianṭuantu tla sinah, “Hi hâwi hen David sinah simh u, Lalchem tla nih nan rangah a duh mi chu a mêlma Philistia mi tla thah mi fêm zâ a duh,” ti simh ding hen a fial na. (Hi hi Saul ruatnâk chu Philistia mi nih David an thah khonâk ding hen a tum mi asi.)

²⁶Saul rianṭuantu tla nih David rangah chu thu chu an simh le, David chu lalchem samâk asi awt ruangah thungâi â lâwm. Anna umhnâk ni a tlung lântê ah

²⁷David leh a minung tla chu an va kal le, Philistia mi zanih an thah na, an fêm tla chu David nih lalchem sinah a kalpi le, a mâika ah a rêl piak hep, a samâk asi khonâk ding hen. Churawhchun Saul nih a fanu Mikal chu David hen a umhtir na rawh.

²⁸Saul nih David sinah LALPA a um mi leh a fanu Mikal nih David chu a dâwt tatak ti a theihfiang rawh.

²⁹Churuangah chun David rangah a ṭih khun le, a dam kar vial chu a mêlma hâwi hen a ruat.

³⁰Philistia mi tla an hawng tâwn le, an do tâwn, sikhawmsele tuknâk kipah Saul hotu tla ngâk hen David chu a dingchang dauh tâwn. Churuangah David chu thungâi a minthang rawh.