Read Bawm Chin 1 SAMUEL 24 Bible Online

1 SAMUEL 24 - Bawm Chin bible

1 SAMUEL 24

¹Saul chu Philistia mi a do mi a hawng kîr le, David chu Engedi ramkaro kiangah a um ti an simh.

²Saul nih Israel lakah a kawrsen ṭha chem sâng thum a kalpi na le, Mâng Kêl Umnâk lungpi saklei ah David leh a mi tla hâwl ding hen an kal.

³Lampi kiangah chun dawrâ pûk a um le, amah cho hen â thlei le, a va lût le, a sungah a va lût. Chu pûk lak tak ah chun David leh a mi le chu a dunglei ah anna thup le, an um ko.

⁴Chun, a mi tla nih David sinah, “Na rangah tu hi tik dêngkhâwng tak asi, na mêlma chu na duh zia zawng ti ding hen Pathian nih a nan pêk,” an ti. David chu a va vâk le, a thuptê hen Saul theih lo karah a kawrdawhfual chu tâwm a lep.

⁵David thinlung chu a nuam lo rawh.

⁶A mi le tla sinah, “LALPA nih ka hotupa lalchem ah a siam mi chu nganfâk ka pêk lonâk ding hen hawng ka hum seh! LALPA nih lalchem rangah a ruat mi asi ruangah tâwmtê khawm nganfâk ka pêk ding asi lo!” a ti.

⁷Churawhchun David nih a mi tla chu Saul rangah do lo ding hen a theihtir na. Saul chu pûk ah mi chu a kalnâk dingah a thawk rawh.

⁸Churawhchun David khawm pûk ah mi chu a suak bâk le, Saul rangah a auh, “Bâwipa” a ti le, Saul chu a hawng a her, David nih zah tak hen tual ah a kûn le, a sinah,

⁹“Mi nih ka nan râl mi hâwi hen thu an sim mi hi zeirangah na lung?

¹⁰Nangmah ngelchel nih pûk ah na um liauah LALPA nih ka kut ah a nan pêk mi na muh asi. Ka mi tla nih nangmah thah ding hen an hawng ka fawrh le, sikhawmsele ka nan zângfah le, LALPA nih lalchem ah a nan ruat mi asi ruangah tâwmtê khawm nganfâk ka pêk awt lo ka ti.

¹¹Pu, zauhnik, na kawrfual tliar ka put mi hi! Ka nan thah kho asi, sikhawmsele ka nan thah ding mi ruangrûl ah hi na kawrdawh ka ât asi. Hi nih hin ka nan râl lo zia leh nganfâk pêk ding ka nan duh lo zia a langhtir asi. Nang lam nih chun zeikhawm ka sual lo mi lakah thah ding karo na hawng ka awt.

¹²Kan lakah a diklo dauh mi chu kan tlûnah LALPA nih lâirêl seh. Nang khawm tâwmtê khawm nganfâk kan pêk lo mi lakah na ka râl ruangah LALPA nih an rêp bâk seh.

¹³A lânah mi thufing nih, “Sualnâk thil chu misual cho nih a ti,” ti mi hâwi hen, churuang chun tâwm khawm nganfâk kan pêk awt lo.

¹⁴Zauhnik u, Israel lalchem nih hin zei thah ding me a hâwl? Ui a thi mi ma? Uirik ma?

¹⁵Âu kan diklo dauh LALPA nih lâirêl seh. Hi thu hen LALPA nih lâirêl sele, na lakah mi LALPA nih hawng ka vêng hen hawng ka hum seh,” a ti.

¹⁶David nih chu thu chu a sim thluh rawh chun, Saul nih, “Nangmah na maw ka fapa David,” a ti le, a ṭap rawh.

¹⁷Churawhchun David sinah, “Nang lam chu na dik, keimah ka diklo mi asi, na lakah thil diklo ka ti liau khawmah nang lam chu na ṭha asi.

¹⁸LALPA nih na kut lakah hawng ka pêk khawmsele na ka thah lo mi ruang hin ka lakah na ṭhat zia tusûn ni hin na langh asi.

¹⁹Mi nih a mêlma tleih hen âu nih nganfâk pêk lo hen suahtu a um lai? Tusûn ni ah na thilti rruangah hin LALPA nih mal a nan sâwm seh.

²⁰Tuah nang chu Israel lalchem na hawng si ngelchel awt, nangmah lâirêl hen lalram chu a um vima lai ti ka ruat.

²¹Sikhawmsele, ka thlâk tla leh ka dâwngsung min a tlâu hep lonâk ding hen ka nungnâk na zuah ding mi thu ah thu a tiam,” a ti.

²²David nih ti ding hen a tiamh. Churawhchun Saul chu in leiah a kîr le, David leh a mi tla khawm anna thupnâk lei mun ah an kîr rawh.