Read Bawm Chin 1 SAMUEL 27 Bible Online

1 SAMUEL 27 - Bawm Chin bible

1 SAMUEL 27

¹David nih a thinlung hen, “Zei tik mawh chu Saul nih hawng ka thah ding nget. Philistia sinah lam him ding hen kal sele a ṭha lai bei maw! Chu tikah Israel lakah a hawng ka râl mi hi ka him lai,” a ti.

²Churawhchun, David leh a minung zaruk hen Gath khua lalchem Maok fapa Akis sinah an kal rawh.

³David leh a mi tla leh an dâwngsungkhur hen Gath ah an va um rawh. David nih nupi panih a nei le, Jezreel mi Ahinoam leh Karmel ah mi Nabal nupi Abigail an si.

⁴Saul nih David chu Gath khua ah a tek ti a theih rawh chun hâwl ding â lêt thlo rawh.

⁵David nih Akis sinah, “Ka hâwipa tak na si chun, umnâk dingah khua fatê hawng ka neihtir bâk. Kei rangah khuapi ah um a herh lêm lo Pu,” a ti.

⁶Churawhchun Akis nih Ziklak khua a pêk. Chu thawk hen Ziklak chu Juda tla lalchem tâ asi.

⁷David chu Philistia tla sinah thla leiruk a um.

⁸Chu liau chun David nih a mi tla hen Gesur, Girzi leh Amalek mi hun sâwt tak um mi tla an do na. An ram chu Sur tiang an rûn le, Aigupta leiah kalnâk lampi tluan hen.

⁹Nunau, mipa zawzawng an thah na le, dawrâ rual, ranrual, sanatung tla, sangâwngsâu tla leh nipuan tla khawm an lâk. Chun Akis sinah an hawng kîr nawlh,

¹⁰anih nih thu a deih na, “Tutan zei leikâng me nan va rûn?” a ti. David nih, “Juda simlei kâng ram tla, Jeramil tla umnâk tla, Kenit umnâk ram tla,” ti hen a simh.

¹¹David nih nunau mipa zawzawng a thah hep na, Gath leiah va kal hen a minung tla thilti an sim kholonâk ding hen. David nih Philistia ah a um kar zawzawng hi hâwi hi thil a ti dân asi.

¹²Sikhawmsele, Akis nih David a zumh ruangah a thinlung hen “David chu a mi Israel tla nih an hua rawh dangâiah a san tlum hen keimah rian a ṭuan lai rawh,” ti a ruat.