Read Bawm Chin 1 SAMUEL 28 Bible Online

1 SAMUEL 28 - Bawm Chin bible

1 SAMUEL 28

¹A nehnûnah chun Philistia tla nih Israel tla do ding hen an kawrsen tla an pumh na le, Akis nih David sinah, “Na mi leh nang chu kanmah leiah ṭângṭawm ding nan si ti na theih ko kha,” a ti.

²David nih a sâng le, “Asi rîlmâl, na to-aw kan si ti nang khawm nih na kan theih ko, ka ti kho dân chu nangmah tak nih na muh lai ma hi,” a ti. Akis nih, “A ṭha! Keimah vêngtu ah ka nan siam kumza lai,” a ti.

³Samuel chu a thi le, Israel mi zawzawng nih an ulh le, Ramah khua ah an vûi. Saul nih Israel ram ah mi, mithi thlarau kawh thiam mi leh dâwithiam tla chu a nar ver na.

⁴Philistia kawrsen tla chu anna pûm le, Sunem khuapi kiangah mun an khuar. Saul nih Israel tla a pumh na le, Gilboa tlâng ah um mun an khuar.

⁵Saul nih Philistia kawrsen tla a muh le, a lâu.

⁶Churuangah LALPA rangah zei hâwi ti ding asi awt ti hen a deih. Sikhawmsele LALPA nih a sâng lo thlo, mang lei hen khawm, Urim leh Thummim leh khuavâng mang hen khawm a sâng lo.

⁷Churawhchun Saul nih a minung tla chu “Mithi thlarau kawh thiam mi nunau hawng ka kawh piak ule, a sinah thu ka deih awt,” a ti. “Endor khua ah pakhat a um,” ti hen, an sâng.

⁸Saul chu nipuan dang aih hen mêl dang hen â tuah le, a mûi rawh chun chu nunau va muh ding hen a minung panih tla hen an kal le, a sinah, “Mithi thlarau hawng kan sawnh piak le, zei hâwi hen thil a hawng um awt, hawng kan simh,” a, ti.

⁹Nunau nih a sâng le, “Lalchem Saul nih Israel ram ah mi mithi thlarau kawh thiam leh dâwithiam a nar hep na mi na theih ko khateh. Zeirangah keimah tângnâk leh thahnâk ding karo na tum?” a ti.

¹⁰Churawhchun Saul nih thu a tiam, “LALPA a nung mi min sâl hen, hi bang thil na ti ruang hin rêp na si rêng lai lo,” ti hen a simh.

¹¹“Âu ka nan kawh piak lai,” ti hen nunau nih a deih? Anih nih a sâng le, “Samuel,” a ti.

¹²Nunau nih Samuel a muh rawh chun, a râk le, Saul sinah, “Lalchem Saul na si ko mi, zeirangah na hawng ka perpet!” a ti.

¹³Lalchem Saul nih a sinah, “Ṭih rîlmâl lah! Zei na muh?” a ti. Nunau nih a sâng le, “Tual thawk hen thlarau a hawng suak mi ka muh,” a ti.

¹⁴Saul nih, “zei hâwi mêl a put,” ti hen a deih. Nunau nih a sâng le, “Tarpa a hawng suak, kawrfual â ruk,” a ti. Churawhchun Samuel asi ti a theih rawh chun zah tak hen tual leiah a kûn le, chibai a bûk.

¹⁵Samuel nih Saul sinah, “Zeirangah na ka nawktir hen zeirangah kîr ding hen na ka tuah?” a ti. Saul nih a sâng le, “Thungâi ka lawksawng! Philistia mi tla nih an hawng ka do le, Pathian khawm nih hawng ka kaltâk. Khuavâng leh mang hen khawm hawng ka sâng duh lo rawh.” Churuang chun ka ti ding mi hawng ka simh ding hen nangmah kan kawh asi,” a ti.

¹⁶Samuel nih, “LALPA nih a nan kaltâk le, a mêlma na si rawh mi chu zeirangah na ka kawh êu?

¹⁷Keimah mang hen thu a sim mi zawzawng chu LALPA nih a ti rawh ma kha, lalram chu na sinah mi a lâk le, David rangah a pêk rawh.

¹⁸LALPA thupêk na ngâi lo le, Amalek mi leh an neih tla na veih hep lo ruangah. Churuangah tuhin LALPA nih na lakah hi hi a hawng ti rawh asi.

¹⁹Nang leh Israel mi tla chu Philistia sinah pêk nan si lai,” a ti.

²⁰Samuel thusim ruang chun Saul chu a lâu le, tual ah a tlû ro le, a uai tlek. Nî tlâk leh khuadei hen buh a ei lo ruangah a tha a uai thlo.

²¹Nunau nih Saul chu a lâu mi a muh rawh chun a sinah a va kal le, a sinah, “Pu, zângfahtê hen na ka deih mi hâwi hen ka ti ruangah thihnâk ah mi chu ruang ka suak asi.

²²“Tuah ka nan ngiar mi hâwi hen ti le, buh kan timhtuah piak lai le, na ei hen kal ding tha na nei kho ding hen,” a ti.

²³Saul nih, “Zeikhawm ka ei awt loh,” ti hen a êl. Sikhawmsele, hotu ah a siam na mi tla nih ei ding hen an nâwr êu, a nehnûnah chun â âwi le, tual ah mi a thawk le, ihkhun tlûnah a to.

²⁴Nunau nih bit teng hen a vulh mi chaw lâ chu a thah piak. Sangvut a lâk le, a timhtuah, sang em mi thilnu tel lo hen a siam.

²⁵Saul mâika ah a hunh le, a milian tla hen an ei le, chu zân ah chun an kal rawh.