Read Bawm Chin 1 SAMUEL 29 Bible Online

1 SAMUEL 29 - Bawm Chin bible

1 SAMUEL 29

¹Philistia mi tla nih an kawrsen zawzawng chu Aphek ah an kalpi ver na le, chu liau chun Israel tla chu Jezreel tivakuam tinung va ah mun an khuar

²Philistia lal panga chu anmah murui chiau a zâ leh a sâng hen an kal le, David leh a mi tla chu lalchem Akis dunglei ah an kal.

³Philistia kawrsen hotu tla nih chu chu an muh na le, “Hebrai tla hi hinah zei an ti awt?” an ti. Akis nih, “Hi hi David, Israel lalchem Saul rianṭuantu asi. Ka sinah sâwt tak tutiang a um mi asi, a hawng nâk thawk hen ka lakah a palh-le-rahnâk zeikhawm ka muh lo,” a ti.

⁴Sikhawmsele Philistia kawrsen hotu tla chu Akis tlûnah an rothawk le, a sinah, “Hi minung hi na pêk mi khua ah kîrtir nawlh. Tuknâk ah kan sinah kaltir lah, kanna tuk liauah khatlei kângah â ṭângṭawm ving lebang lai. Kan minung thihnâk hi a pu leh amah rangah rem rawh nâk salam asi awt lo ma?

⁵A lân khawmah hi David asi lo ma, a thâwngthâng nunau nih lâm bû hen an sak mi, ‘Saul nih sâng a thah, David nih sîng a thah, an ti mi kha,” a ti.

⁶Akis nih David a kawh le, a sinah, “LALPA Israel Pathian nung mi min hen ka sim asi, ka sinah râltuknâk ah na hawng mi thungâi ka lâwm, ka sinah na hawng nâk thawk hen ka lakah palhnâk na nei mi ka muh loh. Sikhawmsele lal dang tla nih an duh lo asi.

⁷Churuangah in leiah thlangam tak hen tlung le, an duhlo kâng thil chu zeikhawm tilo hen um ko,” a ti.

⁸David nih a sâng le, “Pu, zei me thil ka sualnâk a um? Na rian ka ṭuannâk thawk hen zeikhawm palhnâk na muh lo mi asi chun, zeirangah ka lal leh ka hotu sinah nan mêlma râltuk hen ka hawng lo zia lai,” a ti.

⁹Akis nih, “Kei lam nih chun rem ka ti, Pathian vân minung tluk hen zumh na kâi hen kan ruat. Sikhawmsele lal dang tla nih kan sinah râltuknâk ah a hawng kho lai loh a nan ti.

¹⁰Churuangah chun, David, Saul kaltâk hen ka sinah hawngtu tla, zîngtê hen thawk ule, khua chêu lânah kal u,” a ti na,

¹¹Churawhchun David leh a mi tla chu a thâi zîngtê hen Philistia leiah kal ding hen anna thawh rawh. Philistia mi tla chu Jezreel leiah an kal rawh.