Read Bawm Chin 1 SAMUEL 31 Bible Online

1 SAMUEL 31 - Bawm Chin bible

1 SAMUEL 31

¹Philistia tla nih Israel tla chu Gilboa Tlâng ah an do na. Israel minung tamtak an thah na le, a dang vial chu lalchem Saul leh a fapa tla hen an tek.

²Sikhawmsele Philistia mi tla nih an phanh na le, Saul fapa pathum tla, Jonathan, Abinadab leh Malkisua an thah na.

³Saul kiangkam chu tuknâk thungâi a zual le, amah tak chu chanhtiang thalzum nih a dingh le, an liamh zia a fâk ual.

⁴A râlthuam puttu tlangvâl sinah, “Na nâmsâu phâwi le, hawng ka thah ko, Philistia pathian neilotu tla nih an ka thah hen anna khâwng lonâk ding hen,” a ti. Sikhawmsele tlangvâlpa nih ti ding a ṭih thlo. Churawhchun Saul nih a nâmsâu a lâk le, amah â sunh thlap.

⁵Tlangvâlpa nih Saul a thi mi a muh le, anih khawm chu a nâmsâu hen â sunh le, a thi bâk.

⁶Chu hâwi hen Saul leh a fapa pathum leh tlangvâlpa chu an thi rawh, chu ni chun Saul minung tla chu an thi hep.

⁷Israel mi Jezreel tivakuam varâl leiah um mi tla leh Jordan saklei ah um mi tla nih, Israel kawrsen tla an tek mi thu tla, Saul leh a fapa tla an thi mi thu tla an theih rawh chun an khua tla an mâk le, an tek phin. Churawhchun Philistia tla nih an khua chu an luah rawh.

⁸Râltuk lîm nûn a thâituan ah Philistia mi tla nih mithi ruak tla thil chu lâk ding hen an kal le, Saul leh a fapa pathum Gilboa tlâng ah thi mi an muh na.

⁹Saul ngâwng chu an tan le, a râlthuam chu an lît le, an milem sawnhnâk in ah leh Philistia ram ah thâwngthâng chu an simh na.

¹⁰A râlthuam chu an pathiannu Astarte in ah an siah le, a ruak chu Beth San khuapi kulh dâi ah an bêk.

¹¹Gilead ram Jebes mi tla nih Philistia mi tla nih Saul an ti dân an theih le,

¹²mi râlṭha tla chu zân khuadei ver hen Beth San khua leiah an va kal. Dâi ah mi Saul leh a fapa ruak chu an lâk le, Jebes ah an put na le, chunah chun an rawh na.

¹³An ruh tla chu an lâk le, khua ah tamari thing tangah an phûm, chun ni sarih buh eilo hen an ulh.