Read Bawm Chin 1 SAMUEL 6 Bible Online

1 SAMUEL 6 - Bawm Chin bible

1 SAMUEL 6

¹LALPA Thudântuk Bâwm chu Philistia ram ah thla sarih a um nûnah chun,

²mi tla nih chun bâwlpu leh dâwithiam tla an kawh na le, “LALPA Thudântuk Bâwm hi zeitin kan ti awt?” ti hen an deih na.

³“Israel tla sinah LALPA Thudântuk Bâwm nan khirh nawlh na chun nan sual man rangah thilpêk nan kuat sih ngelchel ding asi, Thudântuk Bâwm chu lâwmman tel lo hen nan khirh nawlh ding asi lo. Hi hâwi hen nan ti chun damh hen nan um lai le amah ruangah rêp nan si mi khawm nan theih lai,” an ti.

⁴Mi zapi tla nih, “Zei lâwmman me kan kuat lai?” ti hen an deih na. Annih nih an sâng le, “Ngûn hen a ngawr mi leh châichîm Philistia lal zat panga siam u. Chu râi chu nan tlûnah leh lal tla tlûnah a tlung mi asi.

⁵Chu a ngawr mi lem leh châichîm lem chu siam ule, Israel tla Pathian chu nan chawnglawmh ding asi. Chu tikah nan pathian tla leh nan ram a rêp na mi chu a bâng lai dahmawh.

⁶Aigupta lalchem leh a mi tla hâwi hen zeirangah ti ti hen nan lungkhung? Israel tla nih Aigupta an mâk tiang hen Pathian nih â tak hen a siam na mi kha philh lah u me.

⁷Churuangah kari thar chawpê a nunau kari banh dahlo mi panih timhtuah u, kari banh na ule, an fa tla chu a rung leiah kaltir u.

⁸LALPA Thudântuk Bâwm lâk ule, kari lakah siah ule, chu Bâwm chu siah ule, ngûn milem nan sual man rang dingah nan pêk mi chu a kiangah siah u. Chu Kari chu amah lung hen kaltir u.

⁹Beth Semes leiah a kal leh kal lo zauh vima ule, Beth Semes leiah a kal asi chun Israel Pathian nih siatnâk ṭihnungkâi tak a hawng tlungtir mi asi lai. Sikhawmsele a kal lo asi lam chun râi chu amah nih a hawng fial mi asi lai lo le, amah a hawng um rêng mi asi lai,” an ti.

¹⁰An simh na mi hâwi hen an ti le, chaw nunau panih an kalpi le, kari an banh le, an fa tla chu a rung ah an khâr pang.

¹¹Thudântuk Bâwm chu kari ah an siah le, châichîm leh ngawrnâk lem leh ngûn hen siam mi bâwm khawm chunah an siah bâk.

¹²Chaw nunau chu Beth Semes lampi leiah anna thawh rawh. Chu lei chu anna hawi le, pial lo thlo hen an kal. Bû pah vima hen an kal. Philistia lal panga tla nih Beth Semes ramri tiang hen an va zûl.

¹³Chu vakuam, ah chun Beth Semes khua mi tla chu fângât hen an um le, lâkkhatko ah tlûnlei kâng anna hâwi le, Thudântuk Bâwm an muh rawh. An muh rawh chun thungâi anna lâwm.

¹⁴Chu kari chu a min Josua an ti mi phâisen ah a hawng tleng. Chu minug chu Beth Semes khua ah um mi asi le, lungpi lian tak kiangah kari chu â dîn. Kari thing tla chu an chêk le, chu chaw tla chu an thah le, LALPA rangah duahphung bâwlnâk rangah an ap.

¹⁵Levi tla nih LALPA Thudântuk Bâwm leh ngûn lem chu an châwi le, lungpi tlûnah an siah. Churawhchun Beth Semes khua mi tla nih chun bâwlnâk duahphung leh bâwlnâk dang tla LALPA sinah an ap.

¹⁶Philistia lal panga tla nih chun chubang an thilti chu an zauh ko na le, Ekron khua leiah chu ni ah chun an kîr nawlh rawh.

¹⁷Philistia tla nih chun ngawrnâk ngûn lem panga an sual man rangah an pêk mi chu: Asdod khua rangah pakhat, Gaza rangah pakhat, Askelon khua rangah pakhat, Gath khua rangah pakhat, Ekron khua rangah pakhat chiau an kuat.

¹⁸Châichîm lem khawm Philistia lal panga nih lâi an rêlnâk khua kipah an kuat, kulhnei mi khua leh kulh neilo mi khua khawmah. Beth Semes mi Josua phâisen kâu takah LALPA Thudântuk Bâwm an siahnâk lungpi chu, chu liauah thil a hawng tlung mi theihkumzanâk ding hen a um ko rih.

¹⁹Beth Semes khua mi tla nih LALPA Thudantuk Bâwm an zauh ruangah minung sâwmsarih a thah na. Chu hâwi tluk thahnâk rokual tak LALPA nih a tlungtir ruangah mipi tla nih an ulh.

²⁰Churawhchun Beth Semes mi tla nih chun, “LALPA Pathian, thenhlimh mâika ah âu a dîr kho lai? Kan lakah mi ṭhial ding hen zei leiah kan kaltir lai rawh,” an ti.

²¹Kiriath Jearim leiah minung an fial le, “Philistia tla nih LALPA Thudântuk Bâwm an hawng khirh nawlh, hawng ule, lâk u,” ti va simh ding hen.