Read Beembe Mat 15 Bible Online

Mat 15 - Beembe bible

Mat 15

¹Bafarisi na batini ba mangisi bafumini ku Yerusalemi, bayisa kuri Yesu, bamuleele ti:

²«Bukuri nki bayiki ba ye bari mu kwesinina kikulu kya bakuutu? Bo bahele mu kweswaaka myooko mu ntaangu ya kudya.»

³Yesu wabvutula kuri bo ti: «Heki beenu se buri luri mu kwesinina lutumu lwa Nzaambi mu ntoono kikulu kyeenu?

⁴Mukwongo, Nzaambi waleele ti: "Kiinsa taayi na nguri yaaku", na ti: "Mpisi wunde wubulila taayi bunu pe nguri yaandi mpopi, lo nde manunu lufwa."

⁵Ngo kasi beenu lukweleele ti wunde wuleele kuri taayi dyaandi bunu pe kuri nguri yaandi ti: "Bibyo bi nketi kukuha mu kukubakisa byataasulu mu kikabu kuri nzaambi",

⁶lo wa bubwo wahele na nzala kukiinsa taayi dyaandi. Mu bubwo beenu lwayaala Maampu ma Nzaambi mu ntoono kikulu kyeenu.

⁷Bangaa-bumpitu-bumpyoongo, Esaya wabikula nkati kwakubwete mu ntoono beenu. Nde waleele ti:

⁸"Kaanda dimadi kwendumusa munu mu bibori, mitima mya bo myasasika la na me.

⁹Kwa mungengi bari mu kwenkiinsa, nyikusulu dzi bari mu kweyikisa bo, ngo mangisi ma baatu."»

¹⁰Yesu wateele mpuumbu ha kaba nde. Nde waleele kuri bo ti: «Yukeenu na bakileenu:

¹¹Kari bikookotaa mu munwa bisumunaa muutu ko; ngo bibyo bipalaa mu munwa bisumunaa muutu.»

¹²Hango, bayiki bakokosolo na bamuleele ti: «Buri ye yaari ti Bafarisi bu bayukiri maampu mamo, babuminyee makya?»

¹³Yesu wabvutula waleele kuri bo ti: «Mpisi muti, wuri kari Taayi dyaami dya ku yulu wakuna ko, sa kaba watuubula.

¹⁴Basuusee! Bo bafwa-miisu bakwenata [bafwa-miisu]. Mbuti wafwa miisu wukwenata wafwa miisu, lo bo boolo sa babwa mu bulu.»

¹⁵Petelo wabvutula wamuleele ti: «Bangukila beetu nkuma [yimayi].»

¹⁶Yesu waleele: «Lukimi lu se, beenu lwahele kubakula?

¹⁷Buri beenu lwahele kubakula ti byobinso bikotaa mu munwa bisundukaa mu mwooyo na bakwebiloosa ku mutsyeeku?

¹⁸Ngo kasi bipalaa mu munwa, bifumunaa ku mutima. Na bibyo bikoosumunaa muutu.

¹⁹Bukuri mu mutima mu palaana: bitsimi byabibi, munzusu baatu, kimpala, buyala, kwiibi, bimbaangi byampya na nsaanunu.

²⁰Bitoolo bibyo bisumunaa muutu. Ngo ndiilu yahele kuswaaka myooko ka yisumunaa muutu ko.»

²¹Yesu kayisikaa haho, weensi mu nkoonsi ya Tiro na Sidoni.

²²Na mono, mukyeetu mosi, wa ku Kanana wa mu mankoonsi mamo, wayende kuri Yesu wafula musaakulu waleele kuri nde ti: «Mfumu, mwaana Davidi, bakila me ngebe. Mwaana me wa mukyeetu wubama kwalaka kuri mpeeve yayibi!»

²³Yesu wahele kubvutula ntoono ti mosi kuri nde. Bayiki baandi bakokosolo baleele kuri Yesu ti: «Bvutula mukyeetu wu, bukuri nde wukwefula misaakulu ku mambisa ma beetu.»

²⁴Nde wabvutula waleele ti: «Me bampeekiri kunu kuri bimeeme byadziimbila bya mu nzo Isaheli.»

²⁵Ngo mukyeetu wayisa, watsukumina Yesu na waleele kuri nde ti: «Mfumu, bakisa me!»

²⁶Yesu wabvutula ti: «Buri bwabubwete ko, mu kuholo mampa ma baala, na kulooso mo kuri mwaa-baala ba bambwa.»

²⁷Mukyeetu wu waleele: «Bunubwo Mfumu! Ngo mwaa-baala ba bambwa badyaanaa bisesengu bibwaanaa ku nsuku taabala dya bamfumu babo.»

²⁸Hango, Yesu wabvutula kuri wa mukyeetu waleele ti: «Mukyeetu, kanyi dyaaku diri dyadinene. Hemese buba kuri ye bunu bu tiiriri.» Na mwaana waandi watsiinika mu kilookolo kinikyo.

²⁹Yesu kayisika haho, wayende ku teke mubu wa Ngalili. Bu kanaaka ku yulu mulaandu, wadzakala kukwo.

³⁰Mampuumbu ma baatu makokosolo kuri nde, banata babeele miilu, bafwa-miisu, bari na bipfuumi, ba mababa, na babeeru bakimi balaka. Babasuusa ha miilu mya Yesu, na nde wabatsinikisa.

³¹Mu kiteesu kiri mpuumbu baatu yakimuka mu kumono mababa madzoonso, bari na bipfuumi babatsiika babele miilu bakweyende, na bafwa-miisu bari mu kumono. Na bo bari mu kusiikaana Nzaambi ya Isaheli.

³²Yesu wateele bayiki baandi mbila na waleele kuri bo ti: «Me nyiri na ngebe mu mpuumbu baatu yi, bukuri biluumbu byeki bitatu bari ha teke me, ngo bahele na bya kudya. Me nyahele kutya ku babvutula kuri bari nzala bu, bakwiisa kweebwa mu nzila.»

³³Bayiki ba Yesu bamufuula ti: «Kuri tubakila mampa ma kuyukutisa mpuumbu ya bu yimayi ku nsi yankatu ku?»

³⁴Yesu waleele kuri bo ti: «Mampa makwe beenu luri na mo?» Bo babvutula ti: «Nsaamu na mwaa-bansu.»

³⁵Yesu waleele kuri mpuumbu mu kudzakala ha nsi.

³⁶Yesu waholo mampa nsaamu na bansu, bu kabvutula matoondo kuri Nzaambi, wabukuna, waha kuri bayiki na bayiki baha kuri mampuumbu.

³⁷Bobanso badya na bayukuta. Bo batolo bitsuri bya mampa byasaariri, mampiri nsaamu

³⁸Babo badiiri baba mafuunda mana ma babakala, kwahele kutaanga bakyeetu na mwaa-baala.

³⁹Bu kabvutula mampuumbu, wanwaata mu bwaatu na wayende mu mankoonsi ma bari Mangadani.