Read Beembe Mat 16 Bible Online

Mat 16 - Beembe bible

Mat 16

¹Bafarisi na Basaduki mu kutsiitsa Yesu, bakokosolo kuri nde, na bamuloombo kabasoongo kidiimbu kya ku yulu.

²Yesu wabvutula kuri bo ti: «[Nsinsika bu yitubukaa, beenu luleelaa ti: "Ntaangu yayibwe, bukuri yulu dyabeenge."

³Na mu kipari, luleelaa ti: "Lolo kuri mvula, bukuri yulu dyabeenge na diri mampimbisi." Hahamosi, beenu luyaabaa kusobokoso kinzeri kya yulu; ngo hakaka, beenu lwahele kubangisina kusobokoso bidiimbu bya mantaangu.]

⁴Kiseendu kyakibi na kya kimpala, kiri mu kusaka kidiimbu. Kuri kidiimbu ki babaha ko, mbuti ka kya Yona ko.» Na nde kabasisaana weensi.

⁵Bayiki ba Yesu bu basabuka ku simu dyakaka, badzimukina kuholo mampa.

⁶Yesu waleele kuri bo ti: «Talee na seenee madyeele mu lufunusu lwa Bafarisi na Basaduki.»

⁷Bo babeke mu kwetsima bo-meene na baleele: «Ti kampe bukuri beetu tusii holaa mampa ko.»

⁸Bu kayaaba bubwo, Yesu waleele ti: «Baatu bangaa-kanyi dyantele, buri luri mu kwetsima mu beenu-meene ti lwahele na mampa?

⁹Beenu lwakiri kubakula pe, lwahele kubaambuka mwooyo mu mampa mataanu mu mafuunda mataanu, heki mitooto mikwe beenu luri lwatolo?

¹⁰Ti mu mampa nsaamu mu mafuunda mana heki mampiri makwe beenu luri lwatolo?

¹¹Dyaburi beenu luri kubakula pe ti me nsii kuludzoonsolo ko mu mitariri mampa? Seenee madyeele mu lufunusu lwa Bafarisi na Basaduki.»

¹²Haho, bo babakuri ti, Yesu kari mu lufunusu lwa mampa kaba baleele ko ti se madyeele, ngo mu nyikusulu dza Bafarisi na Basaduki.

¹³Yesu bu kaba mu kweende ku nkoonsi ya Kayisareya ya Filipo, wafuula bayiki baandi ti: «Baatu nki bari mu kweleele, ti Mwaana muutu na kari?»

¹⁴Bamaba baleele ti: «Babamosi Yowane Mubotiki; bakaka ti, Eliya; bakimi ti, Yelemiya, bunu pe mosi mu babikiri.»

¹⁵Yesu waleele kuri bo: «Heki beenu, buri luri luleeriri, ti me na n yiri?»

¹⁶Simoni Petelo wabvutula, waleele ti: «Ye ngo Kiristo, Mwaana wa Nzaambi ya mwooyo.»

¹⁷Yesu wabweese kuleele kuri nde ti: «Ye wuri mu kiminu, Simoni mwaana Bariyoona; kari muswinyi na makila ko bikuyaabisiri dyo; ngo Taayi dyaami diri mu mayulu wukuyaabisiri dyo.

¹⁸Na me ndeeriri ku wuri yeenu: Ye ngo Petelo, mbangukulu ti tari; na ha yulu tari didyo me sa nyatuunga dibuundu dyaami. Mpinu dza lufwa ka dzibvula makwa na dyo ko.

¹⁹Me sa nyikuha mafungula ma Kimfumu kya mayulu. Ma wukaanga ye ha butoto, sa maba makaangu ku mayulu. Na mamo ma wunyanguna ye ha butoto, sa maba manyangunu ku mayulu.»

²⁰Hanaho, Yesu wadika bayiki baandi, ti yaa baleele kuri muutu ti mosi ko, ti nde ngo Kiristo.

²¹Kuholosono ntaangu yiyo, Yesu wabaandika mu kweyaabisa kuri bayiki baandi ti, nde yelemini kutoomboko ku Yerusalemi, na kumono mpasi dzalaka mu myooko mya bakulu ba babakala, bakuutu ba bangaanga-nzaambi na batini ba mangisi, yelemini kuba wadzusu, na mu kiluumbu kyabitatu, yelemini kuba wafuluka.

²²Petelo kamunataa ku lumperi, bandukiri kumuŋaŋina, waleele ti: «Nzaambi kakukebe Mfumu! Pele! Mimyo miri nyirimina mu ye ko!»

²³Yesu bu kasyeeteke, waleele kuri Petelo ti: «Satana, ba ku mambisa ma me. Ye wubumisa me makya, bukuri ma wutsima ye mari ma Nzaambi ko, ngo ma baatu».

²⁴Hanaho, Yesu waleele kuri bayiki baandi ti: «Mbuti muutu tiiri kunama me ha mambisa, lo hemese katuna nyutu ya nde-meene, kanata kuruwa dyaandi na kanama me.

²⁵Mukwongo, mpisi wunde wutiiri kubvuukisa kidziingu kyaandi, lo sa kakidziimbisa; ngo kasi wunde wudziimbisa kidziingu kyaandi mu ntoono ya me, lo sa kakidzuukila.

²⁶Nkya ndaandu yiri na muutu, mbuti bakiri nsi yansiina, ngo fuukisiri kidziingu kyaandi? Bunu pe, nki muutu katsiitsa kuha mu kuyiingisa kidziingu kyaandi?

²⁷Mukwongo, Mwaana muutu weki mu kwiisa mu munkeembu wa taayi dyaandi, kintwaari na bambasi baandi; haho, nde kabvutula kuri muutu-muutu, bunu buri biyiriki byaandi.

²⁸Mu ngwanwa me nyiluleeriri ti: Babamosi mu bateleme hamaha, bafwa ko, natee bakiri mono Mwaana muutu wiisiri mu Kimfumu kyaandi.»