Read Beembe Mat 22 Bible Online

Mat 22 - Beembe bible

Mat 22

¹Yesu bu kaba mu kubvutula, wadzoonso mu mankuma makimi kuri bo, waleele ti:

²«Kimfumu kya mayulu kyafwanikina bunu mbyaasi mosi wayirika munkeembu makweele ma mwaana waandi.

³Nde waheeke bisari byaandi mu kweteele babateeriri mu kwiisa kudya ku munkeembu; ngo bo basii tya kwiisa ko.

⁴Wabweese kuheke bisari bikimi mu kuleele ti: "Leele kuri babo babateerirye ti: Munkeembu wa ndiilu weki wayirima, bamwaadzusa bangoombo na bibulu byabinene. Byobinso byeki byayirima, wasee ku munkeembu!"

⁵Ngo babo babateeriri mbila banyaafuna mbila na bayende kwaaku, wamosi ku nseke yaandi; wakaka ku mumbungu waandi kusala.

⁶Bakaka basiiri babo, bakwaata bisari bya mbyaasi babatuka na babadzusa.

⁷Mbyaasi wabaka nkesi. Nde waheeke bayongolo baandi mu kweedzusa baatu babo, na wayoko bvula dya bo.

⁸Hanaho, waleele kuri bisari byaandi ti: "Munkeembu weki wayirima, ngo kasi babateerirye bahele kuba basoongolo.

⁹Yende mu mahaambu ma manzila, bobanso balumono, bateele ku munkeembu."

¹⁰Bisari byapala na bayende mu manzila, bakutikisa bobanso babamwiini, babatsiina na babeeru. Munkeembu waluula mu baatu bayisiri.

¹¹Mbyaasi wakoto mu kwetala bari ha munkeembu na wamono muutu mosi waba wahele na kinkuta kya munkeembu.

¹²Wamufuula ti: "Nduku yaami, buri siiri mu kukoto hamaha, kuri ye wahele na kinkuta kya munkeembu?" Muutu wunde wakaanga munwa!

¹³Hanaho, mbyaasi waleele kuri bisari byaandi ti: "Mukaangee miilu na myooko, na mutubee ku mampimbisi ma ku mbasi, kukwo kuba bidilu na nkweetulu miinu."

¹⁴Mukwongo, balaka bari bateelu, ngo banteele basoolu.»

¹⁵Hanaho, Bafarisi bu bayende ku mfuunda, bakaanga bitsima, kya kumutekele mweete, mpisi bamubaka mu nzoonsulu.

¹⁶Bo baheeke bayiki ba bo, kintwaari na baatu ba Erode kuri nde, baleele ti: «Muyikisi, beetu tuyaari ti ye ngaa-ngwanwa, na ye wuri mu kweyikisa nzila ya Nzaambi mu ngwanwa; ye wabataa muutu ko; bukuri ye wamonaa kinzeri kya baatu ko,

¹⁷ngo leele beetu, kitsimi kya ye buri kiri: Buri kuri na miswa mu kufuta mpaku kuri Kayisari hoti pele?»

¹⁸Ngo Yesu bu kaba kayaari mutima-bubi wa bo, wabaleele ti: «Bangaa-bumpitu-bumpyoongo, buri lutekele me mweete?

¹⁹Soongee mbeti me mupata wa mpaku.» Bo bamusoongo kidenali kimosi.

²⁰Nde wafuula kuri bo ti: «Kidzisi ki na bisoni bi bya na?»

²¹Bo babvutula kuri nde ti: «Bya Kayisari», haho nde kaleele kuri bo ti: «Hango, bvutulee bya Kayisari, kuri Kayisari, bya Nzaambi kuri Nzaambi.»

²²Bu bayuka, bakimuka, na bu bamusisa bayende.

²³Mu kiluumbu kikyo, Basaduki bamonokono kuri nde, baleele ti, mfulukulu ya bafwa yiri ko, bamufuula,

²⁴bamuleele ti: «Muyikisi, Moose waleele ti: "Mbuti muutu fwiiri kwahele baala, lo mpaangi yaandi kukondolo mufwiiri nde mu kumubutila baala."

²⁵Ngo ku bula beetu kwaba bampaangi nsaamu; watete kakweelaana fwiiri kwahele baala, na sisiri mufwiiri waandi kuri mpaangi yaandi.

²⁶Bwobumosi mu waboolo, na mu wabatatu natee wansaamu.

²⁷Ha mambisa ma bobanso, mukyeetu wafwa.

²⁸Heki, mbasi-tsuku haba mfulukulu, mukasi na kaba mu bo nsaamu? Bukuri bobanso bamubakiri.»

²⁹Yesu wabvutula, waleele kuri bo ti: «Beenu lwawumuka bukuri lwahele kuyaaba Matinu na mpinu dza Nzaambi.

³⁰Mukwongo, mbasi-tsuku haba mfulukulu, kuba babakala bakweele ko, na bakyeetu babakweelese ko. Ngo sa baba bunu bambasi, mu mayulu.

³¹Ngo mu ntoono ya mfulukulu ya bafwa, beenu lwasii taanga ma leele Nzaambi kuri beenu ko? Waleele ti:

³²"Me ngo Nzaambi ya Abalaami, Nzaambi ya Isaki na Nzaambi ya Yakobe." Nde kari Nzaambi ya bafwa ko, ngo kasi Nzaambi ya baatu bamwooyo.»

³³Mampuumbu bu mayuka, makimuka mu nyikusulu dzaandi.

³⁴Bafarisi bu bayuka ti Yesu kaangisiryeenu Basaduki minwa, bakutukina ha kibeendu kinikyo.

³⁵[Mutini] mangisi mosi mu bo, wamutekele mweete:

³⁶«Muyikisi, nkya lutumu lubvuriri bunene mu Mangisi?»

³⁷Yesu wamuleele ti: «"Tya Mfumu Nzaambi yaaku mu mutima waaku ndemunso, mu muheebulu waaku ndemunso na mu dyeele dyaaku dyodinso."

³⁸Lulwo ngo lutumu lubvuriri bunene na lwatete.

³⁹Lwadzoolo lwafwanikina na lulwo ngo lumalu: "Tya mbaasi yaaku bunu ye-meene."

⁴⁰Mangisi momanso na babikiri byakaangama mu ntumu dzodzoolo dzidzo.»

⁴¹Bafarisi bu baba bakutukina, Yesu wabafuula,

⁴²waleele ti: «Kitsimi kya beenu buri kiri mu ntoono ya Kiristo? Nde mwaana na kari?» Bo babvutula kuri nde ti: «Wa Davidi.»

⁴³Nde waleele kuri bo ti: «Ngo dyaburi, mu Mpeeve Davidi wumuteele "Mfumu"? Na wuleele ti:

⁴⁴"Mfumu wuleele kuri Mfumu yaami ti: Dzakala ha lubakala lwaami, natee ku nyisuusa me bataatu baaku kunsa bitaambi byaaku!"

⁴⁵Hango, mbuti Davidi wumuteele ti "Mfumu", lo dyaburi nde kabweese kuba mwaana Davidi?»

⁴⁶Muutu ti mosi, kasii bangusina kumuleele ntoono ti mosi ko, mu kumuha mvutu. Kuholosono kiluumbu kikyo, kuri muutu waba bweese kutsiitsa kumuha kifuuri ko.