Read Beembe Mat 26 Bible Online

Mat 26 - Beembe bible

Mat 26

¹Yesu bu kamanaa kudzoonso misamu myominso mimyo, waleele kuri bayiki baandi ti:

²«Beenu luyaari ti, biluumbu byoolo bisiri lo Paaka ditubukiri, na Mwaana muutu bee bamuyekiri mpisi kaba wakomono ha kuruwa.»

³Hanaho, bakuutu ba bangaanga-nzaambi, na bakulu bababakala ba kaanda kukutukina ku nzo mukuutu bangaanga-nzaambi, wuri nkuumbu Kayafa.

⁴Bo basa mamfuundu, mpisi heki basaka bu bakaanga Yesu mu mawunu na bamudzusa.

⁵Bo baleele ti: «Yaa diba mu ntaangu ya munkeembu ko, mpisi heki kisaangila kihele kubwa ha kakati dya baatu.»

⁶Yesu bu kaba ku Betanya, ku nzo Simoni mubeeru bwaasi,

⁷mukyeetu mosi wakokosolo kuri nde na yuku dya mananaasi mantalu yalaka, na wayitila mo ha yulu mutu Yesu, kuri wuri mu kudya.

⁸Bayiki bu bamono bubwo, babaka nkesi na baleele ti: «Buri babvukiri kwaandi mananaasi ma?

⁹Mukwongo, baketyee kumayarika mu ntalu yalaka, na kuha mboongo kuri bawelu!»

¹⁰Yesu bu kayaaba, waleele kuri bo ti: «Mu nki ntoono beenu luri mu kubamisa mukyeetu wu? Mukwongo, kiyiriki kyakibwete nde kayirikiri mu me.

¹¹Mukwongo, mu mantaangu momanso, beenu luri kintwaari na bawelu, ngo kasi beenu lwahele kuba kintwaari na me mu mantaangu momanso.

¹²Bukuri nde mu kuyitila mananaasi ma mu nyutu me, yirikiri mamo mu nziikulu.

¹³Mu ngwanwa me nyiluleele ti, kukwo kubayaabisa Musamu Wamubwete wu, mu nsi yansiina, sa badzoonsolo se mu mamo, ma kayirikiri, mu kumubambukila mwooyo.»

¹⁴Haho, mosi mu bo kuumi na boolo, wuri nkuumbu Yuda Iskaryote, wayende kuri bakuutu ba bangaanga-nzaambi,

¹⁵waleele ti: «Nki lutiiri kumpa, mpisi me nyimuyekele kuri beenu? Bo bamuteesele makuumi matatu ma mimpata.»

¹⁶Kuholosono haho, Yuda waba kwesaka mpwaani yayibwe mpisi heki kamuyekekele.

¹⁷Mu kiluumbu kyatete, kya mampa mahele lufunusu, bayiki bakokosolo kuri Yesu, baleele ti: «Kuri ye tiiri, ti beetu tukuyirikila ndiilu ya Paaka?»

¹⁸Nde waleele ti: «Yendee ku bvula kuri kisungulu, na muleele ti: "Muyikisi ti: Ntaangu ya me yikokisiri. Ku nzo ye me nyidiila Paaka na bayiki baami."»

¹⁹Bayiki basa bunu bwa batumini Yesu, na bayirika Paaka.

²⁰Nsinsika bu yatubuka, nde wabeke mu kudya kintwaari na bo kuumi na boolo.

²¹Bu baba mu kwedya, nde wabaleele ti: «Mu ngwanwa me nyiluleele ti, mosi mu beenu bee yekiri me.»

²²Bo bamono ngebe dzalaka, babaandika mu kumuleele mosi-mosi ti: «Kari me ko, ka bunubwo ko, Mfumu?»

²³Nde wabvutula, waleele ti: «Wunde wukotoso kooko ha kimosi na me mu lukoombo, wunde wunyekele.

²⁴Mukwongo, Mwaana muutu wuri mu kweende, bunu bu diri dyatinu mu ntoono ya nde. Ngo kasi, kyaari kuri muutu wunde wuri nzila yi bayekekele Mwaana muutu. Bwaketi kubvulila bubwete kuri muutu wunde mu kuhele kubutuka».

²⁵Yuda waba muyekele waleele kuri nde ti: «Kari me ko, ka bunubwo ko, Muyikisi?» Nde wabvutula kuri nde: «Ye leeriri.»

²⁶Bu baba mu kudya, Yesu waholo mpa, bu kasakumuna yo, wabukuna yo, na bu kaha kuri bayiki, waleele ti: «Holeenu, dyeeneenu yimayi ngo nyutu yaami.»

²⁷Bu kaholo mbasa, wabvutula matoondo, wabaha, waleele ti: «Nweenee yo beenu bobanso.

²⁸Bukuri mamama ngo makila maami, ma lulelusunu matsaamuka mu balaka, mu ntoono mpemusunu ya masumu.

²⁹Me nyileele kuri beenu: Me ka nyibweese kunwa malu ma bviinya ko, kubaandika lu malu, natee kiluumbu kikyo ki nyibweese kumanwa kintwaari na beenu, mu Kimfumu kya Taayi dyaami.»

³⁰Bu bamana kuyimbila mikuunga mya ndumusu, bayende ku Mulaandu wa Mi-olive.

³¹Haho, Yesu waleele ti: «Beenu bobanso bee lubwiiri mu ntoono me, mu butsuku bumabu, bukuri diri dyatinu ti: "Me sa nyalata mutari, na mpuumbu bimeeme sa bitsamukina."

³²Ngo me mana kufuluka, sa nyalutekesele ku Ngalili.»

³³Petelo wabvutula, waleele kuri nde ti: «Ti hayuku bobanso babwiiri mu ntoono ye, me ka nyiri mbwiila ko.»

³⁴Yesu waleele kuri nde ti: «Mu ngwanwa me nyikuleeriri ti, mu butsuku buubu, tekesele mulumi nsusu kakookolo, ye sa tuna me mbala tatu.»

³⁵Petelo waleele kuri nde ti: «Ti hayuka dya kufwa kintwaari na ye, lo me nyiri ntunina ye ko.» Bayiki bobanso se baleele bunubwo.

³⁶Yesu wayende na bayiki baandi ku kibeendu kimosi kiri nkuumbu Ngetesemane. Nde waleele kuri bo ti: «Dzakalee hamaha mu ntaangu yi nyisasika me, mu kwesaambila hanii.»

³⁷Bu kaholo Petelo na baala bo boolo ba Dzebedayi, wabaandika kumono ngebe na kubwilikila kinkuuka.

³⁸Haho, nde waleele kuri bo ti: «Mutima me weki na ngebe natee mu kiteesu kya lufwa; beenee hamaha na beenee naana kintwaari na me.»

³⁹Bu kayende mwaa kimamanga, nde wabwa kuri watsuka busu ha nsi, wasaambila waleele ti: «Taayi dyaami, mbuti bwakuka, lo hemese mbasa yimayi yiluta la na me. Kasi kari bu ntiiri me ko, ngo bu tiiri ye.»

⁴⁰Nde wabvutuka kuri bayiki, wabamono babwa tolo, waleele kuri Petelo ti: «Bumabu, lukoonini kweenu kuba naana, kilookolo kimosi kintwaari na me?

⁴¹Beenee naana na saambileenu, mpisi luhele kukoto mu nsindukulu. Kiluunsi kiri na makwa, ngo kasi muswinyi wuri na buyonsi.»

⁴²Nde wabweese kusasika lwadzoolo, wasaambila, waleele ti: «Taayi dyaami, mbuti mbasi yimayi yiri ndutula, kuri me nyahele kuyinwa ko, lo hemese kutya kwa ye kuyirima!»

⁴³Bu kabweese kubvutuka, wabamono babwa tolo, bukuri miisu mya bo myaba myaleme.

⁴⁴Bu kabasisa wabweese kusasika, wasaambila mbala yatatu, wabweese kulandukina maampu mo mamosi.

⁴⁵Haho, nde wabvutuka kuri bayiki na waleele kuri bo ti: «[Bu] lusii bu, bweenee kweenu tolo, na wuumeenu. Mono, kilookolo kikokisiri, na Mwaana muutu bee bamuyekiri mu myooko mya bangaa-masumu.

⁴⁶Siimbikeenu, tweendeenu. Mono, wunde wunyekele kokisiri!»

⁴⁷Yesu bu kaba wakiri mu kwedzoonso, mono, Yuda mosi mu bo kuumi na bolo, nde watubuka na mpuumbu baatu yayinene bari na mambeesi mamala, na mboto. Bakuutu ba bangaanga-nzaambi na bakulu ba babakala ba kaanda babaheekiri.

⁴⁸Wunde waba muyekele, wabaheeri kidiimbu waleele ti: «Wunde wu nyinyumutina me, ngo nde, mubwiilee.»

⁴⁹Hanaho, Yuda bu kakokosolo kuri Yesu, waleele ti: «Mboto Muyikisi!» Na wamunyumutina.

⁵⁰Yesu waleele kuri nde ti: "Nduku yaami, mu bubwo ye wuri hamaha. Haho, bu bakokosolo, bamubwiilila na bamukaanga.

⁵¹Na mono, mosi mu baba kintwaari na Yesu, kayuulaa mbeesi yaandi yayila, walata kisari kya mukuutu bangaanga-nzaambi, wamutabula kutu.

⁵²Haho, Yesu waleele kuri nde ti: «Bvutula mbeesi yaaku ha kibeendu ki yibeeri; mukwongo, babo baholo mambeesi sa bafwiila mu mambeesi.

⁵³Buri ye bu tsimini ti, me lo nyahele kuyingukila taayi dyaami, mpisi nde kasuusa ha teke me, mu kilookolo ki, mikaangu mya bambasi myaluta kiteesu kya kuumi na myoolo?

⁵⁴Ngo buri bu kwendekele mu mana, mamo Matinu, ti buyelemini kuba bubwo?»

⁵⁵Mu kilookolo kinikyo, Yesu waleele kuri mampuumbu ti: «Beenu lupariryee na mambeesi mamala na mboto, mu kukaanga me, bunu ti me ngaa-bumfuna. Mpisi kiluumbu, me nyabee dzakala mu Nzo-nzaambi mu kuyikisa, ngo beenu lwasii kaanga me ko.

⁵⁶Kasi myominso mi mitubukiri mpisi heki matinu ma babikiri meende mu mana». Hanaho, bayiki baandi bamusisa na bayitika.

⁵⁷Bo bamana kukaanga Yesu, bamunata ku nzo Kayafa mukuutu bangaanga-nzaambi, kukwo kwaba kwakutukina batina ba mangisi na bakula ba babakala.

⁵⁸Petelo waba kwemunamaana kila-kila natee ku mbasi ya nzo mukuutu bangaanga-nzaambi. Bu kakoto kunsa-kati, wadzakala bo na bisari mu kumono manunu.

⁵⁹Bakuutu ba bangaanga-nzaambi, na kikuutu kyokinso baba sakaana kimbaangi kya mpya mu Yesu, mpisi bamudzusa.

⁶⁰Ngo basii baka bimbaangi byampya ko, ha kakati dya balaka baba kokosilaana. Mwaa-ntaangu bu yaluta, baatu boolo bakokosolo,

⁶¹baleele ti: «Wumawu wabee leele ti: "Me lo nsyaamini Nzo-nzaambi, na mu biluumbu bitatu mbweesiri kuyituunga."»

⁶²Mukuutu bangaanga-nzaambi, bu kateleme, waleele kuri nde ti: «Ye wahele kubvutula ntoono? Nkya kimbaangi bamaba bari mu kuleele mu ye?»

⁶³Yesu waba wawura. Mukuutu bangaanga-nzaambi waleele kuri nde ti: «Me nyikuloombo, mu nkuumbu ya Nzaambi ya mwooyo, tuleele mbuti ye ngo Kiristo, Mwaana Nzaambi.»

⁶⁴Yesu waleele kuri nde ti: «Ye leeriri. Ngo me nyileele kuri beenu ti: Kuholosono lumalu, beenu sa lumono Mwaana muutu wadzakala ha lubakala lwa mpinu, na wuri mu kwiisa mu matuti ma yulu.»

⁶⁵Haho, mukuutu bangaanga-nzaambi wakaakila binkuta byaandi, waleele ti: «Nde saanini Nzaambi, buri tubweese kuba kwaandi na nzala bambaangi? Mu lumalu beenu luyukiri nsaanunu.

⁶⁶Nkya mo lutsimini?» Bo babvutula, baleele ti: «Nde wayelemene mukesu wa lufwa.»

⁶⁷Bo bamufulula mante ku busu bwaandi, na bamulata mambata, bakaka bamusyaala mboto,

⁶⁸baleele ti: «Bikula mu beetu, Kiristo, leele na wukuleti?»

⁶⁹Petelo waba wadzakala kunsa mbasi. Kisari kimosi kya mukyeetu wakokosolo kuri nde, na waleele ti: «Ye se bee kintwaari na Yesu, wa ku Ngalili.»

⁷⁰Nde watuna ha busu bwa bobanso, waleele ti: «Me nyahele kuyaaba nkya mo ye wuri mu kudzoonso.»

⁷¹Bu kaba mu kweende ku teke mweelu, kisari kikimi kya mukyeetu kyamumono na kyaleele kuri baba haho ti: «Wumawu se bee kintwaari na Yesu, wa ku Nadzareti.»

⁷²Nde wabweese kutuna mu ndabulu maalu ti: «Me nyahele kuyaaba muutu wu!»

⁷³Mwaa-kidzika kyantele, baba haho bakokosolo na baleele kuri Petelo ti: «Ngwanwa, ye se wuri mosi mu bo, bukuri nzoonsulu ye yiri mu kusoongo.»

⁷⁴Hango, nde wabaandika mu kubula mampopi na kulaba ti: «Me nyahele kuyaaba muutu wu!» Na hanaho, mulumi nsusu wakookolo.

⁷⁵Petelo wabaambuka mwooyo mu musamu waba muleele Yesu ti: «Tekesele mulumi nsusu kakookolo, ye sa tuna me mbala tatu.» Na bu kapala ku mbasi, wadila mu ngebe.