Read Beembe Mat 27 Bible Online

Mat 27 - Beembe bible

Mat 27

¹Bwiisi bu bwakya, bakuutu ba bangaanga-nzaambi bobanso na bakulu ba babakala ba kaanda bakaanga mfuundu mu ntoono Yesu mpisi bamudzusa.

²Bamukaanga, bamunata na bamuyekele kuri Pilato, ngoforo.

³Yuda waba muyekele, bu kamono ti bakesiri Yesu mukanu wa lufwa, wayiinga bitsimi, wabvutula makuumi matatu ma mimpata kuri bakuutu ba bangaanga-nzaambi na bakulu ba babakala,

⁴waleele ti: «Me nyayirikiri masumu mu kuyekele muutu wahele kuyaaba ntoono!» Bo baleele ti: «Diri dyaambu dya beetu ko, ngo mikutariri!»

⁵Nde bu katuba mipata mu Nzo-Nzaambi, wapala, wayende kwa la, na waleleme.

⁶Bakuutu ba bangaanga-nzaambi, bu baholo mipata mimyo, baleele ti: «Kwahele miswa mu kweetuba myo mu kikebulu, bukuri ntalu makila.»

⁷Bu bakaanga mfuunda, basuumba mu mipata mimyo, nseke ya mubuumbi, mu mampeembe ma banzeense.

⁸Mu didyo, bakooteelaa nseke yiyo, «nseke ya makila» natee mu lumalu.

⁹Haho, ma leeriri mubikiri Yelemiya mayende mu mana, waleele ti: «Bo baholo makuumi matatu ma mipata — ntalu yiyo, baala ba Isaheli bari baleele, mu muutu wunde wu bari bakese ntalu —

¹⁰na bo baha mipata mimyo mu nseke mubuumbi, bunu bwaheeri Mfumu lutumu kuri me.»

¹¹Yesu bamutelemese ha busu bwa ngoforo; na ngoforo wamufuula ti: «Buri ye ngo mbyaasi Bayudayo?» Yesu waleele ti: «Ye wuleele.»

¹²Mu ntaangu yaba mufuundaa bakuutu ba bangaanga-nzaambi na bakulu ba babakala, nde kasii bvutula ntoono ko.

¹³Haho, Pilato kaleele kuri nde ti: «Buri ye wahele kuyuka myalaka mi bari mu kukufuundila?»

¹⁴Nde kasii leele ntoono ti mosi ko, mu kumuha mvutu, mu kiteesu kiri ngoforo wakimuka kwalaka.

¹⁵Mu mpisi munkeembu ngoforo waba na kifu kya kupalisaa boroko dimosi, bunu bwaba kutya kwa baatu.

¹⁶Haho, kwaba muutu mosi waba mu boroko, wayabakana, nkuumbu [Yesu] Baraba.

¹⁷Baatu bu baba bakutukina, Pilato wabafuula ti: «Beenu na lutiiri ti me nyilupatukila, [Yesu] Baraba hoti Yesu wubateelaa ti Kiristo?»

¹⁸Mukwongo, Pilato waba yaari ti mu musoki bamuyekiryee.

¹⁹Bu kaba kadzakala ha kibala kya mutsuundu, mukasi waandi wamuheeke mukeensu ti: «Yaa kuba musamu ko ha kakati dya ye na muutu wasuunguma wu, bukuri me mbaminyee kwalaka, lolodi mu ndosi mu ntoono nde.»

²⁰Bakuutu ba bangaanga-nzaambi na bakuutu ba babakala basinda mampuumbu mpisi baloombo Baraba na badzusu Yesu.

²¹Ngoforo wabvutula, waleele kuri bo ti: «Na mu bo boolo beenu lutiiri ti me nyilupatukila?» Bo babvutula ti: «Baraba!»

²²Pilato waleele kuri bo ti: «Heki me nki nyisa mu Yesu wu bakooteelaa ti Kiristo?» Bobanso baleele ti: «Kaba wakomunu ha kuruwa!»

²³Ngoforo waleele ti: «Nkya mamabi kari kayirika?» Bo bahamisa kubikisa baleele ti: «Kaba wakomunu ha kuruwa.»

²⁴Pilato kamonaa ti mufunu pe, ngo kasi kisaangila kiri mu kwisikila, waholo maampa, waswaaka myooko ha busu bwa mpuumbu, waleele ti: «Me nyiri na ntoono ko mu makila ma muutu wu. Mi lutariri beenu-meene.»

²⁵Baatu bobanso babvutula, baleele ti: «Makila ma nde mabwa mu beetu na mu baala beetu.»

²⁶Haho, nde kabapatukila Baraba, ngo kasi Yesu bamanaa kumulata nkwaasulu, Pilato wuyekiri mpisi kaba wakomunu ha kuruwa.

²⁷Haho, bayongolo ba ngoforo banata Yesu munsa nzo-mutsuundu, mpuumbu yoyinso yamukutukina.

²⁸Bu bamusyoonono binkuta, bamudziinga kiyuungu kyabeenge.

²⁹Bayirika mpu ya manseende, bamulwiika yo ku yulu mutu na bamusiiriri dyaari ha kooko kwa lubakala. Bu bamutsukumina, bamusiila munsiku, bamuleele ti: «Mboto yaaku, mbyaasi Bayudayo!»

³⁰Bamufulula mante, bahoriri dyaari, babekiri kumulata ha yulu mutu yaandi.

³¹Bamana kumusiila munsiku, bamusyoonini kiyuungu kyabeenge, babweesiri kumulwiika binkuta bya nde-meene, ha bamuneti mu kweemukomono ha kuruwa.

³²Bu bapala, bamono muutu mosi, wa ku Kirene nkuumbu yaandi Simoni, bamukwiikisa mpisi kanata kuruwa dya Yesu.

³³Batubuka ku kibeendu ki baleelaa ti Ngolongota, mbangukulu ti «Kibeendu kya kiteengi kya mutu.»

³⁴Bamunwiisa malu masaanga na nsoko-nyoongo. Bu kabiimba, kasii tya kunwa ko.

³⁵Bu bamana kumukomono ha yulu kuruwa, bakaba binkuta bya nde mu nteelu-wari,

³⁶na bu baba badzakala, bamukebe hanaho.

³⁷Baba basuusa ha yu-yulu dya mutu waandi, kooti dyaandi dyatinu ti: «Wumawu ngo Yesu, mbyaasi Bayudayo.»

³⁸Hanaho, bakomono se kintwaari na nde, bangaa-bubi boolo, mosi ku lubakala na mosi ku lumoso.

³⁹Baba lutaana haho, baba mutukaana, banyingisa mitu,

⁴⁰na baleele ti: «Ye mutsaamini nzo yangisi na mutuungi yo mu biluumbu bitatu, bvuuka ye-meene, mbuti ye ngo Mwaana Nzaambi [na] sunduka ha kuruwa.»

⁴¹Bwobumosi se bakuutu ba bangaanga-nzaambi, batini ba mangisi na bakulu ba bakala baba musiilana munsiku baleele ti:

⁴²«Nde wabvuukisiri bakaka, ngo wahele kubangisina kubvuukisa nde-meene; nde mbyaasi ya Isaheli, kasunduka mu lumalu ha kuruwa, na beetu tusa kanyi mu nde.

⁴³Nde wasiiri nsiitu mu Nzaambi, kamukuula lumalu, mbuti tiiri; bukuri nde waleeriri ti: "Me ngo Mwaana Nzaambi."»

⁴⁴Bwobumosi se bangaa-bumfuna baba komini kintwaari na nde, baba mutuka.

⁴⁵Kuholosono mu kilookolo kya bisaamunu natee mu kyawa, mampimbisi mabwa mu butoto bwobunso.

⁴⁶Bebele na kilookolo kyawa, Yesu wafula mu mbeembu yamakwa, waleele: «Eli, Eli, lema sabakatani?» Mbangukulu ti: «Nzaambi yaami, Nzaambi yaami, buri ye yekiri me?»

⁴⁷Babamosi baba bateleme haho, bu bayukiri baleele ti: «Wuri mu kuteele Eliya!»

⁴⁸Hanaho, mosi mu bo wadzumuna, waholo musasaka watsuuba mu bviinya dyansa wakaanga mu dyaari na wamunwiisa.

⁴⁹Bakaka baleele: «Hemesee tumonee kari tumi Eliya kamubvuukisa!»

⁵⁰Yesu wabweese kufula mu mbeembu yamakwa na wayakisa kiluunsi kyaandi.

⁵¹Na mono, nsaanda ya nzo yangisi yatyaabuka mu bibari byoolo, kuholosono ku yulu natee kunsuku, na butoto bwatembele, matari mabaarika.

⁵²Mampeembe myadzibulu, baatu balaka bangisi baba bafwa bafuluka.

⁵³Bu bapala mu mampeembe, ha mambisa ma mfulukulu yaandi, bakoto mu bvula dyangisi, na bamonokono kuri baatu balaka.

⁵⁴Mukutu nkama bayongolo na baba kintwaari na nde mu kukebe Yesu, bu bamono ntembukulu ya butoto na mamo maba yirimini, babaka boomo bwalaka, baleele ti: «Ngwanwa, wumawu wabeeri Mwaana Nzaambi!»

⁵⁵Kwaba bakyeetu balaka baba haho, baba talilaana. Bo baba kwefilaa Yesu, kuholosono ku Ngalili, bakwemusalila.

⁵⁶Mu bo, kwaba Mariya ma ku Mangadala, Mariya ma nguri Yakobo bo na Yosefi na nguri baala ba Dzebedayi.

⁵⁷Nsinsika bu yatubuka, mubakala mosi wa kisina, wa ku Arimatayi, nkuumbu yaandi Yosefi, wayisa. Nde se waba muyiki Yesu.

⁵⁸Bu kakokosolo kuri Pilato, wamuloombo nyutu Yesu. Pilato waha lutumu ti bamuha yo.

⁵⁹Yosefi, kamanaa kuholo nyutu wayidziinga kunsa mutulu watsyeeme.

⁶⁰Nde wasuusa yo mu bulu dyamoono dya nde-meene, di kahakiri mu tari. Bu kanengemese tari dyadinene mu kuduka bulu, nde wayende.

⁶¹Mariya ma ku Mangadala na Mariya makaka baba haho badzakala ha teke bulu.

⁶²Kiluumbu kyanama, kiri ha mambisa ma nyirimunu, bakuutu ba bangaanga-nzaambi na Bafarisi bakutukina ku nzo Pilato,

⁶³baleele ti: «Mfumu, beetu tubaambuka mwooyo ti mudziimbisi wunde, ha kabee mwooyo, waleeriri ti: "Ha mambisa ma biluumbu bitatu, me sa nyafuluka."

⁶⁴Hango, ha lutumu mpisi heki bakebe mampeembe natee mu biluumbu bitatu, mu kubata kuri ti bayiki baandi, bakwiisa kumuyiba, na kuleele kuri baatu ti: "Nde fulukiryee mu bafwa." Nzimbusulu yampotulu yiyo sa yibvula bubi ti na yatete.»

⁶⁵Pilato wabaleele ti: «Beenu luri na babo bakebe. Yendee lukebe bunu bu luyaabiri.»

⁶⁶Bo bayende, bakebe mampeembe, bakangimisa tari na batelemese bakebi.