Read Beembe Mat 28 Bible Online

Mat 28 - Beembe bible

Mat 28

¹Ha mambisa ma mpuumunu, mu minkya mya bwiisi bwa kiluumbu kyatete mu lumiingu, Mariya ma ku Mangadala na Mariya makaka, bayende kweetala ku mampeembe.

²Na mono ntembukulu ya butoto yayinene yabwa. Mukwongo, mbasi Mfumu yanangukina ku yulu yasunduka. Bu yakokosolo, yanengemene tari ha luteke na wadzakala ha yulu dyo.

³Nde waba semaa bunu nseremi, na kinkuta kyaandi kyaba kyahembeke bunu midiingi.

⁴Bakebi ba mampeembe bu bamumono, batekete mu boomo na baba beki bunu bafwa.

⁵Mbasi yabaangula mbeembu, yaleele kuri bakyeetu ti: «Beenu yaa luba na boomo ko, bukuri me nyaari ti, beenu luri mu kwesaka, Yesu wubakomini.

⁶Nde kasiiryee hamaha ko, bukuri fulukiryee bunu bu kaba leele. Wasee lumono kibeendu ki kabeeri.

⁷Na mu mawasu, bayende kweleele kuri bayiki baandi ti: "Nde fulukiryeenu mu bafwa, na mono, nde wulutekisiri ku Ngalili, kukwo beenu lumumono." Mamo, me nyiluleeriri.»

⁸Bu basasika mu mawasu na mampeembe, ku boomo ku kiminu kyalaka, badzumuna mu kweyaabisa bayiki baandi.

⁹Na mono, Yesu wababwaana waleele: «Mboto yeenu!» Bu bakokosolo kuri nde, bakwaata miilu mya nde, na bamutsukumina.

¹⁰Haho, Yesu waleele kuri bo ti: «Yaa luba na boomo ko. Yendee lwe luyaabisa kuri bampaangi ba me, beende ku Ngalili, kukwo bamono me.»

¹¹Bu bari mu kweende, mono babamosi mu bakebi bayisiri kunsa bvula, bayaabisa bakuutu ba bangaanga-nzaambi momanso mayirimini.

¹²Bakuutu ba bangaanga-nzaambi na bakulu ba babakala bakutukina na basa mfuundu. Bu baholo mipata myafwaana, baha kuri bayongolo,

¹³baleele ti: «Leeleenu ti bayiki baandi biisiryee kumuyiba mu butsuku, beetu bu tubeeri tolo.

¹⁴Na mbuti Ngoforo yukiri mamama, beetu sa twayukisa [nde], beetu sa twasa kuri ti beenu luhele kubaka dyaambu.»

¹⁵Bo baholaa mipata, bayirikiri bunu bu babayikisiri. Musamu wunde watsamikina kuri Bayudayo natee mu kiluumbu kya lolo.

¹⁶Bayiki bo kuumi na mosi bayende ku Ngalili, ku mulaandu waba batuma Yesu.

¹⁷Bo bamumono, bamutsukumina, ngo kasi baba na mpaka.

¹⁸Yesu bu kokosolo, waleele kuri bo ti: «Lutumu lwolunso baheeri kuri me, ku mayulu na ha butoto.

¹⁹Hango, bu lukweende, seenee makaanda momanso bayiki, mu kubabotoko mu nkuumbu ya Taata, na ya Mwaana, na ya Mpeeve Yangisi,

²⁰mu kubayikisa kukebe momanso ma nyabee lutumana. Na mono, me nyiri kintwaari na beenu, mu biluumbu byobinso, natee ku manunu ntaangu.»