Read Beembe Mat 3 Bible Online

Mat 3 - Beembe bible

Mat 3

¹Mu biluumbu bibyo, Yowane Mubotiki wamonoko mu nsi yankatu ya Yudaya, mu kwebikisa

²[na] kweleele ti: «Yiingee madyeele, bukuri Kimfumu kya mayulu kikokisiri.»

³Mu nde, Esaya mubikiri kaba dzoonsolaana ha kaba leele ti: «Mbeembu ya wunde wukwebikisa mu nsi yankatu ti: Yirikeenu munsaku Mfumu, suungukeenu manzila maandi!»

⁴Nde, Yowane, waba na kinkuta kya myoosi mya kamelo, na musweele wa mukaanda kibulu mu luketu lwaandi. Nde waba kwedya bambambala na maasi ma nyosi ya ku bitiiti.

⁵Bari Yerusalemi bobanso, bari Yudaya, na bari mu nkoonsi yoyinso ya Yorodani, baba kweendaa kuri nde,

⁶na nde waba babotokaana mu nyari ya Yorodani mu ntambukulu masumu maaku.

⁷Bu kamono Bafarisi balaka na Basaduki baba kwiisaana mu kuri ti nde kababotoko, wabaleele ti: «Kitsuumbu kya bampiri, na walusoongiri bwa kuyitikila nkesi dziri mu kwiisa?

⁸Soongeenu biyiriki byayelemene na nyiingulu madyeele,

⁹na yaa lubeke kweleele mu beenu-meene ko ti: "Taayi dya beetu Abalaami." Bukuri me nyiluleele ti: mu matari ma lo Nzaambi telemisi baala kuri Abalaami!

¹⁰Kikuba kyeki kyasuusa ha yulu myaansi mya muti; ngo mpisi muti wahele kubuta bimbutu byabibwete, lo wa kutabala na wa kutuba ku mbaawu.

¹¹Me nyilubotoko mu maampa mu ntoono nyiingulu madyeele; ngo wunde wukwiisa ku mambisa ma me, bvuriri makwa na me, me nyahele kukuka mu kusyonono masapaatu ma nde. Nde sa kalubotoko mu Mpeeve Yangisi na mu mbaawu.

¹²Nde wuri na kiyengese mu kooko kwaandi, sa kakoombolo mbasi yaandi, sa kakutukisa mankono maandi ku yulu talaka, ngo sa kayoko bitiiti ku mbaawu yiri yadzimaa ko.»

¹³Yesu kafumuna ku Ngalili, wiisiri ku Yorodani kuri Yowane, mpisi Yowane kamubotoko.

¹⁴Kasi Yowane wamutungukula, wamuleele ti: «Me nyiri na nzala kutaambula mbotokulu kuri ye; kasi ye ngo weki kwiisa kuri me?»

¹⁵Yesu wabvutula, waleele kuri nde ti: «Hemese mu lumalu; bukuri bubwo bwayelemene kuri beetu na ye mu kukukisa nsungumunu yoyinso.» Haho, Yowane wataambula.

¹⁶Yesu na kumubotoko na kutoomboko ku nkoto; na mono, mayulu madzibuma [mu ntoono ya nde], na nde wamono Mpeeve ya Nzaambi yakulumuka, bunu beembe [na] yayisa ha yulu nde.

¹⁷Na mono, mbeembu ya nangukina ku mayulu yaleele ti: «Wumawu ngo mwaana waami wa mutima; mu nde me nyimonaa kiminu.»