Read Beembe Mat 5 Bible Online

Mat 5 - Beembe bible

Mat 5

¹Yesu bu kamono mampuumbu, watoomboko ku yulu mulaandu, na bu kadzakala, bayiki baandi bakokosolo kuri nde.

²Bu kabaangula mbeembu, wayikisa, waleele ti:

³«Kiminu kiri na ba bawelu mu mpeeve, bukuri Kimfumu kya mayulu kya bo!

⁴Kiminu kuri bari mu ngebe, bukuri sa bababoondo!

⁵Kiminu kuri bari na bundeembu, bukuri bo sa bataambula butoto bunu saala!

⁶Kiminu kuri bari na nzala na mpwiisu ya nsungumunu, bukuri sa bayukuta!

⁷Kiminu kuri bari na mutima wangebe, bukuri sa bababakila ngebe!

⁸Kiminu kuri batsyeemeke mu mitima, bukuri bo sa bamono Nzaambi!

⁹Kiminu kuri basalila kiyeengi, bukuri sa babateele ti baala ba Nzaambi!

¹⁰Kiminu kuri ba bari mu kwekwaamisa mu ntoono ya nsungumunu, bukuri Kimfumu kya mayulu kya bo!

¹¹Kiminu kuri beenu mbuti baatu balutuka, balukwaamisa, na baleele momanso mamabi [mampya], mu beenu, mu ntoono me.

¹²Monee kiminu na keembeenu kweenu, bukuri museendu weenu wuri wamunene mu mayulu; mukwongo, bunubwo se bakwaamisini babikiri batekisiri na beenu.»

¹³«Beenu luri mungwa butoto; mbuti mungwa weki wahele nyeke, lo mu nki babweese kumubvutukila nyeke? Lo kasii mufunu ko, bisiiri lo kunu kumulooso ku mbasi, ku kaba wadyaatu kuri baatu.»

¹⁴«Beenu luri buungi bwa nsi. Bvula diri ha yulu mulaandu dikoobaanaa dyasweeme ko.

¹⁵Bakoonamukaa mwiinda mu kumufuka kunsa mpiri ko, ngo mu kumusuusa ha yulu kitetukulu kya mwiinda, mpisi kaseme kuri bobanso bari munsa nzo.

¹⁶Hemesee buungi bwa beenu buseme ha busu bwa baatu, mpisi bamono biyiriki byeenu byabibwete, na bakeembese Taayi dyeenu diri mu mayulu.»

¹⁷«Yaa lutsima ko ti me nyayisa mu kunyanguna mangisi bunu pe babikiri; me nyahele kwiisa mu kunyanguna, ngo mu kukukisa.

¹⁸Mu ngwanwa me nyiluleele, natee buluta yulu na butoto, lo ti kisoni kiri nkuumbu i, bunu pe ti mpita mosi yiyaaluka mu mangisi ko, natee momanso mayirimini.

¹⁹Ngo mbuti muutu sinini lutumu ti lumosi mu ntumu dzibvuriri buntele, na yikisiri se kuri baatu mu kusa bubwo, lo sa bamuteele ti wubvuriri buntele mu Kimfumu kya mayulu. Ngo wunde wumasalila, na wumayikisa, lo sa bamuteele ti mukuutu mu Kimfumu kya mayulu.

²⁰Mukwongo, me nyiluleele ti: mbuti nsungumunu yeenu yahele kubvula ti na ya batini ba mangisi na Bafarisi, lo beenu luri nkotulu mu Kimfumu kya ma mayulu ko.»

²¹«Beenu lwayuka ti, baleele kuri bakuutu ti: "Yaa dzusa ko; ngo wunde wudzusa, lo yelemini kuba watsuundusu."

²²Ngo me nyiluleele ti: mpisi wunde wubakila mpaangi yaandi nkesi, lo yelemini kuba watsuundusu. Wunde wuleele kuri mpaangi yaandi ti: "kiwulu!", lo yelemini kuba watsuundusu kuri kikuutu; Wunde wuleele kuri mpaangi yaandi ti: "Kilawuku!", lo mukesu, lubila lwa mbaawu.

²³Ngo mbuti ye wuri mu kuha kikabu ha yulu dziku, na baambukiri mwooyo ti mpaangi yaaku wuri na kooti mu ye,

²⁴lo suusa kikabu kyaaku ha teke dziku haho, na yende tekesele kuyukusuna na mpaangi yaaku, tumi wiisa ha kikabu kyaaku.

²⁵Wasula na kuyukusuna na wunde wu luri lwabakana, mu ntaangu yi lwakiri mu nzila, mu kubata kuri ti wunde wu luri lwabakana kakwiisa kukuyekele kuri mutsuundisi; na mutsuundisi kuri muyongolo, na bakusoko mu boroko.

²⁶Ngwanwa me nyikuleele ti, ye wuri mpalila mumwo ko, natee wakiri kufuta mwaa-mupata wampotulu.»

²⁷«Beenu lwayuka ti dyaleelu ti: "Yaa ta kimpala ko!"

²⁸Ngo me nyileele ti: mpisi wunde wutala wa mukyeetu mu kumunyiima, lo mwaata kimpala na nde kunsa mutima waandi.

²⁹Mbuti diisu dyaaku dya lubakala dibwiisa ye mu masumu, lo yisila dyo na looso dyo la na ye, bukuri bubvuriri bubwete kuri ye, mu kufuukisa kinamu kimosi mu binamu byaaku, mpisi heki nyutu yaaku yoyinso yihele kuba yatubu ku lubila.

³⁰Mbuti kooko kwaaku kwa lubakala kubwiisa ye mu masumu, lo taabala kwo na looso kwo la na ye, bukuri bubvuriri bubwete kuri ye, mu kufuukisa kinamu kimosi mu binamu byaaku, mpisi heki nyutu yoyinso yihele kweende ku lubila.»

³¹«Dyaleelu se ti: "Mbuti muutu wubinga mukasi waandi, lo kamuha mukaanda wa nzusulu makweele."

³²Ngo me nyiluleele ti: mpisi wunde wubinga mukasi waandi, mbuti ka kuri wabwa mu mvuutunu yadika ko, lo nde wumusinda mu kuta kimpala; na mbuti muutu kweeriri mukyeetu wu bamwaabinga, lo nde teeri kimpala.»

³³«Beenu lwabweese kuyuka ti dyaleelu kuri bakuutu ti: "Yaa sinina maalu maaku ko, ngo ye yelemini kubvumina maalu maaku ha busu bwa Mfumu."

³⁴Ngo me nyiluleele ti: Yaa lulaba maalu ti mu ntaangu mosi ko, ti mu yulu, bukuri yulu ngo mboloko Nzaambi,

³⁵ti mu butoto, bukuri butoto ngo nkata miilu myaandi; ti mu Yerusalemi, bukuri didyo ngo bvula dya Mbyaasi yayinene.

³⁶Yaa laba maalu mu mutu waaku ko, bukuri ye lo wubangisina kuhembekese, bunu pe kupiindisa lufu ti lumosi ko.

³⁷Nzoonsulu yaaku yiba mbuti "heehe", lo "heehe", mbuti "pele", lo "pele"; mi babweese kuleele ha yulu haho, lo mya Ngaa-bubi.»

³⁸«Beenu lwayuka dyaleelu ti: "Diisu mu diisu, na diinu mu diinu."

³⁹Ngo me nyiluleele ti: yaa lutuungukila ngaa-bubi ko. Ngo muutu kakulata mbata ha tama [dya ye] dya lubakala, lo taamba se na dya kaka.

⁴⁰Kuri muutu wutiiri kunata ye ku muyalu, na kuholo kinkuta kya ye, lo hemese kaholo se na kiyuungu kyaaku.

⁴¹Mbuti muutu wukukwiikisa mu kudyaata fuunda dimosi dya bitaki na nde, lo dyaata mafuunda moolo na nde.

⁴²Kuri muutu wukuloombo, lo muha; na kuri wunde wutiiri kusoombo kuri ye, lo yaa mutekele mbisa ko.»

⁴³«Beenu lwayuka, dyaleelu ti: "Tya mbaasi yaaku, na bele mutaatu waaku."

⁴⁴Ngo me nyiluleele ti: Tyeenee bataatu beenu, na saambilee mu babo bakwelunwaanisa,

⁴⁵mpisi luba baala ba taayi dyeenu diri ku mayulu, bukuri nde wuteekisaa mwiini waandi ha yulu bababi, na ha yulu bababwete, na wunokisaa mvula ha yulu basuunguma, na ha yulu bahele kusuunguma.

⁴⁶Bukuri mbuti beenu kutya bani ba koolutyaana, lo nkya museendu beenu lutaambula? Buri batori ba mpaku bo se kari bunubwo bakoosaanaa ko?

⁴⁷Na mbuti beenu mboto kweha kunu kuri bampaangi beenu kitsu, lo nki beenu lusiiri bibvuriri? Buri bangooyi se kari bunubwo bakoosaanaa ko?

⁴⁸Hango beenee bayirima kwakuka, bunu buri Taayi dyeenu diri ku mayulu nde wayirima kwakuka.»