Read Beembe Mat 7 Bible Online

Mat 7 - Beembe bible

Mat 7

¹«Yaa lwetsuundisa ko, mpisi luhele kuba batsuundusu;

²bukuri mutsuundu wu lutsuundisa beenu, wunu nde se batsuundisila beenu; na kiteesu ki luteesele beenu kinikyo se baluteesele.

³Buri ye wutala kisesengu kiri mu diisu dya mpaangi yaaku, ngo kasi ye wahele kumono mubaangu wuri mu diisu dyaaku?

⁴Bunu pe buri ye wutsiitsa kuleele kuri mpaangi yaaku ti: "Hemese me nyisila kisesengu kiri mu diisu dya ye", kuri ye-meene wuri na mubaangu mu diisu dyaaku;

⁵ngaa-bumpitu-bumpyoongo, tekesele kuyusula mubaangu wuri mu diisu dyaaku, tumi yemono na kyensekelee bwa kuyisikila kisesengu kiri mu diisu dya mpaangi yaaku.»

⁶«Yaa luha byangisi kuri bambwa ko, yaa lulooso misaanga myeenu kuri bangulu ko, mu kubata kuri ti bakwiisa kumidzabata mu miilu myaaku, na balutsyetikilaana, balukaakiri.»

⁷«Loombeenu na sa baluha, sakeenu na sa lwadzuukila, komboteenu na sa baludzubukila;

⁸bukuri mpisi wunde wuloombo, lo taamburi, wusaka, lo dzuukiri, na kuri wukomboto, sa bamudzibukila.

⁹Nkya muutu mu beenu wuri mwaana kamuloombaa mpa, nde kumuha tari?

¹⁰Bunu pe, kamuloombaana nsu, nde kumuha nyoko?

¹¹Ngo mbuti, beenu bangaa-bubi, luyaari kuha bikabu byabibwete kuri baala beenu, lo Taayi dya beenu dya ku yulu, buri kahele kuha bitotolo bibvuriri bubwete kuri babo bamuloombo.»

¹²«Ngo, myominso mi lutiiri ti baatu balurikila, yirikeenu bumosi kuri bo, bukuri mamo ngo mangisi na babikiri.»

¹³«Koteenu mu mweelu wasweeteme, bukuri mweelu wamunene na nzila yasaalila binataa ku nzimbukulu, na balaka bari mu kweendaa mu yo.

¹⁴Nkati mweelu wasweeteme na nzila se yasweeteme yinataa ku bumwooyo, na baatu bantele badzuukila yo.»

¹⁵«Seenee madyeele mu babikiri ba mampya, bo bari mu kwiisa kuri beenu kuri balwaata mikaanda mya bimeeme, ngo kunsa-kati bango-mbulu bansisi.

¹⁶Beenu sa lwabayaabila mu bimbutu byaaku. Buri lo bakaburi biburi mu mpaanga bunu pe ngenge mu munsensende?

¹⁷Hango, mpisi muti wamubwete kubutaa bimbutu byabibwete; ngo kasi muti wamubi, kubutaa bimbutu byabibi.

¹⁸Muti wamubwete kari kubutula bimbutu byabibi ko; bwobumosi seenee mu muti wamubi, kari kubutula bimbutu byabibwete ko.

¹⁹Mpisi muti wahele kubuta bimbutu byabibwete, lo wa kukwaanga na wa kutuba ku mbaawu.

²⁰Hango, beenu sa lwabayaabila mu bimbutu bya bo.»

²¹«Kari mpisi wuleelaa kuri me ko ti: "Mfumu, Mfumu", wukoto mu Kimfumu kya mayulu; ngo wunde wuyirikaa kutya kwa Taayi dya me diri ku mayulu.

²²Baatu balaka sa baleele kuri me mu kiluumbu kikyo ti: "Mfumu, Mfumu, beetu twabikiri mu nkuumbu ye, twabingisiri mampeeve mamabi mu nkuumbu ye, na twayirikiri bimaangu byalaka mu nkuumbu ye."

²³Haho, me sa nyaleele kuri bo ti: "Me nyahele kuluyaaba ti mu ntaangu mosi! Sasikeenu ha teke me, beenu bangaa-bubayi!"»

²⁴«Mpisi muutu wuyuka maampu ma me mamama, na wumasariri, lo sa bamufwanikisa na muutu walubuka, watuunga nzo yaandi ha yulu tari.

²⁵Mvula yanoko, manyari mabuukila, biteembu byateleme na byanyingisa nzo yiyo, ngo yahele kubwa, bukuri yatuungu ha yulu tari.

²⁶Ngo mpisi wuyuka maampu ma me mamama, ngo wahele kumasalila, lo sa bamufwanikisa na muutu wakiwulu, watuunga nzo ha yulu munyeenge.

²⁷Mvula yanoko, manyari mabuukila, biteembu byateleme na byanyingisa nzo yiyo. Nzo yabwa na yawa kutsamukina.»

²⁸Yesu kamana kuleele mamo, mampuumbu ma baatu makimuka mu nyikusulu dzaandi;

²⁹bukuri nde waba bayikisilaa bunu wunde wuri na lutumu, nkani ka bunu batini ba mangisi ba bo ko.