Read Beembe Mat 8 Bible Online

Mat 8 - Beembe bible

Mat 8

¹Yesu kamanaa kusunduka ku yulu mulaandu, mampuumbu malaka mamunama.

²Mubeeru bwaasi wayisa kuri nde, watsukuma ha busu bwa nde, na wamuleele ti: «Mfumu, mbuti ye tiiri, lo ye tsyemikisi me.»

³Yesu kalaambula kooko, wumubelemini na leeriri ti: «Me ntiiri, ba watsyeemeke.» Na hanaho, nde watsyeemeke mu bwaasi bwaandi.

⁴Yesu waleele kuri nde: «Wuyuka! Yaa leele kuri muutu ti mosi ko. Ngo yende wemonokono ye-meene kuri ngaanga-nzaambi, na nata kikabu kya tuma Moose, mpisi kiba kimbaangi kuri baatu.»

⁵Bu kakoto ku Kafarnawumi, mukuutu nkama bayongolo mosi wayende kuri na wamuyingukila,

⁶na waleele ti: «Mfumu, kisari kya me waneŋene munsa nzo, wabwa mambwolokoto na wuri mu kubama nkati kwa makwa.»

⁷Yesu wabvutula kuri nde ti: «Me nyikweende, nyimutsinikisa.»

⁸Mukuutu nkama bayongolo wabvutula waleele ti: «Mfumu, me nyahele kuyelemene mu kuri ti ye koto mu nzo me. Ngo leele kwaandi ntoono mosi kitsu, lo kisari kya me bee kitsiinikini.

⁹Mukwongo, me muutu nyiri kunsa lutumu, ngo me-meene se nyiri na bayongolo kunsa lutumu lwa me. Me ndeelaana kuri wumawu ti: "Yende", lo nde weensi; na wakaka ti: "Wasa", lo wiisiri; na kuri kisari kyaami ti: "Yirika mamama", lo yirikiri.»

¹⁰Yesu kayukaa bubwo wakimuka, na waleele kuri baba kwemunamaana ti: «Ngwanwa me nyiluleele ti: Me nyamwiini mu Isaheli muutu wuri na kanyi dyadinene dya bumabu ko.

¹¹Me nyileele kuri beenu ti, baatu balaka sa bafumuna ku este, na ku weste, sa biisa na sa badzakala mu kudya kintwaari na Abalaami, na Isaki na Yakobe, mu Kimfumu kya mayulu.

¹²Kasi baala ba Kimfumu sa babatuba ku mampimbisi ma ku mbasi; kukwo kuba bidilu na nkweetulu miinu.»

¹³Yesu waleele kuri mukuutu nkama bayongolo ti: «Yende, buba kuri ye, bunu busiiriri kanyi mu kilookolo kinikyo, kisari [kyaandi] kyatsiinika.»

¹⁴Yesu bu kayende ku nzo Petelo, wamono nguri mukasi Petelo waneŋene, wabeele baawu.

¹⁵Yesu wabelemene kooko kwa nde, na baawu dyawa. Nde wateleme, na wabeke mu kubasalila.

¹⁶Nsinsika bu yatubuka, batwaala kuri Yesu, baatu balaka baba na mampeeve mamabi; na nde mu kitoolo kimosi wabinga mampeeve, na watsinikisa babeeru,

¹⁷Mpisi heki ma leeriri mubikiri Esaya meende mu mana. Nde ti: «Nde waholo bipfuumi byeetu na wanata mabeeru meetu.»

¹⁸Yesu kamonaa mpuumbu baatu mu teke nde, waha lutumu lwa kweende ku simu dya mubu dyakaka.

¹⁹Mutini mangisi mosi wayisa na wamuleele ti: «Muyikisi, me sa nyanama ye mpisi ku wukwe.»

²⁰Yesu waleele kuri nde ti: "Mibaku miri na miduku, na banoni ba yulu bari na madzaansa; ngo kasi Mwaana muutu wahele na ha kusuusa mutu".

²¹Mosi mu bayiki [baandi] waleele kuri nde ti: «Mfumu, ha me miswa me tekeseleeti kweedziika taata.»

²²Yesu wabvutula kuri nde ti: «Nama me. Hemese bafwa bedziika bafwa baaku bo-meene.»

²³Bu kanwaata mu bwaatu, bayiki baandi se bamunama.

²⁴Butoto bwatembele mu makwa kunsa mubu, kuri bwaatu bweki dyaama mu mipaku, ngo kasi nde waba tolo.

²⁵Bakokosolaa kuri nde, bamusiimbiri, na bamuleeriri ti: «Mfumu, bvuukisa beetu, beetu tufuukiri!»

²⁶Nde waleele kuri bo ti: «Buri beenu luri na boomo, baatu ba kanyi dyantele?» Hanaho, bu kateleme, nde waŋaŋana kiteembu na mubu. Na kidzuunu kyakinene kyayisa.

²⁷Baatu bakimuka baleele ti: «Nkya muutu wu, bukuri biteembu na mubu bitumuma kuri nde?»

²⁸Yesu ba katubuka ku simu dya mubu dyakaka, mu nsi ya Ngadareno, baatu boolo baba na mampeeve mamabi bapala kunsa mampeembe, bamubwaana. Baluula mu kibakala, kuri muutu ti mosi haba lo kubangisina pe kulutila mu nzila yiyo.

²⁹Mono, bo babeke mu kufula misaakulu, baleele ti: «Nki ha kakati dya ye, Mwaana Nzaambi, na beetu? Buri ye wiisiri mu kukwaamisa beetu tekekesele ntaangu yitubuka?»

³⁰La na bo, kwaba mpuumbu bangulu yayinene yaba mu kwedya.

³¹Mampeeve mamabi mayingukila Yesu maleele ti: «Mbuti ku mbasi ye wutubinga, lo tuheeke kweetu mu mpuumbu bangulu yi.»

³²Yesu waleele kuri bo ti: «Yendee!» Mampeeve mamo mapala na makoto mu bangulu. Na mono, mpuumbu bangulu yoyinso yabununa ku nsuku mulaandu yabwa mu mubu, na yafwiila mu maampa.

³³Baba kwekebe bangulu bayitika, babvutuka ku bvula, bayaabisa myominso mimyo, na mayirimini mu baatu baba na mampeeve mamabi.

³⁴Na mono, bvula dyodinso dyapala mu kubwaana Yesu, na bu bamumono, bamuyingukila mpisi kapala mu nkoonsi bo.