Read Beembe Mat 9 Bible Online

Mat 9 - Beembe bible

Mat 9

¹Yesu kanwaataa mu bwaatu, wayende ku simu dya mubu dyakaka, na watubuka ku bula bwa nde-meene.

²Baatu batwaala kuri nde kikata kimosi kyaneŋesene ha nkwaala. Yesu kamonaa kanyi dya bo, waleele kuri kikata ti: «Lwaata kibakala mwaana me! Masumu maaku mabakiri mpemisi!»

³Na mono, babamosi mu batini ba mangisi, baleele kunsa mitima ti: «Muutu wu, wuri mu kusaana Nzaambi!»

⁴Yesu bu kabakula bitsimi bya bo, waleele ti: «Buri luri na bitsimi byabibi kunsa mitima myeenu?

⁵Nki bibvuriri kuleenge? Kuleele ti: "Masumu maaku mabakiri mpemisi", hoti kuleele ti, "Teleme na yende?"

⁶Mpisi heki, beenu luyaaba ti Mwaana muutu wuri na lutumu, ha butoto mu kuhemesene masumu.» Haho nde kaleele kuri kikata ti: «Teleme, holo nkwaala yaaku, na yende ku nzo yaaku.»

⁷Muutu wunde katelemaa, weensi ku nzo yaandi.

⁸Mampuumbu, bu bamono bubwo, babaka boomo na makeembese Nzaambi, waheeri lutumu lwa bubwo kuri baatu.

⁹Yesu, bu kaba mu kuluta, wamono muutu mosi, nkuumbu Matayi wadzakala ha kibeendu ki batolaa mpaku. Yesu waleele kuri nde ti: «Nama me!» Bu kateleme, wamunama.

¹⁰Bu kaba mu kudya mu nzo, mono, batori ba mpaku balaka na bangaa-masumu bayisa mu kudya kintwaari na Yesu na bayiki baandi.

¹¹Bafarisi, bamonaa bubwo, baleele kuri bayiki baandi ti: «Muyikisi beenu, buri kari mu kudya kintwaari na batori ba mpaku na bangaa-masumu?»

¹²Yesu bu kayuka bubwo, waleele ti: «Babatsiina bahele na nzala ngaanga, ngo babeele.

¹³Yendeenu luyika dyaambu dimadi: "Mutima wangebe me ntiiri, nkani ka nzusulu bibulu mu bikabu ko." Bukuri, me nyahele kwiisa mu kuteele basuunguma, ngo bangaa-masumu.»

¹⁴Bayiki ba Yowane bayende kuri Yesu na bamufuula ti: «Bukuri nki, beetu na Bafarisi tukotaa loomi [kwalaka]; ngo bayiki ba ye bakookotaa loomi ko?»

¹⁵Yesu wabvutula kuri bo ti: «Buri bilesi bya makweele lo bakotiri mu ngebe, mu ntaangu yoyinso yiri mukweeri, wuri kintwaari na bo? Ngo biluumbu sa biisa, mu ntaangu yiri mukweeri bamuyusiri ha kakati dya bo, mu ntaangu yiyo, bo bakoto loomi.»

¹⁶«Kuri muutu ko wuloondaana kinkuta kyakikulu, mu kiteendi kya nsaanda yamoono. Bukuri lo kiteendi kya nsaanda yamoono, lo kikaakiri kinkuta, na kinkuta lo kihamisini kutyaabuka.

¹⁷Bakoosekelaa malu mamono mu bimpokoro byabikulu ko. Bukuri lo malu maluukisiri bimpokoro. Malu lo matsaamukini, na bimpokoro se bibvukini. Ngo malu mamoono kusekele mu bimpokoro byamoono, na byo byoolo babikebiri.»

¹⁸Yesu, bu kari mu kubaleelaa misamu mimyo, mono, mfumu mosi wayisa, watsukuma ha busu bwa nde, waleele ti: «Mwaana me wa mukyeetu, weki mu kufwa; ngo wasa wumutetekele myooko, na nde sa kaba mwooyo.»

¹⁹Yesu bu kateleme wamunama kintwaari na bayiki baandi.

²⁰Na mono, mukyeetu mosi waba kwepalaana makila mu kiteesu kya mibvu kuumi na myoolo. Wayisa mambisa-mambisa na wabelemene heengu dya kinkuta kya Yesu.

²¹Nde waba leele kunsa mutima ti: «Mbuti me belemini kwaandi ti kinkuta kya nde, lo me bvuukiri».

²²Yesu bu kasyeeteke, wamumono mukyeetu wunde, na wamuleele ti: «Lwaata kibakala, mwaana waami, kanyi dyaaku dikubvuukisiri.» Kubandikila mu kilookolo kinikyo, mukyeetu wunde wabvuuka.

²³Yesu bu kaba mu kweende ku nzo mfumu, wamono basika ba nseembe, na mpuumbu baatu yiri mu kubununa.

²⁴Nde waleele ti: «Sasikeenu, bukuri mwaana mukyeetu wahele kufwa, ngo wuri mu kubwa tolo.» Ngo baatu basiila Yesu munsiku.

²⁵Mpuumbu yimanaa kupala ku mbasi, Yesu wakoto mu nzo, wakwaata kooko kwa mwaana, na mwaana mukyeetu wasiimbuka.

²⁶Mvuumfu yatsamukina mu nkoonsi yoyinso yiyo.

²⁷Yesu, bu kaba mu kuyooko, baatu boolo bafwa miisu banama [nde] kuri bakwefula misaakulu ti: «Bakila beetu ngebe, mwaana Davidi!»

²⁸Yesu kakota mu nzo, bafwa miisu bayende kuri nde, na nde waleele kuri bo ti: «Beenu lusii kanyi, ti me lo nyirikiri bubwo?» Bo babvutula kuri nde ti: «Heehe, Mfumu.»

²⁹Haho, nde wabelemene miisu mya bo, na waleele ti: «Miyirima mu beenu bunu buri kanyi dyeenu!»

³⁰Miisu mya bo myadzibuma. Yesu wabadzoonsolo mu kibakala waleele ti: «Yirikee kuyuka! Muutu ti mosi ya kayaaba ko.»

³¹Ngo kasi bo bapalaa batsamukisa mvuumfu Yesu mu nkoonsi yoyinso.

³²Bo, bu baba mu kupala, mono, batwaala kuri Yesu muutu mosi wababa waba na mpeeve yayibi.

³³Yesu kamanaa kupalisa mpeeve yayibi, baba wadzoonso. Mampuumbu ma baatu makimuka na baleele ti: «Twamwii mya bu mu Isaheli ko!»

³⁴Ngo Bafarisi baleele ti: «Mu mpinu dza mukuutu mampeeve mamabi, nde kari mu kwepalisa mampeeve mamabi!»

³⁵Yesu waba kweyendaana, mu mabvula momanso na mu mabula, kuri wukweyikisa munsa manzo ma nkutukunu ma bo, wukweyaabisa Musamu Wamubwete wa Kimfumu, na wukwetsinikisa mabeeru momanso na bipfuumi byobinso.

³⁶Bu kamono mampuumbu ma baatu, nde wamono ngebe kunsa mutima, mu ntoono baatu babo, bukuri baba beki makwa pe, na bari na ngebe bunu bimeeme byahele na mutari.

³⁷Haho, Yesu waleele kuri bayiki baandi ti: «Byakutolo munsa nseke byalaka, ngo bangaamba bantele.

³⁸Ngo loombee kuri ngaa-nseke, kaheeke bangaamba bakweetolo nseke yaandi.»