Read Beembe Mal 10 Bible Online

Mal 10 - Beembe bible

Mal 10

¹Yesu kayisikaa haho, weensi mu mankoonsi ma Yudaya, [na] ku simu dya Yorodani. Mampuumbu ma baatu mabweese kukutukuna ha teke nde, na bunu bwaba kifu kyaandi, nde wabweese kubayikisa.

²Bafarisi bu bakokosolo kuri nde, bamuha kifuuri mu kumutsiitsa: «Buri kuri miswa kuri mulumi, mu kubinga mukasi waandi?»

³Yesu wabvutula kuri bo ti: «Moose nki kari kalutuma?»

⁴Bo babvutula ti: «Moose waha miswa mu kutina mukaanda wa nzusulu makweele na kubinga mukasi.»

⁵Yesu wabweese kuleele kuri bo ti: «Mu ntoono nkubulu mitima myeenu, ngo Moose kalutinini ngisi yiyo.

⁶Kunu mbandukulu yulu na butoto, Nzaambi wayirikiri "bakala na mukyeetu;"

⁷"mu ntoono yiyo, bakala sa kasiisa taayi na nguri yaandi [na sa kakaangama mu mukasi waandi],

⁸na bo boolo sa baba muswinyi mosi, kuri lo basii boolo ko, ngo muswinyi mosi."

⁹Ngo bibyo biri Nzaambi wabibvuuta, muutu yaa kabihaambila ko.»

¹⁰Babaanaa beki ku nzo, bayiki baandi babweese kumuha kifuuri mu musamu wunde.

¹¹Yesu wabvutula kuri bo ti: «Mubakala wubinga mukasi waandi, na kweeriri mukyeetu mukimi, lo teeri kimpala ha busu bwa mukasi watete.

¹²Na mbuti mukyeetu bingiri mulumi waandi, na kweeriri bakala dikimi, lo nde teeri kimpala.»

¹³Baatu banata mwaa-baala kuri Yesu, mpisi nde kababelemene, ngo bayiki baandi babaŋaŋina.

¹⁴Yesu wamono dyo ti bwabubi, na waleele kuri bayiki baandi ti: «Hemesee mwaa-baala biisa kuri me. Yaa lubakakisila ko, bukuri Kimfumu kya Nzaambi kiri kya bafwaanikina na bo.

¹⁵Mu ngwanwa, me nyiluleele ti: Mpisi wunde wuhele kutaambula Kimfumu kya Nzaambi bunu mwaa-mwaana, lo ka kakoto mu kyo ko.»

¹⁶Nde wababuumba kunsa myooko, myooko myaandi, na wabasakumuna, mu ntetukulu myooko ha yulu bo.

¹⁷Yesu bu kaba kweyende mu nzila, muutu mosi wayisa mu ntiinu, watsukuma ha busu bwaandi na wamufuula ti: «Muyikisi wamubwete, nki me nsa mu kutaambula kidziingu kyahele manunu bunu saala?»

¹⁸Yesu waleele kuri nde ti: «Buri ye wuleele kuri me ti me wamubwe? Kuri muutu wamubwe ko, ha yulu wunu Nzaambi kitsu.

¹⁹Ye yaari mangisi: "yaa dzusa ko, yaa ta kimpala ko, yaa yiba ko, yaa ta kimbaangi kya mpya ko, yaa sa bumbabu ko, kiinsa taayi na nguri yaaku."»

²⁰Muutu wunde waleele kuri Yesu ti: «Muyikisi, momanso mamo, me nyamakebe kuholosono bulesi bwaami.»

²¹Yesu kamusungumina kisoosi, wamutya na wamuleele ti: «Kitotolo kimosi kiheeri kuri ye: yende, yarika bi wuri na byo, na ha [kuri] bawelu, ye sa baka busina ku yulu, na wasa, nama me.»

²²Ngo nde bu kayuka maampu mamo, makwa mamuwa, na wayende kunsa ngebe, bukuri waba na lubaku lwalaka.

²³Yesu, bu katala mpele na mpele, waleele kuri bayiki baandi ti: «Diri nkati dya mpasi kuri baatu bari na busina, mu kukoto mu Kimfumu kya Nzaambi.»

²⁴Bayiki babaka boomo mu misamu mimyo. Ngo Yesu wabweese kuleele kuri bo ti: «Mwaa-baala, nkati diri dya mpasi mu kukoto mu Kimfumu kya Nzaambi.

²⁵Dibvuriri mpasi kuri kisina mu kukoto mu Kimfumu kya Nzaambi, ti na kibulu kiri nkuumbu kamelo mu kukoto ha wuri dya noongo.»

²⁶Baatu bamono dyo nkati dyansisi, na balelesene bo na bo ti: «Na wubangisina kubvuuka?»

²⁷Bu kabasungumina kisoosi, Yesu waleele ti: «Kuri baatu lo kubangisina pe, ngo ka kuri Nzaambi ko, bukuri kuri Nzaambi momanso mari bwa kubangisina.»

²⁸Petelo wabaandika kumuleele ti: «Mono, beetu twasiisiri byobinso na twakunemi.»

²⁹Yesu waleele ti: «Mu ngwanwa, me nyiluleele ti: Kuri muutu ko wuri kasiisaana nzo yaandi, bunu pe bampaangi na bibusi, bunu pe taayi na nguri, bunu pe baala, bunu pe manseke mu ntoono me, na mu ntoono Musamu Wamubwete,

³⁰lo heriri kutaambula ku kinkama, mu ntaangu ya lumalu: manzo, bampaangi, bibusi, banguri, baala na manseke kunsa nkwaamusunu, tumi kidziingu kyahele manunu, mu ntaangu yikwiisa.

³¹Balaka bari batete, sa baba bampotulu; na babo bari bampotulu, sa baba batete.»

³²Baba mu nzila mu kutoomboko ku Yerusalemi, Yesu waba ku mankula. Bayiki baandi baba na boomo, na babo baba kwebanama baba na nzala mwooyo. Yesu wabweese kuholo bo kuumi na boolo, na wabeke mu kubaleele mamo mamubwilikila.

³³Nde wabaleele ti: «Mono, turi mu kutoomboko ku Yerusalemi, na Mwaana muutu sa kaba wayekulu kuri bakuutu ba bangaanga-nzaambi, na kuri batini ba mangisi. Bo sa bamukesele mukanu wa lufwa na sa bamuyekele kuri bangooyi,

³⁴bo sa bamusaana, sa bamufulula mante, sa bamulata nkwaasulu, na sa badzusa; ha mambisa ma biluumbu bitatu, nde sa kufuluka.»

³⁵Baala ba Dzebedayi, Yakobo na Yowane, bakokosolo kuri Yesu na bamuleele ti: «Muyikisi, beetu tutiiri ti, ye wutuyirikila mamo ma tukuloombo.»

³⁶Nde wabvutula kuri bo ti: «Nki lutiiri me nyiluyirikila?»

³⁷Bo babvutula kuri nde ti: «Ye ha miswa kuri beetu mu kudzakala, mosi ha lubakala lwa ye, na mosi ha lumosi lwa ye, mu nkeembu yaaku.»

³⁸Yesu wabvutula kuri bo ti: «Beenu lwahele kuyaaba ma luri mu kuloombo. Beenu lo lubangusini kunwa mbasa yi nyinwa me, bunu pe kuba babotuku mu mbotokulu yi babotoko me?»

³⁹Bo babvutula kuri nde ti: «Beetu lo tubangusini.» Ngo Yesu wabaleele ti: «Mbasa yi nyinwa me, beenu sa lwanwa, na mbotokulu yi babotoko me, beenu sa balubotoko mu yo.

⁴⁰Ngo mu mitariri kudzakala ha lubakala bunu pe ha lumosi lwa me, kari me nyiha miswa mimyo ko; ngo bibeendu bibyo bya baatu, ba bari bayirikila.»

⁴¹Bayiki kuumi bakaka, bu bayuka bubwo, babakila Yakobo na Yowane nkesi.

⁴²Yesu kabateelaana, wubaleeriri ti: «Beenu luyaari ti, babo babakoomonaa buni bamfumu ba mansi, bakoosalilaa bumfumu bwaaku ha yulu mansi mamo, na bakuutu ba mo, basalilaa lutumu lwaaku ha yulu mo.

⁴³Kari bubwo buyelemini kuba mu beenu ko; ngo wunde wutiiri kuba mukuutu mu beenu, lo kaba kisari kya beenu,

⁴⁴na wutiiri kuba watete mu beenu, lo sa kaba nkutu ya bobanso.

⁴⁵Bukuri Mwaana muutu wahele kwiisa mu kuri ti bamusalila, ngo mu kusalila, na kuha kidziingu kyaandi, bunu kikori mu balaka.»

⁴⁶Bo bayende ku Yeriko. Yesu kabaanaa weki totoko mu Yeriko, na bayiki baandi na mpuumbu yayinene, muutu mosi wafwa miisu, ngaa-luloombo, nkuumbu yaandi Bartimayi mwaana Timayi, waba wadzakala mu teke nzila.

⁴⁷Kayuka ti wunde Yesu wa ku Nadzareti wuri mu kuluta, nde wabeke mu kufula misaakulu na kuleele ti: «Yesu mwaana Davidi, bakila me ngebe.»

⁴⁸Baatu balaka bamuŋaŋana mpisi kawura; ngo nde wahamisa kufula misaakulu ti: «Yesu mwaana Davidi, bakila me ngebe.»

⁴⁹Yesu katelemaa, leeriri ti: «Muteele mbila.» Na bo bateele wafwa miisu mbila, bamuleele ti: «Lwaata kibakala, teleme, nde wukuteele mbila.»

⁵⁰Bartimayi kaloosa kiyuungu kyaandi, telemini mu nkaaka na weensi kuri Yesu.

⁵¹Yesu wamufuula ti: «Nki tiiri ti me nsa mu ye?» Wafwa miisu wabvutula kuri nde ti: «Muyikisi, me ntiiri kumono.»

⁵²Yesu waleele kuri nde ti: «Yende, kanyi dyaaku dikubvuukisiri.» Hanaho, nde wamono, na wabeke kwenama Yesu mu nzila.