Read Beembe Mal 11 Bible Online

Mal 11 - Beembe bible

Mal 11

¹Bu bakokosolo na Yerusalemi, bebele na mabula ma Betefange na Betanya, ku teke mulaandu wa Mi-olive, Yesu waheeke boolo mu bayiki baandi,

²na wabaleele ti: «Yendee ha bula buri ha mankula, bu lusa na tsee, sa lwamono mwaana mpuunda wakaangu, wuri muutu ti mosi kanweeti ko; munyanguneenu na mutwaaleenu.

³Mbuti muutu wulufuuriri ti: "Buri lusa bubwo?" Lo muleelee ti: "Mfumu wuri na nzala yo. Hanaho nde sa kaheeke yo hamaha."»

⁴Bo boolo bayende, na bamono mwaana mpuunda wakaangu ha teke mweelu, ku mbasi mu nzila, na bamunyanguna.

⁵Babamosi mu baatu baba haho, bafuula kuri bo ti: «Nki luri mu kusa mu kunyanguna mwaana mpuunda?»

⁶Bo baha mvutu bwaba baleele Yesu, na baatu babo babahemese.

⁷Bo banata mwaana mpuunda kuri Yesu. Bayala binkuta bya bo ha yulu mwaana mpuunda, na Yesu wadzakala ha yulu yo.

⁸Baatu balaka bayala binkuta bya bo mu nzila; bakaka bakoolo bimpaala bya miti mu manseke.

⁹Baatu baba kweyende ku mankula, na baba kwenama ku mambisa baba kwebikisa ti: «Hosana, kaba wasakumuna wunde wiisiri mu nkuumbu Mfumu!

¹⁰Kiba kyasakumunu kimfumu kya taayi dyeetu Davidi, kiisiri. Hosana kunu kinsongi-yulu!»

¹¹Yesu katubukaa ku Yerusalemi, kotiri mu Nzo-nzaambi. Bu katala mpele na mpele, wamono kuri ti ntaangu yimwaaluta, nde wapala mu kweende ku Betanya na bo kuumi na boolo.

¹²Bwiisi bukyaanaa, bo bapala mu Betanya, na Yesu wabaka nzala.

¹³Bu katalila ku la, mungenge waba na makaya, nde wayende mu kuri ti kampe lo bakiri ngenge dza kudya. Bu kakokosolo, wahele kubaka kitotolo, ha yulu mani makaya, bukuri yaba yiri ntaangu ya ngenge ko.

¹⁴Nde waleele kuri mungenge ti: «Fuu kya bufulukutuu, kuri muutu ti mosi wudya kimbutu kya ye ko!» Bayiki baandi baba yuka.

¹⁵Bo batubuka ku Yerusalemi, na bakoto mu Nzo-Nzaambi. Yesu wabeke mu kubingisa baatu baba yarikaana na baba suumbaana mu Nzo-nzaambi, watuba ku mbasi mataabala ma baba yiingaana mboongo, na wabwiisa bidzakukulu bya baba yarikaa mabeembe.

¹⁶Nde kasii tala ko ti muutu kapala na kitotolo munsa Nzo-nzaambi.

¹⁷Nde wabayikisa wabaleele ti: «Diri dyatinu ti: "Nzo yaami sa bayiteele ti nzo lusaambulu ya makaanda momanso." Ngo Beenu lumwaasa yo, ntari bangaa-bumfuna.»

¹⁸Bakuutu ba bangaa-nzaambi na batini ba mangisi bayukaa mayirimini, basaka bwa kumudzusila. Bo baba mubataana, bukuri mpuumbu yoyinso yaba yitiiri nyikusulu dzaandi.

¹⁹Nsinsika bu yatubuka, bo bapala mu bvula.

²⁰Bo babaanaa beki luta mu nzila kipari, bamono mungenge wakana natee ku myaansi.

²¹Petelo wabaambuka mwooyo na waleele kuri Yesu ti: «Muyikisi, mono mungenge wu wabee bulila ye mpopi weki wakana.»

²²Yesu wabvutula kuri bo ti: «Beenee na kanyi mu Nzaambi!

²³Ngwanwa me nyululeeriri ti: "Muutu lo leeriri kuri mulaandu wumawu ti: Naanguma webwa mu mubu", mbuti wahele kuketekese munsa mutima waandi, ngo wasa kanyi ti ma kaleeriri mari mu kuyirima, lo sa mayirima kuri nde.

²⁴Hango-nkuumbu, me nyiluleeriri ti, momanso ma lusambikila na ma luloombo, siilee kanyi ti lumwaa mataambula, lo sa mayirima kuri beenu.

²⁵Lubaanaa lwateleme luri mu kusaambila, mbuti lwakebele muutu kooti, lo muhemesene, mpisi heki taayi dya beenu se diri mu mayulu, kaluhemesene lumvuki lweenu.» [

²⁷Bo babweese kweende ku Yerusalemi. Yesu, bu kaba mu kweyende munsa Nzo-Nzaambi, bakuutu ba bangaanga-nzaambi, batini ba mangisi na bakulu ba babakala bakokosolo kuri nde.

²⁸Bamufuula ti: «Mu nkya lutumu ye wuri mu kweyirikila mamo? Bunu pe, na wakuha lutumu lulwo lu wuri mu kweyirikila mamo?»

²⁹Ngo kasi Yesu waleele kuri bo ti: «Kifuuri kimosi me nyiluha. Mpeenee mvutu; tumi me nyiluleele mu nkya lutumu me nyiri mu kweyirikila mamo.

³⁰Mbotokulu ya Yowane yiri ya ku yulu hoti ya baatu? Mpeenee mvutu!»

³¹Bo balelesene bo na bo ti: "Mbuti tuleeriri ti: Ya ku yulu", lo nde bee leeriri ti: "Hango buri lwaheriri kusiila kanyi mu nde?"

³²Na mbuti tuleeriri ti: "Ya baatu!" Bo baba bata mpuumbu baatu, bukuri bobanso baba monaa ti Yowane nkati mubikiri wangwanwa.

³³Bo ha beki bvutulaana kuri Yesu ti: «Beetu twahele kuyaaba.» Yesu wabvutula kuri bo ti: «Me se nyiluleele ko, mu nkya lutumu me nyiri mu kweyirikila mamo.»