Read Beembe Mal 12 Bible Online

Mal 12 - Beembe bible

Mal 12

¹Yesu wabeke kubadzoonsolo mu mankuma. Nde ti: «Muutu mosi wakuna nseke bviinya, wayidyengesele mu lumpaangu, wahaka bulu dya kukamukina malu, na watuunga nzo yadzaangama. Tumi nde Walaangisa yo kuri bakamuni ba bviinya, na wayende ku budyeengi.

²Ntaangu bu yayelemene, nde waheeke kisari kimosi kuri bakamuni ba bviinya mu kweeholo kuri bo, kikuuku kya bviinya kya nde.

³Bakamuni ba bviinya bamukwaataa, bamuleti na bamubvutula na myooko mya mukangala.

⁴Nde wabweese kubaheekele kisari kikimi; wunde se bamulata mu mutu na bamusaana.

⁵Nde wabweese kuheeke kikimi. Wunde bamudzusa. Balaka se bakaka basii bunubwo; babamosi babalata na bakaka babadzusa.

⁶Waba wasaala kuri nde wunu mwaana wa mutima kitsu. Wamuheeke wampotulu kuri bo, mu kuri ti: "Bo bee babvumina mwaana me."»

⁷Ngo kasi bakamuni ba bviinya babo, balelesene bo na bo ti: "Wu ngo mukondiri-saala. Wasee, tumudzuseenu, na saala diba dya beetu."

⁸Bamukwaataana, bamudzusiri na bamuloosiri ku mbisa lumpaangu lwa bviinya.

⁹«Ngaa-bviinya, lo nki kasa? Nde sa kiisa, sa kadzusa bakamuni ba bviinya, na sa kaha bviinya kuri baatu bakimi.

¹⁰Buri lwaasi taanga Matinu ko? "Tari dya loosiri batuungi, didyo ngo dyeki dya nguri ha kuumbu.

¹¹Mimyo kuri Mfumu miri myafumuna, na mya nkimukunu ha miisu mya beetu!"»

¹²Bo baba sakaana kumukaanga, ngo baba bata mpuumbu; mukwongo, bo babakuri ti nkuma yiyo mu bo kateeriri. Bo bamusisaana, bee kwaaku.

¹³Babamosi mu Bafarisi na baatu ba Erode, babaheeke kuri Yesu, bamutekele mweete mpisi bamubaka mu nzoonsulu.

¹⁴Bu bayende, baleele kuri nde ti: «Muyikisi, beetu tuyaari ti ye ngaa-ngwanwa, na ye wabataa muutu ko; bukuri ye wamonaa kinzeri kya baatu ko, ngo ye wukweyikisa nzila ya Nzaambi mu ngwanwa. Buri kuri na miswa mu kufuta mpaku kuri Kayisari hoti pele? Beetu tufuta hoti yaa tufuta ko?

¹⁵Ngo Yesu, bu kaba kayaari bumpitu-bumpyoongo bwa bo, wabaleele ti: "Buri beenu lutekele me mweete? Ntwalikilee kidenali mpisi me mono!»

¹⁶Bo bamutwalikila kyo. Yesu wabafuula ti: «Kidzisi ki na bisoni bi bya na?» Bo babvutula kuri nde ti: «Bya Kayisari.»

¹⁷Haho, Yesu wabaleele ti: «Bya Kayisari, bvutulee kuri Kayisari; na bya Nzaambi kuri Nzaambi.» Bo bamono nkimukunu mu nde.

¹⁸Basaduki bayisa kuri Yesu. Bo ngo baleelaa ti, mfulukulu ya bafwa yiri ko. Bo bamufuula ti:

¹⁹«Muyikisi, Moose watinina beetu dimadi: "Mbuti mpaangi muutu yifwiiri, sisiri mufwiiri na wahele kusisa mwaana, lo muutu wunde kakondolo mufwiiri mpaangi, na kamubutila baala."

²⁰Ngo kwaba bampaangi nsaamu. Watete kweeriri wa mukyeetu, na fwiiri kwahele kusiisa mwaana.

²¹Waboolo kondiri mufwiiri na nde se fwiiri kwahele kusiisa mwaana. Wabatatu se bwobumosi.

²²Bo nsaamu bahele kusisa baala. Ha mambisa ma bobanso, mukyeetu se fwiiri.

²³Heki mbasi-tsuku haba mfulukulu, [bo bu bafuluka,] mukasi mbasi-tsuku wa na kaba mu bo, bukuri bo nsaamu bamubakiri bunu mukasi?»

²⁴Yesu wabaleele ti: «Mu mimyo beenu luri lwahumuka, bukuri lwahele kuyaaba Matinu, na mpinu dza Nzaambi.

²⁵Mukwongo, mbasi-tsuku ha fuluka bafwa, lo kuba babakala bakweele ko, na bakyeetu ba bakweelese ko, ngo sa baba bunu bambasi ku mayulu.

²⁶Ngo mu ntoono ya bafwa bari sa bafuluka, buri beenu lwasii taanga mu mukaanda Moose ko, ha bari badzoonsolo mu bvuunda dya miti, bwaba muleele Nzaambi ti: "Me ngo Nzaambi ya Abalaami, Nzaambi ya Isaki na Nzaambi ya Yakobe!"

²⁷Nde kari Nzaambi ya bafwa ko, ngo ya baatu bamwooyo. Nkati beenu lwawumuka kwalaka.»

²⁸Mosi mu batini ba mangisi, kayukaa bu baba kalikisaana na bwa heeri Yesu mvutu yayibwete kuri bo, nde wakokosolo na wamufuula ti: «Nkya ngisi yibvuriri bunene mu momanso?»

²⁹Yesu wabvutula ti: «Yibvuriri bunene ngo: "Isaheli Yuka! Mfumu Nzaambi yeetu, nde mosi.

³⁰Tya Mfumu Nzaambi yaaku, mu mutima waaku ndemunso, mu muheebulu waaku ndemunso, mu madyeele maaku momanso, na mu makwa maaku momanso."

³¹Yamoolo ngo yimayi: "Tya mbasi yaaku bunu ye-meene." Kwahele ngisi yikimi yibvuriri mu bunene ti na mamo.»

³²Mutini mangisi wamuleele ti: «Bwabubwe Muyikisi! Ngwanwa ye leeriri: Nde mosi, kwahele mukimi ha yulu nde.

³³Kumutya mu mutima ndemunso, mu madyeele momanso, mu makwa momanso, na kutya mbasi bu batiila nyutu ya nde-meene; mimyo mibvuriri bubwete ti na bikabu byobinso bya kuyoko na bya kudzusa.»

³⁴Yesu kamonaa ti [nde] heeri mvutu ya madyeele, wamuleele ti: «Ye wahele la na Kimfumu kya Nzaambi.» Kwasii ba muutu ti mosi ko waba bweese kutsiitsa kumuha kifuuri.

³⁵Mu Nzo-nzaambi, Yesu wayikisa waleele ti: «Dyaburi batini ba mangisi bari mu kweleele ti Kiristo mwaana Davidi?

³⁶Nde-meene Davidi wadzoonso mu ntwaalusulu ya Mpeeve Yangisi waleele ti: "Mfumu waleele kuri Mfumu yaami ti: Dzakala ha lubakala lwaami, natee ku nyisuusa me bataatu baaku kunsa bitaambi byaaku."

³⁷Nde-meene Davidi habaanaa wumuteele ti: "Mfumu"; lo dyaburi Mfumu kabweese kuba mwaana Davidi?" Mpuumbu yayinene yaba na kiminu mu kuyuka ma kaba leelaa nde.»

³⁸Yesu mu nyikusulu dzaandi, wabaleelaa ti: «Seenee madyeele mu batini ba mangisi, bo batiiri kweyunga mu madzweele mamala, na be baha mamboto mu bibeendu bya bobanso.

³⁹Bo batii kwedzakala mu bibeendu byatete mu manzo ma nkutukunu, na mu mu bibendu bya lukiinsu mu ntaangu ya kudya.

⁴⁰Bo bakwekalimina bitotolo mu manzo ma bafwiiri, na batiiri kwemonokono mu nsaambulu dzadzila. Bo sa bataambula mutsuundu wubvuriri bunene.»

⁴¹Yesu bu kaba wadzakala ha mankula ma kikebulu kya mboongo, waba monaana bunu bwaba tubaa baatu mboongo mu kikebulu. Bisina byalaka baba tubaana mboongo dzalaka.

⁴²Mufwiiri mosi wa muwelu wayisa na watubu mipata myoolo mya nsensele, miri mufunu wantele.

⁴³Yesu kateelaa bayiki baandi wubaleeriri: «Ngwanwa me nyiluleeriri ti, mufwiiri wa muwelu wu bvuriri kutuba ti na bobanso batubiri mu kikebulu;

⁴⁴bukuri bobanso batubiri byayu-yulu. Kasi kunsa buwelu bwaandi, nde tubiri byobinso bi kabee na byo, bya kidziingu kyaandi.»