Read Beembe Mal 13 Bible Online

Mal 13 - Beembe bible

Mal 13

¹Yesu bu kapala mu Nzo-nzaambi, mosi mu bayiki baandi wamuleele ti: «Muyikisi, moneeti matari ma bubwe, moneeti ntuungulu yi bubwe?»

²Yesu waleele kuri nde ti: «Ye wumono ntuungulu yayinene yi? Mbasi-tsuku kusaala tari ha yulu tari ko, di bahele kutsaamuna.»

³Yesu kabaanaa wadzakala ha yulu Mulaandu wa Mi-olive, kuri watala ku Nzo-nzaambi, Petelo, Yakobo, Yowane na Andere bamufuula ha nde-kaka ti:

⁴«Leeleeti beetu, mu nkya ntaangu mamo mayirima, na nkya kidiimbu kisoongo kuri ti byobinso sa byawa?»

⁵Yesu wabeke mu kubaleele ti: «Seenee madyeele, muutu ka kwiisa kuluwuna.

⁶Baatu balaka sa biisa mu nkuumbu yaami, sa baleele ti: "Wumawu me!" Na sa bawumuna balaka.

⁷Ha luyuka beenu midziingu na kiyomo kya midziingu, yaa lubwilikila kinkuuka ko. Mamo mayelemini kutubuka, ngo yakireeti kuba pe manunu.

⁸Mansi na mansi sa manwaana, bimfumu na bimfumu sa byanwaana; butoto sa bwatembele mu mampele malaka, na sa kwaba nzala; yiyo ngo mbandukulu misoongo mya mbutulu.

⁹Ngo seenee madyeele mu beenu-meene. Sa baluyekele ha busu bwa kikuutu, sa balulata mu manzo ma nkutukunu, na sa lwateleme ku muyalu ha busu bwa batumi na ha busu bwa bambyaasi, mu ntoono me, mu kuteele me kimbaangi kuri bo.

¹⁰Musamu Wamubwete yelemini, kutekesele kuba wayaabusu, kuri mansi momanso.

¹¹Ha balunata mu kuluyekele, yaa lutekesele kuba na boomo ko, mu mi luleele; ngo mamo ma lubaka mu kilookolo kikyo, leelee mo, bukuri kari beenu ludzoonso ko, ngo Mpeeve Yangisi.

¹²Mpaangi yayimosi sa kayekele mpaangi yakaka mu lufwa, taayi se, mwaana waandi. Baala sa banwaanisa bataayi na banguri na kubadzusa.

¹³Baatu bobanso sa balubele mu ntoono nkuumbu yaami. Ngo wunde wunamitina natee kumanunu, sa kabvuuka.»

¹⁴«Mbasi-tsuku di lumono beenu misamu myahele bwa kukuundila, ha kibeendu kiri myahele kuyelemene kuba, lo wunde wutaanga kabakula; babo bari ku Yudaya bayitika ku yulu milaandu.

¹⁵Wunde wuri ku yulu nzo, yaa kasunduka, mu kukoto mu nzo yaandi, na kuholo kitotolo,

¹⁶na wunde wuri ku manseke, yaa kabvutuka ku mambisa ko mu kweeholo kinkuta kyaandi.

¹⁷Kyaari kuri bakyeetu baba na mayimi, na babo bakwenwiisa baala mabeene, mu biluumbu bibyo.

¹⁸Saambilee mpisi heki mamo mahele kutuba mu ntaangu ya kyoosi.

¹⁹Bukuri mu biluumbu bibyo, sa kwaba mpasi dziri dzafwanikina na dzidzo dzatubukiri ko, kuholosono kwa bandukiri Nzaambi kuyirika yulu na butoto, natee mu lu; na dza bubwo dzibweese kutubuka ko.

²⁰Mbuti Mfumu kasii kukufuka biluumbu ko, nkani kuba muutu wubvuuka ko; ngo mu ntoono basoolu, bakari kasoolo, nde wakufikiri biluumbu bibyo.

²¹Hango, mbuti muutu wululeeriri ti: "Mono Kiristo wuri hamaha; mono wuri kunii", lo yaa lusa kanyi ko;

²²bukuri ba-Kiristo bampya, na babikiri bampya, sa bateleme, sa bayirika bidiimbu na bimaangu mu kiteesu kya kuwumuna basoolu, mbuti buri bwakuka.

²³Beenu ngo bari, seenee madyeele, me ntekisiri kuluyaabisa myominso.»

²⁴«Ngo kasi mu biluumbu bibyo, ha mambisa ma mpasi dzidzo, ntaangu sa yaba mampimbisi, na ngoondo yibweese kuha mweese waandi ko,

²⁵bambwetete bari ku yulu sa basonoko, na mpinu dza ku yulu sa dzanyingina.

²⁶Haho, baatu sa bamono Mwaana muutu wukwiisa mu matuti, mu mpinu dzadzinene na nkeembu.

²⁷Nde sa kaheeke bambasi, sa kakutukisa [ba nde] ba kari kasoolo mu manto ma butoto mo mana, kuholosono kwa sukulu butoto, natee kwa sukulu yulu.»

²⁸«Bakulee nkuma ya mungenge: mitu mya bimpaala habaanaa myeki myamoono, na makaya mapariri, lo beenu luyaari ti ntoombo yikokisiri.

²⁹Bwobumosi beenu se, ha lumono mamo matubukiri, lo luyaari ti nde kokisiri ha myeelu.

³⁰Ngwanwa me nyiluleele ti, kiseendu ki kiluta ko, natee momanso mamo makiri kumonoko.

³¹Yulu na butoto sa byaluta, ngo kasi maampu maami mari ndutula ko.»

³²«Mu ntoono ya kiluumbu kikyo, bunu pe ya kilookolo kikyo, kuri muutu wuyaa ko, ti bambasi mu mayulu, ti Mwaana; wunu Taata yaari.

³³Seenee madyeele, beenee naana, bukuri beenu lwahele kuyaaba ha kuka ntaangu.

³⁴Sa dyaba bunu muutu weensi ku budyeengi, siisiri nzo yaandi, heeri lutumu kuri bisari byaandi, muutu-muutu na kisalu kyaandi, na kuri mukebi-mweelu wumutumini mu kuba naana.

³⁵Ngo beenee naana, bukuri lwahele kuyaaba ntaangu yikwiisa ngaa-nzo: mu nsinsika, kakati dya butsuku, ha kookolaa bansusu, bunu pe kipari,

³⁶mu kubata ti, kiisaana na sisuu, nde kalutangusina kuri luri tolo.

³⁷Mamo ma nyiri mu kululeele, kuri bobanso me nyileele: beenee naana.»