Read Beembe Mal 14 Bible Online

Mal 14 - Beembe bible

Mal 14

¹Biluumbu byaba bisiiri byoolo mu kukoto mu munkeembu wa Paaka na wa mampa mahele lufunusu. Bakuutu ba bangaanga-nzaambi na batini ba mangisi basaka bwa kukaanga Yesu mu mawunu na bamudzusa.

²Bo babaleele ti: «Yaa diba mu ntaangu ya munkeembu ko, mu kubata kuri ti kisaangila kikwiisa kukoto mu baatu.»

³Yesu waba ku Betanya, mu nzo Simoni mubeeru bwaasi. Bu kaba mu kudya, mukyeetu mosi wayisa na yuku dya mananaasi mantalu yalaka. Nde wadzibula yuku na wayitila mananaasi ha yulu mutu Yesu.

⁴Babamosi mu baba haho babaka nkesi na baleelesene bon a bo ti: «Buri babvukiri kwaandi mananaasi ma?

⁵Habeeri kwaandi lo bamayarikiri mu nkama tatu dza bidenali, na kuha kuri bawelu.» Bo babakila mukyeetu wunde nkesi.

⁶Ngo kasi Yesu waleele ti: «Muhemeseenu, buri luri mu kumubamisa? Kiyiriki kyakibwete nde kayirikiri mu me.

⁷Mukwongo, mu mantaangu momanso, beenu luri kintwaari na bawelu. Habaanaa lutiiri, lo lubayirikiri mamabwete; ngo kasi beenu lwahele kuba kintwaari na me mu mantaangu momanso.

⁸Nde yirikiri ma kabangusini. Nde tekisiri kuyitila mananaasi mu nyutu yaami, tekesele nziikulu me.

⁹Ngwanwa me nyululeeriri ti: haho ha bayaabisa Musamu Wamubwete, mu nsi yansiina, sa badzoonsolo se mu mamo ma kayirikiri, mu kumubambukila mwooyo.»

¹⁰Yuda Iskaryote, mosi mu bo kuumi na boolo, wayende kuri bakuutu ba bangaanga-nzaambi mu kuri ti kayekele Yesu kuri bo.

¹¹Bo bayukaa bubwo, bamono kiminu na bamutambukila mboongo. Yuda wasaka bwa kumuyekele mu ntaangu yayelemene.

¹²Mu kiluumbu kyatete kya mampa mahele lufunusu, ki bakekaa bimeeme mu Paaka, bayiki baandi baleele kuri Yesu ti: «Kuri ye tiiri ti, beetu twee tukuyirikila ndiilu ya Paaka?»

¹³Nde waheeke boolo mu bayiki baandi na wabaleele ti: «Yendee ku bvula, beenu sa lwabwaana muutu mosi wukwenata yuku dya maampa. Munameenu,

¹⁴na mumwo mu kakoto, leele kuri ngaa-nzo ti: "Muyikisi bu kaleeriri ti: Kihekiri kya me, ki nyidiila Paaka na bayiki baami kiri hari?"

¹⁵Nde sa kalusoongo kihekiri kyadzaangama, kyakinene kibari babweeyese, kyeki kyayirima. Na yirikeenu ndiilu ya beetuneenu mumwo.»

¹⁶Bayiki bapala na bayende ku bvula. Bamono misamu bunu bu kabaleeriri, na bayirika Paaka.

¹⁷Nsinsika bu yatubuka, Yesu wayisa na bo kuumi na boolo.

¹⁸Bu baba balaambula miilu, na bari mu kudya, Yesu waleele ti: «Ngwanwa me nyiluleeriri ti: mosi mu beenu, wuri mu kudya na me, bee nyekiri.»

¹⁹Bo babaandika kumono ngebe, na mosi mosi mu bo wafuula Yesu ti: «Kari me ko, ka bunubwo ko?»

²⁰Yesu waleele kuri bo ti: «Mosi, mu beenu kuumi na boolo, wusoko kooko ha kimosi na me mu lukoombo.

²¹Mwaana muutu wuri mu kweende bunu bu diri dyatinu mu ntoono ya nde. Ngo kyaari kuri muutu wunde, wuba nzila yi bayekekele Mwaana muutu. Bwaketi kubvula bubwete kuri muutu wunde, mu kuhele kubutuka!»

²²Bu baba mu kudya, Yesu waholo mpa, bu kasakumuna yo, wayibukuna yo, wabaha na waleele ti: «Holeenu, yimayi ngo nyutu yaami.»

²³Bu kaholo mbasa, wabvutula matoondo, wabaha, na bobanso banwa yo.

²⁴Nde wabaleele ti: «Mamama ngo makila maami ma lulelusunu, matsaamuka mu ntoono balaka.

²⁵Ngwanwa me nyiluleeriri dyo: Me ka nyibweese kunwa malu ma bviinya ko, natee kiluumbu kikyo, ki nyibweese kumanwa mu Kimfumu kya Nzaambi.»

²⁶Bu bamana kuyimbila mikuunga mya ndumusu, bayende ku Mulaandu wa Mi-olive.

²⁷Yesu waleele kuri bayiki baandi ti: «Beenu bobanso bee lubwiiri, bukuri diri dyatinu ti: "Me sa nyalata mutari, na bimeeme sa byatsamukina."

²⁸Ngo me manaa kufuluka, sa nyalutekesele ku Ngalili.»

²⁹Ngo kasi, Petelo waleele kuri nde ti: «Ti hayuku bobanso babwiiri, lo me nyibwa ko.»

³⁰Yesu waleele kuri nde ti: «Mu ngwanwa me nyikuleele ti: Mu butsuku bwa lolo di, tekesele mulumi nsusu kakookolo mbala dzoolo, ye sa tuna me mbala tatu.»

³¹Petelo mu makwa, wabweese kuleele ti: «Ti hayuku dya kufwa kintwaari na ye, lo me nyiri ntununa ye ko.» Bobanso se baleele bunubwo.

³²Bo bayende ku kibeendu kimosi kiri nkuumbu Ngetesemane, na Yesu waleele kuri bayiki baandi ti: «Dzakileenu hamaha, mu ntaangu yi nyikwesaambila me.»

³³Nde waholo kintwaari na nde Petelo, Yakobo na Yowane, na wabaandika kubwilikila kinkuuka na kingoongo mu mutima.

³⁴Nde wabaleele ti: «Mutima me weki na ngebe natee mu kiteesu kya lufwa. Beenee hamaha na beenee naana.»

³⁵Bu kayende mwaa-kimamanga, wabwa ha nsi, na wasaambila ti, mbuti buri bwakuka, lo kilookolo ki kilabuka la nde.

³⁶Nde waleele ti: «Aba, Taata, ye wakuka mu myominso; tatula mbasi yimayi la na me; kasi kari bu ntiiri me ko, ngo bu tiiri ye.»

³⁷Nde wabvutuka na wamono bayiki babwa tolo; waleele kuri Petelo ti: «Simoni, wuri tolo? Ye wahele kubangisina kuba naana mu kilookolo ti kimosi?

³⁸Beenee naana na saambileenu mpisi luhele kubwa mu nsindukulu. Kiluunsi kiri na makwa, ngo kasi muswinyi wuri na buyonsi.»

³⁹Bu kabweese kusasika, nde wasa lusaambulu lwolumosi.

⁴⁰Bu kabweese kubvutuka, nde wabamono babwa tolo, bukuri miisu mya bo myaba myaleme, na basii kuyaaba mvutu ya kumuha ko.

⁴¹Bu kabweese kwiisa lwatatu, nde waleele kuri bo ti: «Sa mu lumalu, namitinee kweenu kubwa tolo na wuumeenu! Ngo bukukiri. Kilookolo kitubukiri. Mono, Mwaana muutu weki wayekulu mu myooko mya bangaa-masumu.

⁴²Siimbikeenu tweendeenu; wunde wunyekele kokisiri.»

⁴³Hanaho, Yesu bu kaba wakiri mu kudzoonso, Yuda, mosi mu bo kuumi na boolo, watubuka na mpuumbu baatu bari na mambeesi mamala na mboto. Bakuutu ba bangaanga-nzaambi, batini ba mangisi na bakulu ba babakala babaheekiri.

⁴⁴Yuda waba muyekele wayukusina na bo mu kidiimbu ki: «Wunde wu nyinyumutina me, lo wunde; mukwaateenu na munateenu, yirikee kumukebe.»

⁴⁵Yuda kamana kutubuka, hanaho nde wakokosolo kuri Yesu, waleele ti: «Muyikisi!» Na wamunyumutina,

⁴⁶hanaho, bo bamubwiilila na bamukaanga.

⁴⁷Mosi mu baba mono, kayuulaa mbeesi yayila, walata kisari kya mukuutu bangaanga-nzaambi na wamutabula kutu.

⁴⁸Yesu wadzoonso kuri bo, wabaleele ti: «Beenu lwiisiri kukaanga me kuri luri na mambeesi mamala na mboto, bunu ti me ngaa-bumfuna?

⁴⁹Mpisi kiluumbu me nyabee bebele na beenu mu Nzo-nzaambi, kuri nyikweyikisa, na lwasii kaanga me ko. Ngo mimami kuyirima mu kuri ti Matinu meende mu mana.»

⁵⁰Hanaho, bayiki baandi bobanso bamusisa na bayitika.

⁵¹Mwaa-munkuula mosi, walwaata yini nsaanda mosi kitsu, waba kwemunamaana, bamukwaata;

⁵²ngo mwaa-nde, kapatulaa nsaanda, ha kayitikiri kuri wuri kimpene.

⁵³Bo banata Yesu kuri mukuutu bangaanga-nzaambi. Bangaanga-nzaambi bobanso, bakula ba babakala na batini ba mangisi bakutukina.

⁵⁴Petelo waba kwenamaa Yesu kila-kila natee kunsa mbasi ya mukuutu bangaanga-nzaambi. Na nde waba wadzakala ha kimosi na bangaamba mu kuyoto mbaawu.

⁵⁵Bakuutu ba bangaanga-nzaambi na kikuutu kyokinso baba sakaana kimbaangi mu Yesu mpisi bamudzusa; kasi bahele kubaka.

⁵⁶Baatu balaka baba muteelaa bimbaangi byampya, ngo bimbaangi bya bo byaba byahele kubwanikina.

⁵⁷Babamosi bateleme mu kumuteele kimbaangi kyampya ti:

⁵⁸«Beetu twayukiri wuleele ti: "Me lo nsyaamini Nzo-nzaambi yi, yatuungu mu myooko mya baatu; na kutuunga yikimi mu biluumbu bitatu, yibahele kutuunga mu myooko mya baatu."»

⁵⁹Ngo ti mu mimyo, bimbaangi bya bo byaba byahele kubwanikina.

⁶⁰Mukuutu bangaanga-nzaambi bu kateleme ha kakati dya baatu, wafuula Yesu ti: «Buri ye wahele na mvutu ya kuha mu bimbaangi bibari mu kukuteele?»

⁶¹Yesu waba wawura, na wahele kubvutula ntoono ti mosi. Mukuutu bangaanga-nzaambi wabweese kumufuula ti: «Buri ye ngo Kiristo Mwaana Ngaa-lusakumunu?»

⁶²Yesu wabvutula ti: «Me nyiri; na sa lwamono Mwaana muutu wadzakala ha Lubakala lwa Mpinu na wuri mu kwiisa mu matuti ma yulu.»

⁶³Mukuutu bangaanga-nzaambi kakaakilaana binkuta byaandi leeriri ti: «Nki tubweese kusaka bambaangi?»

⁶⁴«Beenu luyukiri kitari kikyo. Nki mo lutsimini?» Bobanso ba bamukesele mukanu wa lufwa.

⁶⁵Babamosi babaandika mu kumufulula mante, kumufuka nsaanda ku busu na kumu kula mangutu mambata na kuleele ti: «bikula». Na bangaamba Bamubwaanina mu mambata.

⁶⁶Petelo bu kaba ku nsuku ha mbasi, mosi mu bisari bya bakyeetu bya mukuutu bangaanga-nzaambi wayisa,

⁶⁷na bu kamono Petelo wuri mu kuyoto mbaawu, wamutala, waleele ti: «Ye se beeri kintwaari na Yesu wa ku Nadzareti.»

⁶⁸Ngo nde watuna na waleele ti: «Me nyahele kuyaaba na nyahele kubakula ma wuri mu kuleele ye.» Petelo kapalaana, weensi ku nkotulu mbasi [na mulumi nsusu wakookolo].

⁶⁹Kisari kya mukyeetu kikyo, bu kabweese kumumono waleele kuri baba haho ti: «Wumawu mosi mu bo!»

⁷⁰Ngo Petelo wabweese kutuna; mwaa-kidzika kyantele, baba haho, babweese kuleele kuri nde ti: «Ngwanwa ye wuri mosi mu bo, bukuri ye wa ku Ngalili.»

⁷¹Nde wabaandika mu kubula mampopi na kulaba ti: «Me nyaari muutu wumawu ko, wu luri mu kudzoonsolo beenu.»

⁷²Hanaho, mulumi nsusu wakookolo lwa dzoolo. Petelo wabaambuka mwooyo mu musamu waba muleele Yesu ti: «Tekesele mulumi nsusu kakookolo mbala dzoolo, ye sa tuna me mbala tatu.» Petelo wakuukuka na wadila.