Read Beembe Mal 15 Bible Online

Mal 15 - Beembe bible

Mal 15

¹Mu minkya mya bwiisi, mfuundu ya bakuutu ba bangaanga-nzaambi, bakulu ba babakala, batini ba mangisi na kikuutu kyokinso badzakala. Bakaanga Yesu, bamunata na bamuyekele kuri Pilato.

²Pilato wafuula kuri Yesu ti: «Buri ye ngo mbyaasi bayudayo?» Yesu wabvutula kuri nde ti: «Ye, leeriri.»

³Bakuutu ba bangaanga-nzaambi bamufuunda mu myalaka.

⁴Pilato wabweese kumufuula ti: «Ye wahele na dya kubvutula? Yukeeti momanso ma bari mu kukufuundila.»

⁵Yesu kasii bvutula ntoono ti mosi, Pilato wamono dyo dyankimukunu.

⁶Mu mpisi munkeembu, Pilato waba palisaa boroko dimosi, bunu bwaba ndoombolo dza baatu.

⁷Kwaba muutu mosi nkuumbu Baraba, waba mu boroko kintwaari na bangaa-tungu, badzusiri muutu mu ntaangu ya tungu.

⁸Mpuumbu, bu yatoomboko, yafuula Pilato bunu bu kaba basiilaana.

⁹Pilato wabvutula kuri bo ti: «Beenu lutiiri ti nyilupatukila mbyaasi Bayudayo?»

¹⁰Nde waba yaari ti bakuutu ba bangaanga-nzaambi bayekiri Yesu mu musoki.

¹¹Bakuutu ba bangaanga-nzaambi basinda mpuumbu mpisi heki babapatukila Baraba, ha kibeendu kya Yesu.

¹²Pilato wabweese kufuula waleele kuri bo: «Buri [lutiiri] me nsa [kuri wunde wu luri mu kuleele beenu] mbyaasi Bayudayo?»

¹³Bo babweese kubikisa ti: «Mukomono ha kuruwa.»

¹⁴Pilato wafuula kuri bo ti: «Nkya mamabi kari kayirika?» Bo bahamisa kubikisa ti: «Mukomono ha kuruwa.»

¹⁵Pilato bu katya kuha kiminu kuri mpuumbu, wabapatukila Baraba, na wayekele Yesu mpisi bamulata nkwaasulu, na bamukomono.

¹⁶Bayongolo banata Yesu kunsa mbasi ya mutsuundu yiri munsa nzo mbyaasi, na batumisa mpuumbu yoyinso.

¹⁷Balwiika Yesu kiyuunga kyabeenge, na bamuyirikila mpu ya manseende yi bamulwiika.

¹⁸Babaandika mu kumuha mboto: «Mboto, mbyaasi Bayudayo!»

¹⁹Bamulata dyaari mu mutu, bamufulula mante na bamutsukumina.

²⁰Bu bamana kumusiila munsiku, bamuyusula kiyuunga kyabeenge na bamulwiika binkuta bya nde-meene. Bamunata mu kweemukono.

²¹Simoni wa ku Kirene, taayi dya Alekandere bo na Lufo, wafumuna ku manseke. Bu kari mu kuluta, bamubwiilila na kumukwiikisa mpisi kanata kuruwa dya Yesu.

²²Bamunata ku kibeendu kya Ngolongota, mbangukulu «kibeendu kya kiteengi kya mutu.»

²³Bamuha malu masaangu na mire, ngo Yesu wabisa.

²⁴Bamukomono na bakaba binkuta bya nde mu nteelu wari, mu kuyaaba na wuholo nki.

²⁵Kyaba kyeki kilookolo kyabitatu, kya nkati mwiini, bu baba mukomono.

²⁶Kooti di bamukesiri mukanu wa lufwa dyaba dyatinu ti: «Mbyaasi Bayudayo.»

²⁷Kintwaari na Yesu bakomini se bangaa-bumfuna boolo, mosi ku lubakala, mosi ku lumoso. [

²⁸]

²⁹Baba lutaa mu nzila baba mutukaana, banyingisa mitu na baleele ti: «Ye mutsaamini nzo ya ngisi na mutuungi yo mu biluumbu bitatu,

³⁰bvuuka ye-meene na sunduka ha kuruwa!»

³¹Bwobumosi se, bakuutu ba bangaanga-nzaambi na batini ba mangisi basa munsiku bo na bo, baleele ti: «Nde wabvuukisiri bakaka; ngo wahele kubangisina kubvuuka nde-meene.

³²Hemese Kiristo, mbyaasi Isaheli kasunduka mu lumalu ha kurwa, mpisi heki beetu tumono na tusiila kanyi.» Baba komini ha kimosi na nde, baba mutukaana.

³³Kilookolo kya bisaamunu bu kyatubuka, mampimbisi mabwa mu nsi yansiina natee kilookolo kyawa.

³⁴Mu kilookolo kyawa, Yesu wafula mu mbeembu yamakwa ti: «Eloyi, Eloyi, lema sabakatani?» Mbangukulu ti: «Nzaambi yaami, Nzaambi yaami, buri ye yekiri me?»

³⁵Babamosi baba haho bu bayuka baleele ti: «Yukee, weki teele Eliya!»

³⁶Muutu mosi kadzumunaana, luulusiri musasaka mu bvinya dyansa, kaangiri nde mu dyaari, heeri kuri Yesu mpisi kanwa, na leeriri ti: «Hemese tumonee kari tumi Eliya kiisa mu kumusundula ha kurwa.»

³⁷Yesu kafulaa musaakulu wamula, kiwuumunu kitabukiri.

³⁸Nsaanda ya nzo yangisi yatyaabuka mu bibari byoolo, kuholosono ku yulu natee ku nsuku.

³⁹Mukuutu nkama bayongolo, waba wateleme ha busu bwa Yesu, kamonaa bwaba tabukila muwuumunu, waleele ti: «Mu ngwanwa, wumawu beeri Mwaana Nzaambi!»

⁴⁰Kwaba se bakyeetu baba la, baba talilaana. Mu bo kwaba Mariya Madelene, Mariya ma nguri Yakobo dyantele bo na Yose, Salome,

⁴¹baba kwenama na kwesalila Yesu ha kaba ku Ngalili, na bakyeetu bakimi balaka batoombikiri kintwaari na Yesu ku Yerusalemi.

⁴²Yaba yeki nsinsika, na ntaangu yi bayirimaa tekesele bakoto mu kiluumbu kya mpuumunu.

⁴³Yosefi, dya ku Arimatayi, muutu wa lukiinsu, mosi mu mfuundu ya bakuutu, wuri nde se waba kiingilaana Kimfumu kya Nzaambi, walwaata kibakala, wakoto mu nzo Pilato mu kumuloombo nyutu Yesu.

⁴⁴Pilato wakimuka mu kumono ti Yesu weki wafwa. Nde wateele mukuutu nkama bayongolo mu kumufuula kari fwiiryee na kidzika.

⁴⁵Pilato kamana kuyuka ma muyaabisiri mukuutu nkama bayongolo, ha kaheeri miswa kuri Yosefi mu kuholo nyutu.

⁴⁶Yosefi wasuumba mutulu, wasundula nyutu, wayidziinga mutulu, wayende kweesuusa yo munsa bulu dyahaku mu tari, na wasindukila tari di kadukiri bulu.

⁴⁷Mariya ma ku Mangadala na Mariya ma nguri Yose baba talilaana mu basuusiri nyutu Yesu.