Read Beembe Mal 2 Bible Online

Mal 2 - Beembe bible

Mal 2

¹Mwaa-biluumbu bu byaluta, Yesu wabweese kubvutuka ku Kafarnawumi. Baatu bayuka ti nde wuri ku nzo.

²Baatu balaka bakutukina kuri bibeendu byawa natee ha mweelu nzo; nde wabeke mu kubayikisa Maampu.

³Baatu bayisa kuri nde na kikata, kiri baatu bana bamunaanguna.

⁴Bu baba bwa kutubukila pe hari Yesu, mu ntoono mpuumbu baatu, bo bayaala muluri nzo, ha kibeendu ki kaba nde. Basaalisa waanga, na basundula kikata mu nkwaala yi kaba waneŋene.

⁵Yesu, bu kamono kanyi dya baatu babo, waleele kuri kikata ti: «Mwaana waami, masumu maaku meki mahemusunu.»

⁶Babamosi mu batini ba mangisi baba badzakala haho, batsima kunsa mitima myaaku ti:

⁷«Bukuri nki muutu wumawu kari mu kwedzoonsolo bubwo? Nde Nzaambi kari mu kusaana. Na wakuka mu kuhemesene masumu, mbuti ka Nzaambi kitsu ko?»

⁸Mu kilookolo kinikyo, Yesu mu mpeeve yaandi, wabakula ma baba tsimaa bo kunsa mitima myaaku, na wabaleele ti: «Buri luri mu kwetsima mya bubwo kunsa mitima myeenu?

⁹Nki bibvuriri kuleenge, kuleele kuri kikata ti: "Masumu maaku meki mahemusunu", hoti, kuleele ti: "Teleme kwaaku, holo nkwaala yaaku na yende"?

¹⁰Ngo mu kuri ti, beenu luyaaba ti Mwaana muutu wuri na lutumu lwa kwehemesene masumu ha butoto.» Nde waleele kuri kikata ti:

¹¹«Me nyikuleeriri ti: Teleme, holo nkwaala yaaku na yende ku nzo yaaku.»

¹²Mu kilookolo kinikyo, muutu wunde wateleme, wanaanguna nkwaala yaandi, na wapala ha busu bwa bobanso. Baatu bobanso bamono dyo dya nkimukunu, bakeembise Nzaambi na baleele ti: «Twamwiini kweetu mya bumabu ko!»

¹³Yesu wabweese kweende mu teke mu mubu. Mpuumbu yo yoyinso ya baatu yayende kuri nde, na nde wabeke mu kubayikisa.

¹⁴Bu kaba mu kuluta, nde wamono Levi, mwaana Alafayi, wadzakala ha kibeendu ki baloombaa mpaku. Yesu waleele kuri nde ti: «Nama me.» Nde katelemaa, wumunemi.

¹⁵Yesu bu kaba mu kudya mu nzo Levi, batori ba mpaku balaka na bangaa-masumu se badya kintwaari na nde, na bayiki baandi, bukuri baatu balaka baba kwemunamaana.

¹⁶Batini ba mangisi na Bafarisi, bu bamono ti Yesu wuri mu kudya, kintwaari na bangaa-masumu na batori ba mpaku, baleele kuri bayiki baandi ti: «Nde buri kari mu kudya kintwaari na batori ba mpaku na bangaa-masumu?»

¹⁷Yesu, bu kayuka bubwo, wabaleele ti: «Kari ba babatsiina babaanaa na nzala ngaanga ko, ngo babeeru. Me nyahele kwiisa mu kuteele basuunguma mbila, ngo bangaa-masumu.»

¹⁸Bayiki ba Yowane na Bafarisi baba bakoto loomi. Baatu bayisa kufuula Yesu ti: «Bukuri nki ntoono, bayiki ba Yowane na bayiki ba Bafarisi bakoto loomi, ngo kasi bayiki ba ye, loomi kukoto pe?»

¹⁹Yesu wabvutula kuri bo ti: «Buri banduku ba mukweeri, lo bakotiri loomi, mu mantaangu momanso mari mukweeri wuri kintwaari na bo? Bo ka bari nkotulu loomi ko

²⁰Ngo biluumbu biri mu kwiisa, biri mukweeri sa kaba wayisulu ha kakati dya bo; mu kiluumbu kikyo, bo sa bakoto loomi.»

²¹«Kuri muutu ko wuloondaana kinkuta kyakikulu, mu kiteendi kya nsaanda yamoono. Bukuri kiteendi kya nsaanda yamoono, lo kikaakiri kinkuta kyakikulu, na kinkuta kihamisini kutyaabuka.

²²Kuri se muutu wuri lo sekiri malu mamoono, mu bimpokoro byabikulu ko; bukuri lo malu maluukisiri bimpokoro. Malu lo matsaamukini, na bimpokoro se bibvukini. Ngo malu mamoono, kusekele mu bimpokoro byamoono.»

²³Bu baba mu kutaba manseke mu kiluumbu kya mpuumunu, bayiki baandi mu nzila, babandika kwebokolo masaangu.

²⁴Bafarisi baleele kuri Yesu ti: «Moneeti, bukuri nki bayiki ba ye bari mu kweyirika madiku mu kiluumbu kya mpuumunu?»

²⁵Yesu wabvutula kuri bo ti: «Buri beenu lwakiri kutaanga pe, mamo ma yirikiri Davidi, bu kaba weki watikila na weki na nzala, nde na ba kaba na bo?

²⁶Nde kakotaa mu nzo Nzaambi, mu ntaangu yiri Abyatara waba mukuutu bangaanga ba Nzaambi, wadya mampa maha mu kikabu kuri Nzaambi, mari baatu bahele na miswa mu kudya, ha yulu bani bangaanga ba Nzaambi kitsu; kasi nde waha se na kuri baatu ba kaba na bo.»

²⁷Yesu wabweese kuleele kuri bo ti: «Mpuumunu bayirikiri yo mu ntoono muutu, ngo bahele kuyirika muutu, mu ntoono mpuumunu.

²⁸Mu didyo, Mwaana muutu wuri se Mfumu kiluumbu kya mpuumunu.»