Read Beembe Mal 3 Bible Online

Mal 3 - Beembe bible

Mal 3

¹Yesu wabweese kukoto mu nzo-nkutukunu. Munumwo, mwaba muutu mosi waba na kooko kwasika.

²Baatu baba ketaana Yesu, mu kumono kari lo wumutsinikisi mu kiluumbu kya mpuumunu, mpisi heki bamufuunda.

³Yesu waleele kuri muutu waba na kooko kwasika ti: «Teleme ha kakati hamaha.»

⁴Yesu wafuula kuri baatu ti: «Buri kuri miswa mu kuyirika mamabwe bunu pe mamabi, mu kubvuukisa bunu pe mu kudzusa muutu, mu kiluumbu kya mpuumunu?» Ngo kasi bo baba bawura.

⁵Yesu wabatala mu nkesi, na wamono ngebe, mu ntoono nkubusulu mitima mya bo. Nde waleele kuri mubeeru ti: «Laambula kooko!» Nde walaambula, na kooko kwaandi kyatsiinika.

⁶Bamanaa kupala, Bafarisi mu kilookolo kinikyo, basa mamfuundu na baatu ba Erode mu kusaka bwa kudzusila Yesu.

⁷Yesu na bayiki baandi bayende mu teke mubu, na mpuumbu baatu ya bu fundu-fundu yafumuna ku Ngalili, [yanama] nde ku Yudaya,

⁸ku Yerusalemi, ku Idumaya, ku simu dya nyari ya Yorodani, na ku nkoonsi ya Tiro na ya Sidoni, mpuumbu ya bu fundu-fundu yayukiri momanso ma bayirikaa Yesu yayisa kuri nde.

⁹Yesu waleele kuri bayiki baandi mu kumuwungikila bwaatu, mu ntoono mpuumbu, mpisi heki baatu bahele kumusiila mfina.

¹⁰Mukwongo, nde watsinikisa babeeru balaka, kuri bobanso baba mu mpasi bamubwiilila, mpisi bamubelemene.

¹¹Na mampeeve mamabi, bu mamumono, mabwa ha busu bwaandi, na mabikisa ti: «Ye ngo Mwaana Nzaambi.»

¹²Ngo Yesu wamaŋaŋina mu kibakala, mpisi mahele kuyaabisa nde na kari.

¹³Nde wanwaata ku yulu mulaandu, na wateele babo ba katiiri, na bo bayende kuri nde.

¹⁴Nde wasuusa kuumi na boolo [ba kaluka bantumu], mpisi beba kintwaari na nde, na mpisi kabaheeke mu kwebikisa,

¹⁵na babaka lutumu lwa kwebingisa mampeeve mamabi.

¹⁶[Nde wasuusa kuumi na boolo]: Simoni wukaha nkuumbu ya Petelo,

¹⁷Yakobo bo na Yowane, mpaangi yaandi, bo boolo baala ba Dzebedayi, nde wabaha nkuumbu ya Bwanerengese, mbangukulu ti: «Baala ba nzasi»,

¹⁸Andere, Filipo, Bartelemi, Matayi, Toma, Yakobo, mwaana Alafayi, Tade na Simoni, wa ku Kana,

¹⁹na Yuda Iskaryote, waba muyekele.

²⁰Yesu wabvutuka ku nzo, na mpuumbu baatu yabweese kukutukina kuri, Yesu na bayiki baandi beki ti byandya bwakudiila pe.

²¹Bari mu kaanda dyaandi bayukaa bubwo, bayende mu kumuholo, bukuri baatu baba kweleele ti: «Weki kilawuku.»

²²Batini ba mangisi bafuma ku Yerusalemi, baleele ti: «Wuri na Beledzebule, na mu lutumu lwa mfumu mampeeve mamabi, nde kari mu kwebingisa mampeeve mamabi!»

²³Yesu, kabateelaana, wubadzoonsiri mu mankuma ti: «Dyaburi Satana katsiitsa kubinga Satana?

²⁴Mbuti baatu bari na kimfumu bakwenwaana bo na bo, lo kimfumu kikyo kudziingula pe;

²⁵mbuti baatu bari kaanda dimosi, bakwenwaana bo na bo, lo kaanda didyo kudziingula pe;

²⁶na mbuti Satana wunwaanisa nde-meene, na watelemise kitaatu mu nde-meene, lo kadziingula ko, lutumu lwaandi lo luwiiri.»

²⁷«Kuri muutu ti mosi ko, wuri lo kotiri mu nzo ngaa-makwa, mu kumuholo na bitotolo, mbuti wahele kutekesele kukaanga ngaa-makwa wunde mu bikonyi, tumi lo horiri biri mu nzo yaandi.

²⁸Ngwanwa me nyiluleele ti: myominso sa myaba myahemesunu kuri baala ba baatu, masumu na nsaanunu, bwooso dzibeele.

²⁹Ngo kasi, mpisi wunde wusaana Mpeeve Yangisi, lo kataambula mpemisi ko mu mantaangu momanso, bukuri lo bakiri kibila mu sumu dya bibvu ngo bibvu.»

³⁰Mimyo kubaleele, bukuri bo baba muleele ti: «Wuri na mpeeve yayibi.»

³¹Nguri na bampaangi ba Yesu, bayisa, bateleme ku mbasi, na baheeke muutu munsa nzo mu kwemuteele.

³²Mpuumbu baatu yaba yadzakala ha teke Yesu, na bamuleele ti: «Mono, nguri ye, bampaangi na [bibusi] bya ye bari mu kukusaka ku mbasi.»

³³Yesu wabvutula kuri bo ti: «Na wuri nguri me, na ba na bari bampaangi ba me?»

³⁴Nde wadyeengese kisooso ha yulu lukaangu lwa baatu baba badzakala mu teke nde, waleele ti: «Mono, nguri me na bampaangi ba me ngo bamaba.

³⁵[Mukwongo] mpisi wunde wuyirika kutya kwa Nzaambi, lo nde ngo mpaangi me, kibusi kya me na nguri me.»