Read Beembe Mal 6 Bible Online

Mal 6 - Beembe bible

Mal 6

¹Yesu wayisika haho, wayende ku bula bwaandi, na bayiki baandi bamunama.

²Kiluumbu kya mpuumunu bu kyatubuka, nde wabaandika mu kuyikisa mu nzo-nkutukuna. Baatu balaka bu bayuka bakimuka na baleele ti: «Kuri kabakiri mamama? Nkya madyeele bari bamuha mamama, na buri bimaangu biri mu kweyirimina mu myooko mya nde?

³Buri wu kari mukomono-manzo, mwaana Mariya, mpaangi Yakobo, Yose, Yuda na Simoni ko? Buri bibusi bwaandi byahele nkati-nsi na beetu hamaha?» Baatu nkati babumina makya mu ntoono nde.

⁴Yesu waleele kuri bo ti: «Mubikiri kabakaa lukiinsu ku bula bwa nde-meene ko, mu kaanda dya nde-meene ko, na mu nzo ya nde-meene ko.»

⁵Nde kasii yirika kimangu ti kimosi haho ko, ha yulu bani babeeru babamosi katsinikisi, mu kwebatetekele myooko.

⁶Nde wakimuka mu ntoono kuhele kwa kanyi kwa bo. Yesu waba kweyendaa mu mabula mari ku lumperi mu kweyikisa.

⁷Yesu wateele bo kuumi na boolo mbila, wabaandika mu kubasindika boolo-boolo, na wabaha lutumu ha yulu mampeeve mamabi.

⁸Nde wabaha ntumunu kuri ti: «Mu budyeengi bweenu, yaa luholo kitotolo ti kimosi, ha yulu lunu luboto: byandya pe, nkangala pe, mipata mu kimpokoro pe.

⁹Ngo lwaateenu masapaatu, na yaa lunata binkuta byoolo ko.»

¹⁰Nde wabaleele se ti: «Mu nzo yi balutaambiri, dzakaleenu mumwo natee mu ntaangu yi lupala mu bula bubwo.

¹¹Ha bula bu babisiri kulutaambula na kuluywiila, bu luri mu kweende, lo kubulee fuunda diri mu miilu myeenu, mpisi kiba kimbaangi kuri bo.»

¹²Bo bayende na bayikisa, mpisi heki baatu bayiinga madyeele!

¹³Bo babingisa mampeeve malaka mamabi, na bakila maasi kuri babeeru balaka na babatsinikisa.

¹⁴Mbyaasi Erode wayuka badzoonsolo mu Yesu, bukuri nkuumbu yaandi yaba yeki mvuumfu, na baatu baba kweleele ti: «Yowane Mubotiki wafulukiri mu bafwa; hango nkuumbu, kari mu kweyirika bimaangu.»

¹⁵Bakaka baba bakweleele ti: «Wunde Eliya.» Bakimi ti: «Wunde mubikiri wuri bunu mosi mu babikiri.»

¹⁶Erode, bu kayuka mamo waleele ti: «Wunde Yowane, wu nyatabiri me mutu wafulukiri mu bafwa.»

¹⁷Mukwongo, Erode waheeri lutumu luri ti basiimba Yowane, na bamukaanga bikonyi mu boroko, mu ntoono Erodyade waba mukasi mpaangi yaandi, Filipo wukakweeriri.

¹⁸Bukuri Yowane wabaleelaa kuri Erode ti: «Ye wuri na miswa ko, mu kuholo mukasi mpaangi yaaku.»

¹⁹Mu didyo, Erodyade waba wakebele Yowane kooti, na waba watya kumudzusa, ngo waba wahele kubangisina;

²⁰bukuri Erode waba kwebataa Yowane, bu kaba kayaari ti nde muutu wasuunguma na wangisi, na waba kwemukalaana. Erode haba bu kayuka ma leele Yowane, lo weki dunga kwalaka; ngo waba na kiminu mu kuyuka ma kaleele.

²¹Ngo kiluumbu kimosi mpwaani yabakama. Erode kabaana wukeembele kiluumbu kya mbutukulu yaandi, nde wayirikisa mubuluku, mu kuha kuri baatu baandi balukiinsu, bamfumu ba bayongolo na bakuutu ba Ngalili.

²²Mwaana waandi, mwaana Erodyade wa mukyeetu wakoto na wakina, waha kiminu kuri Erode na kuri baba dyaanaana kintwaari na nde. Mbyaasi Erode waleele kuri mwaana mukyeetu ti: «Loombo kuri me mpisi kitiiri na me sa nyakuha.»

²³Erode walaba maalu [kwalaka] kuri nde ti: «Me sa nyakuha kyo ngo kyo ki wundoombo, ti hayuku kibari kya nsi kya kimfumu kyaami.»

²⁴Mwaana kapalaa weefuula kuri nguri ti: «Nki me nyiloombo?» Nguri wamubvutula ti: «Mutu Yowane Mubotiki.»

²⁵Hanaho nde wabvutuka mu mawasu kuri mbyaasi, waloombo ti: «Me ntiiri ti ye mpa mu mawasu, mutu Yowane Mubotiki munsa lukoombo.»

²⁶Mbyaasi wamono mpasi mu mutima. Ngo mu ntoono maalu ma kalabiri, na mu ntoono baba badzakala na nde mu kudya, nde kasii tya kunyaafuna mwaana ko.

²⁷Mu kilookolo kinikyo, mbyaasi waheeke mukebi mosi mu bayongolo katwaala mutu Yowane. Bu kayende, watabula Yowane mutu mu boroko.

²⁸Nde watwaala mutu Yowane munsa lukoombo, na waha nde kuri mwaana wa mukyeetu, na mwaana wa mukyeetu waha nde kuri nguri yaandi.

²⁹Bayiki ba Yowane bu bayuka, bayende kwee naanguna nyutu Yowane na bayisuusa munsa mukala.

³⁰Bantumu bakutukuna bebele na Yesu, na bamuyaabisa momanso maba yirikiri na ma bayikisiri.

³¹Nde waleele kuri bo ti: «Wasee meti ha lumperi hamaha na wuumeenu mwaa-kwantele.» Mukwongo, baatu balaka baba bakweende, bakwiisa, na bo baba koono kubaka mwaa-ntaangu ya kudya.

³²Bo bayende mu bwaatu ku lumperi bo bakaka.

³³Baatu bamono ku baba kweende, na balaka babayaabila. Baatu bafumuna mu mabvula momanso, bayende mu miilu na batekesele ku kibeendu kikyo.

³⁴Yesu, bu kapala mu bwaatu, wamono mburi mpuumbu baatu, wabamwiina ngebe, bukuri baba bunu bimeeme byahele na mutari. Nde wabaandika kubayikisa misamu myalaka.

³⁵Ntaangu yaba yimwaaluta kwalaka. Bayiki baandi bakokosolaa kuri Yesu, bamuleele ti: «Kibeendu ki turi kimaki kiri ku lumperi, na ntaangu yimwaaluta.

³⁶Bvutula baatu, mpisi beende mu mabvula na mu mabula mari bebele, basuumba bi badya.»

³⁷Yesu wabvutula kuri bo ti: «Baheene bi badya beenu-meene.» Bo bamuleele ti: «Buri tweendee twetusuumba mampa ma nkama dzoolo dza bidenali mpisi tubaha badya?»

³⁸Yesu wabafuula ti: «Mampa makwe luri na mo? Yendee lwelutala.» Bo batala na babvutula ti: «Mampa mataanu na bansu boolo.»

³⁹Nde wabatuma mu kudzakisa baatu bobanso mu makabu-makabu, ha yulu leenge dya maampa.

⁴⁰Bo badzakala mu makabu ma nkama, na ma makuumi mataanu.

⁴¹Yesu waholo maampa mataanu na bansu boolo, watala ku yulu, wasakumuna, wabukuna mampa, na waha kuri bayiki baandi, mpisi bakabula kuri baatu. Bakabula se bansu bo boolo kuri baatu bobanso.

⁴²Bobanso badya na bayukuta.

⁴³Bayiki batolo mitooto kuumi na myoolo myaluula mu bitsuri bya mampa na bya bansu.

⁴⁴Baatu badiiri [mampa] baba mafuunda mataanu ma babakala.

⁴⁵Mu kilookolo kinikyo, Yesu wakwiikisa bayiki baandi mu kukoto mu bwaatu, na batekesele ku simu dya mubu bebele dya Betesayida, mu ntaangu yi kabvutula nde mpuumbu baatu.

⁴⁶Bu kamana kubabvutula, nde wanwaata ku yulu mulaandu mu kweesaambila.

⁴⁷Nsinsika bu yatubuka, bwaatu bwaba bweki ku kakati dya mubu, na Yesu waba wasaala nde mukaka ku simu.

⁴⁸Nde watalila ti bayiki baandi baba na mpasi mu kwenata bwaatu, mu ntoono kiteembu kyaba babwaana. Mu kitulu kyabina kya butsuku, Yesu wayende kuri bo mu kwedyaata ha yulu mubu, na waba tiiri kubaluta.

⁴⁹Bo bu bamumono wuri mu kwedyaata ha yulu mubu maampa, batsima ti kampe kinyumbi, na babeke mu kufula misaakulu.

⁵⁰Bobanso bamumono na babwilikila kinkuuka. Mu kilookolo kinikyo, Yesu wadzoonso kuri bo na waleele ti: «Lwaatee kibakala, wumawu me, yaa luba na boomo ko.»

⁵¹Nde wakoto mu bwaatu bebele na bayiki, na kiteembu kyawa. Bo bamono dyo dyankimukunu [yalaka],

⁵²bukuri basii bakula mayirimini mu mampa ko, mu ntoono nkubusulu mitima mya bo.

⁵³Bamanaa kusabuka, batubukiri mu simu, ha bula bwa Ngenesareti.

⁵⁴Bu bapala mu bwaatu, hanaho baatu bayaabila Yesu.

⁵⁵Bo basa budyeengi mu nkoonsi yoyinso yiyo. Baatu babaandika kumutwalikila babeeru, mu yulu mankwaala, kukwo kubayukiri ti weki kumaku.

⁵⁶Mwomunso mwaba kwekotaa Yesu munsa mabula, munsa mabvula, mwa yende tuunga baatu ku manseke, baba kwesuusaana babeeru mu bibeendu bya bobanso, bamuyingukila kuri ti habee-kwaandi babelemene ti nto kinkuta kyaandi. Bobanso baba mubeleminaana batsiinika.