Read Beembe Mal 8 Bible Online

Mal 8 - Beembe bible

Mal 8

¹Mu biluumbu binibyo, mpuumbu baatu yayinene yabweese kukutukina na baba bya kudya pe. Yesu kateelaa bayiki baandi, wabaleele ti:

²«Me nyiri na ngebe mu mpuumbu yi, bukuri biluumbu byeki bitatu, baatu bari ha teke me, ngo bahele na bya kudya.

³Mbuti heki me nyibabvutiri mu manzo, kuri bahele kudya, lo makwa ma bawiiri mu nzila, na babamosi mu bo, bafuminye ku la.»

⁴Bayiki baandi babvutula kuri nde ti: «Dyaburi muutu kabangusinaa kuyukutisa baatu bamaba mu mampa ku nsi yankatu yimayi?»

⁵Yesu wabafuula ti: «Mampa makwe luri na mo?» Bo babvutula ti: «Nsaamu.»

⁶Yesu watuma mpuumbu baatu mu kudzakala ha nsi; na bu kaholo mampa nsaamu, wabvutula matoondo, wabukuna mo na wamaha kuri bayiki baandi mpisi bakabula; bo bakabula mo kuri mpuumbu.

⁷Bo baba se na mwaa-ndaambu bansu. Yesu wasakumuna bansu babo, na waleele kuri bayiki mu kukabula se.

⁸Baatu badya, bayukuta. Na batolo bitsuri bya mampa byasaariri: mampiri nsaamu.

⁹Baatu baba kampe kiteesu kya mafuunda mana. Yesu wababvutula.

¹⁰Hanaho, nde wanwaata mu bwaatu na bayiki baandi, na wayende ku mankoonsi ma ku Dalamanuta.

¹¹Bafarisi bayisa na babaandika kusa nkalikisi na Yesu. Bo bamusakila kidiimbu kya ku yulu, mu ku kumutsiitsa.

¹²Yesu wanana muwuumunu mu kiluunsi, kyaandi na waleele: «Buri kinseendu kimaki kiri mu kusaka kidiimbu? Ngwanwa me nyiluleele, ka kuba kidiimbu ti kimosi ko, ki baha kuri kiseendu ki!»

¹³Kamana kubasisa, nde wabweese kunwaata mu bwaatu, na wasabuka ku simu dya mubu.

¹⁴Bayiki badzimikini mu kuholo mampa. Mpa mosi kitsu baba na yo mu bwaatu.

¹⁵Yesu wabaha lutumu, wabaleele ti: «Luyuka! Seenee madyeele mu lufunusu lwa Bafarisi na mu lwa Erode.»

¹⁶Bayiki bakoto mu kwetsima bo na bo, bukuri baba bahele na mampa.

¹⁷Yesu, bu kabakula bitsimi bya bo, wabaleele ti: «Buri luri mu kwetsima ti lwahele na mampa? Beenu lwakiri kubakula pe, na lwakiri kumono pe? Beenu mitima myakuba?

¹⁸Beenu miisu luri na myo, kasi lwahele kumono? Beenu makutu luri na mo, kasi lwahele kuyuka? Beenu lubaambu lwo pe?

¹⁹Ha nyabee bukuna me mampa mataanu, mu kudiisila mafuunda mataanu ma babakala, mampiri makwe maluula mu bitsuri bya mampa lwatoriri?» Bo babvutula kuri nde ti: «Kuumi na moolo.»

²⁰«Heki ha nyabee diisila me mafuunda mana ma babakala mu mampa nsaamu, mampiri ma bitsuri bya mampa, masaariri makwe lwatoriri?» Bo babvutula [kuri nde] ti: «Nsaamu.»

²¹Yesu wabaleele ti: «Beenu lwakiri kubakula pe?»

²²Bo bayende ku Betesayida. Baatu batwaala muutu wafwa miisu kuri Yesu, na bamuyingukila mpisi kamubelemene.

²³Yesu waholo wafwa miisu mu kooko, na wamunata bu mbisa bula. Yesu wamufulula mante mu miisu, wamutetekele myooko na wamufuula ti: «Nki wuri mu kumono?»

²⁴Mubeeru wadzibula miisu, waleele ti: «Me nyiri mu kumono baatu, ngo kubamono bunu miti miri mu kweyende.»

²⁵Yesu wabweese kumubelemene mu miisu, na nde wamono na kensekelee, watsiinika na wamono kuri wukwesobokoso byobinso.

²⁶Yesu wamusindika ku nzo yaandi, wamuleele ti: «Yaa koto kunsa bula ko.»

²⁷Yesu wayende na bayiki baandi ku mabula ma nkoonsi ya Kayisareya dya Filipo. Bu baba mu nzila, Yesu wafuula bayiki baandi ti: «Baatu nki bari mu kweleele, ti me na nyiri?»

²⁸Bo babvutula baleele kuri nde [ti]: «Yowane Mubotiki, bakaka ti Eliya, bakaka ti mosi mu babikiri.»

²⁹Yesu wabafuula ti: «Heki beenu buri luleeriri, ti me na nyiri?» Petelo wabvutula kuri nde ti: «Ye ngo Kiristo.»

³⁰Yesu wabaŋaŋina mpisi bahele kuyaabisa kuri muutu ti mosi mya mu nde.

³¹Yesu wabaandika mu kubayikisa ti: «Mwaana muutu yelemini kumono mpasi dzalaka; bakulu ba babakala, bakuutu ba bangaanga-nzaambi na batini ba mangisi sa bamuyekele, na kumudzusa; na ha mambisa ma biluumbu bitatu, tumi kafuluka.»

³²Nde wadzoonso mimyo mu nsiitu. Petelo kamunataa ha lumperi, baandikiri kumuŋaŋina.

³³Yesu kasyeetekaana, mwiini bayiki baandi, ha kaŋaŋina Petelo na kumuleele ti: «Satana, ba ku mambisa ma me, bukuri ma wutsima ye mari ma Nzaambi ko, ngo ma baatu.»

³⁴Yesu kateelaa mpuumbu baatu ha kimosi na bayiki baandi, wabaleele ti: «Mbuti muutu tiiri kunama me ku mambisa, lo katuna nyutu ya nde-meene, kanaanguna kuruwa dyaandi, na kanama me.

³⁵Mukwongo, wunde wutiiri kubvuukisa kidziingu kyaandi, lo sa kakidziimbisa; ngo kasi wunde wudziimbisa kidziingu kyaandi mu ntoono me, na mu ntoono Musamu Wamubwete, lo sa kakibvuukisa.

³⁶Nkya ndaandu yiri na muutu mu kubaka nsi yansiina, ngo fuukisiri kidziingu kyaandi?

³⁷Nki muutu, katsiitsa kuha mu kuyiingisa kidziingu kyaandi?

³⁸Mukwongo, wunde wuba na nsoni mu me, na mu maampu maami, mu kiseendu kimaki, kya kimpala na kya masumu, lo Mwaana muutu se, ha kakwiisa nde na bambasi bangisi mu nkeembu Taayi dyaandi, sa kamumwiina nsoni.»