Read Beembe Mal 9 Bible Online

Mal 9 - Beembe bible

Mal 9

¹Nde wabweese kubaleele ti: «Ngwanwa me nyiluleeriri, babamosi mu bateleme hamaha, bafwa ko, natee bakiri kumono Kimfumu kya Nzaambi kiisiri mu mpinu.»

²Biluumbu bisaamunu bu byaluta, Yesu waholo Petelo, Yakobo na Yowane, na wabatoombolo ku yulu mulaandu wadzaangama, kwa bo bakaka. Nde wakituka ha busu bwa bo;

³binkuta bya nde byaba byeki seme kwalaka, byahembeke mu kiteesu kiri lo, kwahele muhembikisi-mansaanda ti mosi ha butoto, wubangisina kuhembekese bubwo.

⁴Eliya na Moose bamonokono, bari mu ku kudzoonso na Yesu.

⁵Petelo wabaangula mbeembu, waleele kuri Yesu ti: «Muyikisi, buri bwabubwete ti tubeeneenu haaka na tutuungeenu misaampu mitatu, mosi wa ye, mosi wa Moose, na mosi wa Eliya.»

⁶Petelo waba wahele kuyaaba dya kuleele, bukuri baba na boomo.

⁷Tuti dyayisa ha yulu bo, na dyabafuka mu mposi yaandi; na mono, mbeembu mosi yayukukuna mu tuti, yaleele ti: «Wumawu ngo Mwaana waami wa mutima, mu ywiileenu!»

⁸Na sisuu, bayiki bu batala mpele na mpele ha baba, bahele bweese kumono muutu ti mosi, ngo wunu Yesu kitsu na bo-meene.

⁹Bu baba mu kukulumuka mulaandu, Yesu wabadika ti yaa bayaabisa kuri muutu ti mosi ko, mamo ma bamwiini natee Mwaana muutu fulukiri mu bafwa.

¹⁰Bo bakebe musamu wunde, na baba kwefulusinaa bo na bo ti: «Kufuluka mu bafwa mambangukulu nki?»

¹¹Bo bafuula Yesu ti: «Bukuri nki batini ba mangisi bakoleelaa ti Eliya wakiri tekesele na kwiisa?»

¹²Yesu wabvutula kuri bo ti: «Bunubwo, Eliya wutekesele na kwiisa mu kubvutula bunkete. Ngo, mu nki ntoono diri dyatinu ti Mwaana muutu, sa kamono mpasi dzalaka, na sa kaba wanyaafunu?

¹³Ngo kasi me nyiluleeriri ti: Eliya wayeki wayisa, na bamuyirikiri myominso mi baba batiiri, bunu bu dyaba dyatinu mu ntoono ya nde.»

¹⁴Bu batubuka hari bayiki bakaka, bo bamono mpuumbu baatu yayinene yaba yabadyengekele, na batini ba mangisi baba kalikisaana na bo.

¹⁵Hanaho, mpuumbu yoyinso bu yamono Yesu, yakimuka. Baatu badzumuna kuri nde mu kumuha mboto.

¹⁶Nde wabafuula ti: «Mu nki ntoono lubee saana nkalikisi na babo?»

¹⁷Muutu mosi munsa mpuumbu wabvutula kuri nde ti: «Muyikisi, me mbee nyatwaala kuri ye, mwaana me wa mubakala, wuri na mpeeve ya bubaba.

¹⁸Mbuti Mpeeve yiyo yimwaamubaka, lo yimutubiri ha nsi, lo fulu dipala mu munwa, wukweete miinu na nyutu yikaangama. Me ndeerirye kuri bayiki ba ye, mpisi babinga mpeeve yiyo, ngo bahele kubangisina.»

¹⁹Yesu wabvutula kuri bo ti: «Ha! Kiseendu ki kyahele na kanyi, natee mantaangu makwe me nyiba na beenu? Natee mantaangu makwe me nyikuunda beenu? Muntwalikilee hamaha!»

²⁰Bamunatikina nde, na mpeeve yiyo bu yamono Yesu, hanaho yanyingisa mwaana mu makwa; nde wabwa ha nsi, wabeke kwenengumuke kuri fulu dikwemupala mu munwa.

²¹Yesu wafuula taayi dya mwaana ti: «Mantaangu makwe mwaana kari kunsa kiteesu ki?» Taayi wabvutula ti: «Kuholosono bulesi bwaandi.

²²Mantaangu malaka mpeeve yiyo yimutubaa ku mbaawu, na mu maampa mu kumudzusa. Ngo mbuti ye wakuka mu kusa kitotolo, lo bakisa beetu, tubakila ngebe!»

²³Yesu waleele kuri nde ti: «Mbuti ye wakuka, lo momanso mayirimini kuri wunde wusa kanyi.»

²⁴Hanaho, taayi dya mwaana waleele: «Me nsii kanyi, bakisa me mu kanyi di nyiri dyo pe.»

²⁵Yesu bu kamono mpuumbu baatu yiri mu kwisikila, waŋaŋana mpeeve yayibi, waleele kuri yo ti: «Mpeeve ya bubaba, me nyikutumini: Pala mu mwaana wu, na yaa bweese kukoto mu nde ko!»

²⁶Bu yafula misaakulu, yamunyingisa mu makwa, na yapala. Mwaana waba weki bunu wafwa, na baatu balaka baba beki leele ti: «Mwaafwa.»

²⁷Ngo Yesu kamukwaataana mu kooko, wumusiimbiri na mwaana telemini.

²⁸Yesu kakotaa mu nzo, bayiki baandi bamufuuriri ha bo bakaka ti: «Dyaburi beetu, tukooninyee kubingisa mpeeve yiyo?»

²⁹Nde wabaleele ti: «Kuri kitotolo ko kitsiista kupalisa kitsuumbu kikyo, mbuti ka mu lusaambulu ko.»

³⁰Bo bayisikaa haho, bayookolo ku Ngalili. Yesu waba wahele kutya ti baatu bayaaba.

³¹Mukwongo, nde wayikisa bayiki baandi, wabaleele ti: «Mwaana muutu weki wayekulu mu myooko mya baatu, bo sa bamudzusa; bu bamudzusiri, biluumbu bitatu bilutaana, nde sa kafuluka.»

³²Ngo kasi bo baba bahele kubakula musamu wunde; na baba bataana kumufuula.

³³Bo batubuka ku Kafarnawumi. Babaanaa beki ku nzo, Yesu wabafuula ti: «Mu nki ntoono lubee kwesa nkalikisi mu nzila?»

³⁴Ngo bo bawura, bukuri mu nzila, bo na bo babee kwesa nkalikisi mu kusaka kuyaaba wunde wubvuriri bukuutu.

³⁵Yesu bu kadzakala, wateele bo kuumi na boolo na wabaleele ti: «Mbuti muutu ti kuba watete, lo kaba wampotulu mu bobanso, na kaba ngaamba bobanso.»

³⁶Nde kaholaa mwaa-mwaana, wumutelemisi ha kakati dya bo. Bu kamubuumba kunsa myooko, waleele kuri bo ti:

³⁷«Mpisi wunde wutaambula, mosi mu mwaa-baala ba bumabu, mu nkuumbu yaami, lo me kataamburi; na mpisi wutaambula me, lo kari me kataamburi ko, ngo wunde wampeeke.»

³⁸Yowane waleele kuri Yesu ti: «Muyikisi, beetu tumwiinyee muutu mosi wukwebingisa mampeeve mamabi mu nkuumbu ye; na beetu tumudikiryee, bukuri nde wahele kweyende na beetu.»

³⁹Yesu waleele ti: «Yaa lumudika ko, bukuri kuri muutu ti mosi ko, wuri kasaana kimaangu mu nkuumbu yaami, mwaa-kidzika kyantele, weki dzoonso bwabubi mu me,

⁴⁰bukuri wunde wahele na kitaatu mu beetu, lo wuri kintwaari na beetu.

⁴¹Mpisi wunde wuha beenu mbasi maampa ma kunwa, mu nkuumbu yiri ti beenu baatu ba Kiristo, ngwanwa me nyiluleeriri ti: lo kahelele museendu waandi ko.»

⁴²«Mpisi wunde wubwiisa mu masumu, mosi mu mwaa-bilesi bimabi, byasa kanyi [mu me], lo buri bwabubwete mu nde, ti bamukaanga nguku-tari mu nkiingu yaandi, na bamutuba mu mubu.

⁴³Mbuti kooko kwaaku kubwiisa ye mu masumu, lo taabala kwo, buri bwabubwete mu ye, mu kukoto na kooko kumosi mu kidziingu, ti na kuba na myooko myoolo, ngo weensi ku lubila, ku mbaawu yiri yadzimaa ko. [

⁴⁴]

⁴⁵Mbuti kuulu kwaaku kubwiisa ye mu masumu, lo taabala kwo; buri bwabubwete mu ye, mu kukoto na kuulu kumosi mu kidziingu, ti na kuba na miilu myoolo, ngo bakutubiri ku lubila. [

⁴⁶]

⁴⁷Mbuti diisu dyaaku dibwiisa ye mu masumu, lo hokolo dyo; buri bwabubwete mu ye, mu kukoto na diisu dimosi mu Kimfumu kya Nzaambi, ti na kuba na miisu myoolo, ngo bakutubiri ku lubila,

⁴⁸kukwo kuri mitaka myafwaa ko, na mbaawu yadzimaa ko.

⁴⁹Mukwongo, sa basa mungwa mu mpisi muutu, ku mbaawu.»

⁵⁰«Mungwa wamubwete. Ngo mbuti weki wahele nyeke, lo mu nki lumubvutukila nyeke yiyo? Beenee na mungwa mu beenu-meene, na beeneenu na kiyeengi beenu na beenu.»