Read Beembe Luk 11 Bible Online

Luk 11 - Beembe bible

Luk 11

¹Yesu waba saambilaana ha kibeendu kimosi. Bu kamana kusaambila, mosi mu bayiki baandi wamuleele ti: «Mfumu, yikisa beetu bwa kusaambikila bunu bwayikisa se Yowane kuri bayiki baandi.»

²Nde wabaleele ti: «Habaanaa lusaambila, lo luleelaa ti: "Taata, hemese nkuumbu yaaku yiduma; hemese kimfumu kyaaku kiisa.

³Tuha byandya byeetu bya kiluumbu, mpisi tsuku.

⁴Tuhemesene masumu meetu, bukuri beetu-meene se tukoohemisinaa mpisi watuyirikila dyadibi; na yaa tunata mu nsindukulu ko."»

⁵Yesu wabweese kubaleele ti: «Na mu beenu wuri kabaanaa wuri na mbaasi, ngo wiisiri kuri nde kakati dya butsuku, mu kumuleele ti: "Mbaasi me, soomboso me mampa matatu,

⁶bukuri mbaasi mosi, fumuni ku budyeengi wiisiri kuri me, ngo nyahele na kya kumuha."

⁷Heki mbuti mbaasi mvutu kumuheele munsa nzo ti: "Yaa kwaamisa me ko, mu lumalu mweelu weki wakaangu, na me na baala baami tweki ha yulu mbuka, me lo nyahele kubweese kusiimbika mu kuha ye mampa."

⁸Me nyiluleele: Ti hayuku, nde wahele kusiimbika mu kumuha mu kuri ti mbaasi yaandi, lo nde sa kusiimbika, mu kumuha bikari na nzala byo bukuri wuri mu kunamitina kuloombo kwahele nsoni.

⁹Hango, me nyiluleele ti: "Loombeenu sa baluha; sakeenu sa lwadzuukila; komboteenu sa baludzibukila.

¹⁰Bukuri mpisi wuloombaa wutaambulaa, wusakaa wudzuukilaa, kuri wukomboto sa bamudzibukila.

¹¹Nkya taayi mu beenu, diri mwaana kamuloombaana nsu, nde ha kibeendu kya nsu kumuha nyoko?

¹²Bunu pe kamuloombaana diiki nde kumuha ngeenge?

¹³Ngo habaanaa beenu, luri na mutima-bubi, luyaari kuha bitotolo byabibwe kuri baala beenu, lo dyaburi Taayi dya ku yulu kahele bvula kuha Mpeeve Yangisi kuri babo bamuloombo?»

¹⁴Yesu waba palisa mpeeve yayibi ya bubaba yaba mu muutu. Mpeeve yayibi bu yapala, baba dyadzoonso, na mampuumbu ma baatu makimuka.

¹⁵Babamosi mu bo, baleele ti: «Mu Beledzebule, mfumu mampeeve mamabi, nde kari mu kwebingisila mampeeve mamabi!»

¹⁶Bakaka mu kumukotoso mu nsindukulu bamuloombo kidiimbu kya ku yulu.

¹⁷Ngo nde bu kayaaba bitsimi bya bo, wabaleele ti: «Mpisi kimfumu kiri baatu bakwenwaana bo na bo, lo kyo kusa kubwa; na baatu bari nzo mosi babaanaa bakwenwaana bo na bo, lo nzo yibwiiri.

¹⁸Mbuti Satana wuri mu kunwaanisa nde-meene, lo kimfumu kya nde dyaburi kinamitina kuba? Beenu lo luleele ti mu Beledzebule me nyiri mu kwebingisila mampeeve mamabi.

¹⁹Mbuti me mu Beledzebule nyiri mu kwebingisila mampeeve mamabi, heki baala ba beenu, mu na bari mu kwebingisila? Hango-nkuumbu, bo sa baba batsuundisi ba beenu.

²⁰Ngo mbuti mu muleembu Nzaambi [me] nyiri mu kwebingisila mampeeve mamabi, haho lo Kimfumu kya Nzaambi ki mwaakwiisa kuri beenu.»

²¹«Habaanaa ngaa-makwa wuri na binwaanunu byakuka, wuri mu kukebe nzo, lo bitotolo byaandi byakebu kwakubwe.

²²Ngo mbuti wubvuriri makwa na nde wiisiri, na wumubwiisiri, lo wumuhoriri na binwaanunu bi kabee wasikikila, na kaburi bitotolo bi kamuhoriri na byo.»

²³«Wunde wahele kuba kintwaari na me, lo mutaatu me; na wunde wahele kukutikisa kintwaari na me, lo wuri mu kutsamukisa.»

²⁴«Habaanaa, mpeeve yayibi yipariri mu muutu, lo yikweluta mu bibeendu byahele maampa, mu kwesaka ha kawuuma; na mbuti yahele kubaka, [haho] yileele ti: "Me mvutukiri mu nzo yaami, mumwo mu mbee nyapala."

²⁵Na yo buyiisiri yimwiini ti nzo yeki yakoombolo na yasa bunkete;

²⁶haho yo yikweende mu kuholo mampeeve nsaamu makimi, mabvuriri bubi na nde, mu kwiisa kukoto na kudzakala mu nzo yiyo. Mbeelu yampotulu ya muutu wunde, lo yeki yibvuriri bubi ti na yatete.»

²⁷Yesu bu kaba mu kuleele mamo, mukyeetu mosi kunsa mpuumbu wabaangula mbeembu, wamuleele ti: «Kiminu kuri mukyeetu wanata yimi dya ye, na wakunwiisa mabeene.»

²⁸Nde wabvutula ti: «Kiminu lo kibvuriri kuri babo bayukaa maampu ma Nzaambi na bamasalilaana!»

²⁹Mampuumbu bu maba makutukina, Yesu wabeke mu kuleele ti: «Kiseendu kimaki, kiseendu kyakibi. Kiri mu kusaka kidiimbu. Ngo kwahele kidiimbu ki baha kuri kiseendu ki, mbuti kiri kya Yona ko.

³⁰Mukwongo, bunu bwaba Yona, kidiimbu kuri bari Ninive, bunubwo se buba Mwaana muutu mu kiseendu kimaki.

³¹Mbyaasi ya mukyeetu ya ku baanda, sa kateleme mu kiluumbu kya mutsuundu, kintwaari na baatu ba kiseendu kimaki, na sa kabakesele mukanu, mu bukuri nde wafumuni mu manto ma butoto, mu kwiisa kuyuka madyeele ma Solomo. Ngo mono, wuri hamaha bvuriri na Solomo.

³²Mu kiluumbu kya mutsuundu, babakala ba ku Ninive sa bateleme kintwaari na kiseendu kimaki, na sa babakesele mukanu, bukuri bo bayiingiri madyeele mu nyikusulu dza Yona; ngo mono, wuri hamaha bvuriri na Yona!»

³³«Kuri muutu ko wuri kanamukaana mwiinda, wumusuusiri kunsa kisweekulu, [bunu pe kunsa kisa]. Ngo kasi lo kumusuusa ha yulu kitetukulu kya mwiinda, mpisi heki bakoto, bamono buungi.

³⁴Diisu ngo mwiinda nyutu. Mbuti diisu dya ye dyaditsiina, lo nyutu ye yoyinso yiri kunsa buungi. Ngo mbuti diisu dya ye dyabeele, lo nyutu ye yiri kunsa mampimbisi.

³⁵Hango, sa madyeele mpisi buungi buri mu ye buhele kukituka mampimbisi.

³⁶Ngo mbuti nyutu ye yoyinso yiri kunsa buungi, na yahele ti na mwaa hari mampimbisi, lo yoyinso sa yaba kunsa buungi, bunu bu haanaa mwiinda buungi kuri ye.»

³⁷Yesu kamana kudzoonso, Mufarisi mosi wamuteele mbila mu kwedya ku nzo nde. Nde bu kakoto wadzakala mu kudya.

³⁸Mufarisi wakimuka mu kumono ti Yesu wahele tekesele kuswaaka myooko mu kudya.

³⁹Mfumu waleele kuri nde ti: «Mu lumalu, beenu Bafarisi, lutsyeemisaa mbasa na lukoombo ku mbasi, ngo kasi beenu-meene kunsa-kati lwaluula mu kwiibi na mu bubi.

⁴⁰Beenu biwulu! Wunde wayirikiri ku mbasi, buri wahele kuyirika se kunsa-kati?

⁴¹Hango, heenee mu kikabu kuri bawelu bibyo biri munsa mbasa na lukoombo, tumi byobinso biba byatsyeeme kuri beenu.»

⁴²«Ngo kyaari kuri beenu Bafarisi, bukuri beenu luhanaa kikuuku kyakuumi kya binkoolo biri nkuumbu hedwosemo, na pegano, na kya binkoolo bya bitsuumbu-bitsuumbu. Ngo kasi beenu lukwenyaafuna nsungumunu na ntiilu bya Nzaambi. Bibyo beenu luketi kusalila, kwahele kunyaafuna byakaka.»

⁴³«Kyaari kuri beenu Bafarisi, bukuri beenu lutiiri kwedzakala mu bibeendu byatete mu manzo mankutukunu, na kuri ti beeluha mamboto mu bibeendu bya bobanso.

⁴⁴Kyaari kuri beenu, bukuri luri bunu mampeembe mahele kuyabakana, mari baatu badyaata ha yulu mo kwahele kuyaaba.»

⁴⁵Muyikisi mangisi mosi wabvutula, waleele kuri Yesu ti: «Muyikisi, wubaanaa wuleele mamo, lo beetu se ye wuri mu kutuka.»

⁴⁶Yesu wabvutula ti: «Kyaari kuri beenu se, bayikisi ba mangisi. Bukuri beenu lukwetetekile baatu matsulu maleme mu kunata, ngo beenu-meene lwahele kubelemene matsulu mamo ti mu muleembu mosi.

⁴⁷Kyaari kuri beenu, bukuri lukwetuunga mampeembe ma babikiri, koomosoko bataayi ba beenu babadzusiri.

⁴⁸Hango beenu se luri bambaangi, na lumono kiminu mu biyiriki bya bataayi beenu; bukuri bo ngo baba kubadzusa, na beenu ngo lutuunga mampeembe.

⁴⁹Hango-nkuumbu madyeele ma Nzaambi maleele ti: "Me sa nyabaheekele babikiri na bantumu; na bo sa badzusa babamosi, na kukwaamisa bakaka",

⁵⁰mpisi heki kiseendu kimaki kifuta makila ma babikiri matsaamukini, kuholosono ku bayirikiri nsi,

⁵¹kuholosono mu makila ma Abele natee mu makila ma Dzakariya wu badzusiri ha kakati dya dziku na nzo yangisi. Heehe, me nyiluleele kuri beenu ti kiseendu kimaki sa kyafuta momanso mamo.

⁵²Kyaari kuri bayikisi ba mangisi, bukuri beenu lwayusiri fungula dya nyaabulu, beenu-meene lwahele kukoto, na batiiri kukoto, beenu lubakakisila.»

⁵³Yesu bu kapala mu nzo yiyo, bayikisi ba mangisi na Bafarisi babaandika kumubakila nkesi dza makwa, na kumudzoonsolo mu misamu myalaka,

⁵⁴na kwemutekele myeete mu kumubaka mu mipala mu munwa waandi.