Read Beembe Luk 15 Bible Online

Luk 15 - Beembe bible

Luk 15

¹Batori ba mpaku bobanso na bangaa-masumu bakokosolo kuri Yesu mu kumuywiila.

²Bafarisi na batini ba mangisi bamunguta na baleele ti: «Muutu wumawu wukwetaambula bangaa-masumu na wukwedya kintwaari na bo.»

³Nde wabateele nkuma yimayi, waleele ti:

⁴«Nkya muutu mu beenu, habaanaa wuri na nkama bimeeme, ngo dziibisiri kimosi mu byo, lo wahele kusisa makuumi wa na wa ku nsi yankatu, na weensi ku kweesaka kya dziimbila natee wukidzuukiri?

⁵Bu kayidzuukiri, wukiteetikiri ha yulu maheembu maandi na wuri na kiminu.

⁶Bu kabvutukiri ku nzo, teeriri banduku na bambaasi, na wubaleeriri ti: "Keembee kintwaari na me, bukuri me dzuukiri kimeeme kyaami kyabee kyadziimbila."

⁷Me nyiluleele ti, bwobumosi, kiminu sa kyabvula mu mayulu mu ntoono ngaa-masumu mosi wuyiingiri madyeele ti na mu makuumi wa na wa basuunguma, bahele na nzala nyiingulu madyeele.»

⁸«Bunu pe nkya mukyeetu wuri habaanaa wuri na mipata kuumi, ngo kadziimbisiri mupata mosi, lo wahele kunamuka mwiinda, na kukoombolo nzo mu kusaka nde mu bunkete, natee ku kamudzuukiri?

⁹Bu kamudzuukiri, teeriri banduku na bambaasi na kuleele ti: "Keembe kintwaari na me, bukuri me dzuukiri mupata wubee nyadziimbisa."

¹⁰Bwobumosi, me nyiluleele ti, kuri kiminu, ha busu bwa bambasi ba Nzaambi, mu ntoono ngaa-masumu mosi wuyiingiri madyeele.»

¹¹Yesu wabweese kuleele ti: «Muutu mosi waba na baala boolo.

¹²Wubvuriri bulesi mu bo, waleele kuri taayi ti: "Taata, ha me kikuuku kya lubaku kya me!" Taayi wabakabula bya mbakulu bya kidziingu.

¹³Biluumbu byalaka bu byaluta, wubvuriri bulesi wayarika bya nde byobinso, wayende ku nsi ya la. Wamana kubvuka lubaku lwaandi, mu kidziingu kya mawaamba.

¹⁴Bu kamana lubaku lwaandi lwolunso, nzala ya makwa yayisa mu nsi yiyo, na nde wabaandika kutikila.

¹⁵Wasa kimbaasi na mosi mu bangaa-nsi yiyo, na muutu wunde wamuheeke ku manseke ma nde mu kwediisila bangulu.

¹⁶Nde waba na nzala kuyukuta mu byandya bya bangulu, ngo wumuha nde pe.

¹⁷Wakoto mu kwetsima nde-meene na waleele ti: "Bangaamba ba taata balaka bari na byandya bya buukula, kasi me nyiri mu kufwa mu nzala hamaha.

¹⁸Me ntelemaana, bvutukiri kuri taata na nyemuleele ti: Taata, me nyasii masumu kuri Nzaambi na kuri ye.

¹⁹Me nyahele kubweese kuyelemene ti banteele mwaana ye. Hololo me bunu mosi mu bangaamba baaku!"

²⁰Nde bu kateleme, wayende kuri taayi dyaandi.» «Bu kaba wakiri la, taayi dyaandi wamutalila, wamono ngebe kunsa mutima, nde wadzumuna, wadumukina mwaana mu nkiingu, na wamunyumutina.

²¹Mwaana waleele kuri nde ti: "Taata, me nyasii masumu kuri Nzaambi na kuri ye. Me nyahele kubweese kuyelemene ti banteele mwaana ye."

²²Taayi waleele kuri bisari byaandi ti: "Mawasu, twaalee dzweele dibvuriri bubwete, na mulwiike dyo, mulwiikee se lungele mu kooko, na masapaatu mu miilu.

²³Twaaleenu mwaana ngoombo watoloko, mudzusee na tusee munkeembu,

²⁴bukuri mwaana me wumawu, wabee wafwa, ngo bweesiri kuba wamwooyo, wabeeri wadziimbila, ngo bweesiri kumonoko." Bo babeke kukeembe.»

²⁵«Mwaana waandi wa mukuutu waba ku manseke. Bu kabvutuka, wakokosolo bebele na nzo, wayuka baatu bari mu kuyimbila na kukina.

²⁶Nde wateele mosi mu bisari, na wasaka kuyaaba bibyo ka byaba nki.

²⁷Nde waleele kuri nde ti: "Mpaangi ye mwaakwiisa, ngo taayi dya ye kadzusiri mwaana ngoombo watoloko, bukuri nde taambiri mwaana kuri wamutsiina."

²⁸Nde wabaka nkesi na wabisa kukoto. Taayi dyaandi wapala na wamuyingukila.

²⁹Nde wabvutula na waleele kuri taayi ti: "Mono, mibvu myalaka me nyiri mu kusalilaa ye, me nyahaakuri lutumu ti lumosi lwa ye ko. Na ye wakiri kumpa pe, ti mwaa-mwaana ntaba, mpisi me tsa munkeembu na banduku baami.

³⁰Ngo kasi mwaana ye wu, wumeenye kwebvuka lubaku lwa ye lwa kidziingu, bo na bakyeetu ba biyala, ye mwaamudzusila mwaana ngoombo yatoloko."

³¹Taayi waleele kuri mwaana ti: "Mwaana waami, ye wuri na me mu mantaangu momanso, byobinso bya me bya ye!

³²Bu bee bwayelemene mu kusa munkeembu na kumono kiminu, bukuri mpaangi ye yi wabee wafwa na bweesiri kuba wamwooyo; wabee wadziimbila ngo bweesiri kumonoko!"»