Read Beembe Luk 16 Bible Online

Luk 16 - Beembe bible

Luk 16

¹Yesu wabweese kuleele kuri bayiki baandi ti: «Muutu mosi wa kisina waba na mukebi; bafuunda mukebi kuri nde ti wuri mu kwebvuka lubaku lwa nde.

²Bu kamuteele, waleele kuri nde ti: "Nki mo, me nyiri mu kuyuka mu ye? Tangumisa bi wuri mu kukebaa, bukuri ye wubweese kubikebe ko."

³Mukebi waleele kunsa mutima waandi ti: "Nki nyisa, bukuri mfumu yaami weki yisila me, mu kisalu kya kukebe lubaku lwaandi. Kuhata manseke, me nyiri na makwa ko! Kusa luloombo, me nyiri na nsoni!

⁴Me nyaari ma nyiyirika, mpisi heki, ha banyisila mu kisalu kya kukebe, baatu bataambula mu manzo ma bo."

⁵Nde wateele mosi-mosi mu baba na bibiimbu bya mfumu yaandi; nde wafuula kuri watete ti: "Kibiimbu kya kikwe, ye wuri na kyo kya mfumu me?"

⁶Nde wabvutula ti: "Midungulu nkama mya maasi." Nde wamuleele ti: "Holo mukaanda waaku, dzakala, tina mu mawasu ti makuumi mataanu."

⁷Tumi kuri wakaka nde waleele ti: "Kibiimbu kya kikwe ye wuri kyo?" Nde wabvutula ti: "Matsaaka nkama ma masaangu." Nde wamuleele ti: "Holo mukaanda waaku, tina ti makuumi mpoomo."

⁸Mfumu wasiika mukebi wunde wuri na bubayi, bukuri waba walubuka mu kusalila bubwo. Mukwongo, baala ba ntaangu yimayi, babvuriri kulubuka, mu mitariri kiseendu kya bo-meene, ti na baala ba buungi.»

⁹Ngo me nyiluleele ti: «Sakee banduku, mu busina bwa bubayi, mpisi heki mu ntaangu yiri lweki tikila, bo balutaambula mu nzo ma bibvu ngo bibvu.

¹⁰Wunde wakwiikama mu myantele, wuri wakwiikama se mu myaminene; wunde wuri na bubayi mu myantele, wuri na bubayi se mu myaminene.

¹¹Ngo mbuti, beenu lwahele kuba bakwiikama mu busina bwa bubayi, lo na mbasi-tsuku wuluha busina byangwanwa?

¹²Na mbuti lwahele kuba bakwiikama mu byaŋani, lo na wuluha bya beenu-meene?»

¹³«Kuri kisari kya mu nzo, kiri lo sariri bamfumu boolo ko. Mukwongo, nde lo sa kabele wamosi na kutya wakaka, bunu pe, sa kakaangama mu wamosi na kunyaafuna wakaka. Ka lutsiitsa kusalila Nzaambi na kusalila se busina ko.»

¹⁴Bafarisi batiiri mboongo, baba yukaa momanso mamo, na basiila Yesu munsiku.

¹⁵Nde waleele kuri bo ti: «Beenu lukwesoongo ha busu bwa baatu ti lwasuunguma, ngo kasi Nzaambi yaari mitima mya beenu. Mukwongo, bibyo biri baatu bamono ti byadzaangama, ha busu bwa Nzaambi biri byanyaafuna.»

¹⁶«Mangisi na babikiri byaba natee mu ntaangu ya Yowane; ngo kuholosono haho natee lu, Musamu Wamubwete wa Kimfumu kya Nzaambi wuri wayaabusu; na mpisi muutu wusalila makwa mu kukoto.

¹⁷Dibvuriri kuleenge ti yulu na butoto biluta, ti na kuri mwaa mpita mosi ya Mangisi yiyaaluka.»

¹⁸«Mpisi bakala dibinga mukasi waandi, na kweeriri mukimi, lo nde teeri kimpala. Na wunde wukweele mukyeetu wuri mulumi mwaamubinga, lo teeri kimpala.»

¹⁹«Kwaba mubakala mosi wa kisina, waba kwelwaataa binkuta byabibwete na byantaalu yalaka. Mpisi kiluumbu nde waba yirikaa munkeembu nkati wamubwete.

²⁰Bebele na nde, kwaba muwelu mosi nkuumbu yaandi Ladzaro, nyutu yaandi yaba yaluula mu mamputa.

²¹Nde waba na nzala kuyukuta, mu bibyo bisonokaa ku nsuku taabala dya wa kisina; ngo kasi, bambwa se, kusa kwiisa kuheende mamputa ma nde.

²²Muwelu wayisa kufwa, na bambasi bamunata ha nkata Abalaami. Wa kisina se wafwa na bamudziika.

²³Ku nsi ya bafwa, wa kisina bu kaba wuri mu kubama, wasyeetele miisu ku yulu na watalila Abalaami ku la, na Ladzaro ha nkata yaandi.

²⁴Nde wateele Abalaami, waleele ti: "Taata Abalaami, bakila me ngebe, na heeke Ladzaro, mpisi katsuuba nto muleembu waandi mu maampa, na kaboloso ludima lwa me, bukuri me nyiri mu kubama kunsa milaka mya mbaawu."

²⁵Abalaami waleele kuri nde ti: "Mwaana me, baambuka mwooyo ti ye wataamburi byabibwe bya ye, ha wabee mu bumwooyo, na Ladzaro nde se wamwii manyoongi. Ngo mu lumalu, nde wuri mu mboondulu hamaha, kasi ye wuri mu kubama.

²⁶Ha yulu haho se, kuri beenge dyadinene diri ha kakati dya beenu na beetu, kuri heki batiiri kuyisika hamaha mu kuluta kuri beenu, lo bahele kubangisina; na kwahele se bwa kuyisikila kukwo, mu kusabuka kuri beetu."»

²⁷«Wa kisina waleele ti: "Me nyikuyingukila, taata, mpisi ye wumuheeke ku nzo taayi dya me,

²⁸bukuri me nyiri na bampaangi bataanu kukwo, mpisi keende kabalubula, kuri heki bo se bahele kwiisa, ku kibeendu kya mbamusunu kimaki."

²⁹Abalaami wamuleele ti: "Bo bari na Moose na babikiri, baywiila babo."

³⁰Nde wabvutula ti: "Pele, taata Abalaami, mbuti muutu nangukini kuri bafwa, na weensi kuri bo, lo sa bayiinga madyeele."

³¹Abalaami wamuleele ti: "Mbuti bo bahele kuywiila Moose na babikiri, lo ti hayuku muutu fulukiri mu bafwa, lo bamutambikila ko."»