Read Beembe Luk 18 Bible Online

Luk 18 - Beembe bible

Luk 18

¹Yesu wata nkuma kuri bo, mu kubasoongo ti bayelemini kusaambila mu mpisi ntaangu, na kuhele kuholo-bito.

²Waleele ti: «Kwaba mularimi mosi ha bvula dimosi; nde kaba bataa Nzaambi ko, na kaba bvuminaa muutu ko.

³Mu bvula dinidyo se kwaba mukyeetu mosi wa mufwiiri, waba kwiisa kumuleele ti: "Lalima musamu wuri ha kakati dya me na mbaasi yi turi twabakana."

⁴Mantaangu malaka mularimi wunde waba wahele kutya, ngo ha mambisa haho, nde watsima kunsa mutima ti: "Lu ti hayuku me nkoobata Nzaambi ko, na bvumina se muutu ko,

⁵ngo bukuri mufwiiri wu wuri mu kunkwaamisa, me nyimulalimina musamu wunde, mpisi kahele kusiila me ndungusu kwahele manunu.

⁶Mfumu waleele ti: "Yukeenu mamo ma leeriri mularimi wunde wuri na bubayi!"»

⁷Heki Nzaambi lo wahele kulalama misamu mya ba baandi ba kari kasoolo, bari mu kufuula butsuku na mwiini kuri nde wubakiingisaa?

⁸Me nyiluleele ti, «nde sa kalalama musamu bo mu mawasu. Ngo kasi, Mwaana muutu, ha kakwiisa nde tumi mbasi-tsuku kamono kanyi ha butoto hamaha?»

⁹Yesu wata se nkuma yimayi mu ntoono babamosi bakwetsimaana ti, bo basuunguma kwaaku na bakwenyaafuna bambaasi:

¹⁰«Baatu boolo bayende ku nzo Nzaambi mu kwesaambila. Mosi waba Mufarisi, wakaka mutori-mpaku.

¹¹Mufarisi bu kateleme wasaambila kunsa mutima ti: "Ho! Nzaambi, me mvutiri matoondo kuri ye, bukuri me nyahele kuba bunu baatu bakaka bari bangaa-kwiibi, bangaa-bubayi, bangaa-kimpala, bunu pe, buri mutori-mpaku wumawu.

¹²Me nyikotaana loomi mbala dzoolo mu lumiingu, me nyihaanaana se kikuuku kya kuumi mu byobinso bya mbakulu yaami."

¹³Ngo kasi, mutori-mpaku, bu kaba wateleme mwaa-lutaki, waba wahele kutya ti kusyeetele miisu ku yulu, ngo waba yalaa myooko myaandi na kuleele ti: "Ho! Nzaambi, bakila me ngebe, me nyiri ngaa-masumu."

¹⁴Me nyiluleele ti: mutori-mpaku wunde, bu kaba bvutuka ku nzo yaandi, lo wasuunguka mabuungu maandi; ngo Mufarisi ti bele pe. Bukuri mpisi wunde wudzaangamaa mu nde-meene, lo sa bamukulula, ngo wunde wakuluka mu nde-meene sa bamudzaangisa.»

¹⁵Baatu batwaala mwaa-baala bansoombo kuri nde, mpisi kababelemene. Ngo bayiki baandi baŋaŋina baba batwaala.

¹⁶Kasi Yesu waloombo bamutwaalikila mwaa-bo, na waleele ti: «Hemesee mwaa-baala bansoombo biisa kuri me, na yaa lubadika ko; bukuri Kimfumu kya Nzaambi kiri kya bari bunu bo.

¹⁷Mu ngwanwa me nyiluleele ti: Mpisi wunde wuhele kutaambula Kimfumu kya Nzaambi, buni mwaa-mwaana wansoombo, lo ka kakoto mu kyo ko.»

¹⁸Mukuutu mosi wafuula Yesu, waleele ti: «Muyikisi wamubwete, nki me nyisa mu kutaambula kidziingu kyahele manunu?»

¹⁹Yesu wabvutula kuri nde ti: «Bukuri nki ye wuteele me ti wamubwete? Kuri muutu ti mosi wamubwete ko, mbuti ka wuni Nzaambi kitsu ko.

²⁰Ye yaari ntumu: "Yaa ta kimpala ko, yaa dzusa ko, yaa yiba ko, yaa leele kimbaangi kyampya ko, kiinsa taayi na nguri yaaku."»

²¹Mukuutu wunde wabvutula ti: «Me nyabvumina momanso mamo, kuholosono bulesi bwaami.»

²²Yesu bu kayuka bubwo, waleele kuri nde ti: «Kwakiri kitotolo kimosi, kiheriri kuri ye: byobinso bi wuri byo, yarika na kabula mboongo kuri bawelu, ye sa baka busina mu mayulu, na wasa nama me.»

²³Ngo nde bu kayuka mamo, wakoto mu kunyoongo; bukuri, waba nkati kisina kyakinene.

²⁴Yesu bu kamumono [kunsa ngebe dzamakwa], waleele ti: «Diri nkati dya mpasi kuri bisina mu kukoto mu Kimfumu kya Nzaambi;

²⁵mukwongo, dibvuriri kuba dyaleenge kuri ngoombo mu lutila ha wuri dya noongo, ti wa kisina mu kukoto mu Kimfumu kya Nzaambi.»

²⁶Babo bayukiri mamo, baleele ti: «Na wubangisina kubvuuka?»

²⁷Yesu wabvutula ti: «Diri baatu bahele kubangisina, Nzaambi lo wubangisina.»

²⁸Petelo waleele ti: «Mono, beetu twasiisiri bitotolo byeetu na twanemi ye.»

²⁹Yesu waleele kuri bo ti: «Mu ngwanwa me nyiluleele ti: Kuri muutu ko wasiisaa nzo, bunu pe mukasi, bunu pe bampaangi, bunu pe taayi na nguri, bunu pe baala, mu ntoono Kimfumu kya Nzaambi,

³⁰wuri lo heriri kutaambula mu ntaangu yimayi, bibyo bibvuriri, na mu ntaangu yikwiisa, kidziingu kyahele manunu.»

³¹Yesu, kaholaa bo kuumi na boolo, wabaleele ti: «Mono, tweki toombokeenu ku Yerusalemi, na momanso matinini babikiri mu ntoono Mwaana muutu, sa meende mu mana.

³²Bukuri, nde sa bamuyekele kuri bangooyi, sa bamusaana, sa bamufulula mante.

³³Bu bameeni kumulata nkwaasulu, sa bamudzusa; na mu kiluumbu kyabitatu nde sa kafuluka.

³⁴Ngo bayiki baandi, baba bahele kubakula, ntoono ti mosi mu mamo; mambangukulu ma maampu mamo, maba mabasweekele, na bo basii bakula ma babaleeriri ko.»

³⁵Mu ntaangu yaba kokosolo Yesu bebele na Yeriko, muutu mosi wafwa miisu waba wadzakala mu teke nzila wuri mu kusaa luloombo.

³⁶Bu kayuka mpuumbu baatu yiri mu kuluta, nde wasaka kuyaaba kari nki bibyo?

³⁷Bamuleele ti, Yesu wa ku Nadzareti wuri mu kuyooko.

³⁸Nde wafula musaakulu, waleele ti: «Yesu, mwaana Davidi, bakila me ngebe.»

³⁹Baba kweyendaa ku mankula, bamuŋaŋina mpisi kawura; ngo nde wahamisa kufula misaakulu ti: «Yesu, mwaana Davidi, bakila me ngebe.»

⁴⁰Yesu bu kateleme, watuma ti bamutwaala kuri nde. Bu kakokosolo kuri nde, Yesu wamufuula ti:

⁴¹«Nki tiiri ti me nsa mu ye?» Nde wabvutula ti: «Mfumu, me ntiiri kubweese kwemono.»

⁴²Yesu waleele kuri nde ti: «Bweese kwemono, kanyi dyaaku dikubvuukisiri.»

⁴³Ha nsi na nsi, nde wabweese kumono, na wanama Yesu kuri wukwekeembese Nzaambi. Baatu bobanso bamwiini mamo, badumusu Nzaambi.